កំពង់ស្ពឺៈយ៉ាងហោចណាស់មានមនុស្ស៩នាក់បានរងរបួសធ្ងន់និងស្រាលក្នុងករណីគ្រោះថ្នាក់ចរាចរណ៍រថយន្តក្រឡាប់ធ្លាក់ផ្លូវនៅលើជម្រាលភ្នំគិរីរម្យត្រង់ចំណុចយាយម៉ៅបាំងដៃ ស្ថិតក្នុងភូមិថ្មីឃុំចំបក់ ស្រុកភ្នំស្រួចខេត្តកំពង់ស្ពឺ។នេះបើតាមអះអាងរបស់មន្ត្រីនគរបាលចរាចរណ៍ស្រុកភ្នំស្រួច។
លោក ពៅ នឿន អធិការរងស្រុកភ្នំស្រួចទទួលបន្ទុកផ្នែកសណ្ដាប់ធ្នាប់ចរាចរណ៍ បានប្រាប់ភ្នំពេញប៉ុស្តិ៍នៅថ្ងៃទី៤ ខែកក្កដា ឆ្នាំ២០២១ថា នៅពេលនេះក្រុមមន្ត្រីជំនាញកំពុងស្ទូចរថយន្តដែលបានក្រឡាប់ធ្លាក់ផ្លូវ នោះយកទៅរក្សាទុកនៅអធិការដ្ឋាន នគរបាលស្រុកភ្នំស្រួច ដើម្បីរង់ចាំដំណោះស្រាយតាមផ្លូវច្បាប់។
លោកបានថ្លែងថា៖«អ្នកបើកបរ និងអ្នករួមដំណើរទាំងអស់នៅក្នុងរថយន្តនោះគឺជាអ្នកបម្រើការងារជាមួយគ្នានៅក្រុមហ៊ុនសម្អាងការលីលី។ពួកគេត្រូវបានសាច់ញាតិជួយអន្តរាគមន៍ដឹកយកទៅព្យាបាលនៅរាជធានីភ្នំពេញ»។
ជុំវិញករណីនេះ លោកហម លីលី ម្ចាស់សម្អាងការលីលី ដែលអះអាងថាជាជនរងគ្រោះម្នាក់នៅក្នុងហេតុការណ៍គ្រោះថ្នាក់ចរាចរណ៍ខាងលើនេះ បានប្រាប់ភ្នំពេញប៉ុស្តិ៍ថា នៅពេលនេះ រូបគាត់និងក្រុមការងារទាំងអស់ បានធូរស្រាលឡើងវិញហើយនិងបានចាកចេញពីមន្ទីរពេទ្យទាំងអស់ហើយក្រោយពីក្រុមគ្រូពេទ្យបានជួយលាងនិងរំរបួស ព្រមទាំងចាក់ថ្នាំម្នាក់ ២-៣ ម្ជុលរួចមក។
លោក លីលី បានបញ្ជាក់ថា៖«ពួកយើងទាំងអស់គ្នារងរបួសស្រាលទេគឺអ្នកខ្លះពកក្បាលនិងអ្នកខ្លះទៀតរលាត់ដៃរលាត់ជើងបន្តិចបន្ទួចប៉ុណ្ណោះ។នៅពេលនេះពួកយើងបានចេញពីមន្ទីរពេទ្យអស់ហើយ»។
បើតាមលោក លីលី ករណីគ្រោះថ្នាក់ចរាចរណ៍ខាងលើនេះ បានកើតឡើងនៅល្ងាចថ្ងៃទី៣ ខែកក្កដា ឆ្នាំ២០២១ ដែលក្នុងខណៈនោះគាត់និងក្រុមការងារ បាននាំគ្នាត្រឡប់ពីដើរកម្សាន្តនៅរមណីយដ្ឋានគិរីរម្យ តាមមធ្យោបាយធ្វើដំណើររថយន្តស្តារិច ដែលបើកបរដោយឈ្មោះ វីរៈ បុត្រ អាយុ ៣០ ឆ្នាំ។
លោក លីលី បានបន្តថា ដោយសារមេឃភ្លៀងផង និងស្ថានភាពផ្លូវរអិលផងនោះ បានធ្វើឲ្យរថយន្តរេចង្កូតធ្លាក់ផ្លូវ ហើយក្រឡាប់ប៉ះនិងដំថ្មបណ្ដាលឲ្យរងការខូចខាតរថយន្ត ប៉ុន្តែមនុស្សទាំងអស់រងរបួសស្រាល។
គិតចាប់ពីថ្ងៃទី១ ខែមករា ដល់ថ្ងៃទី ៣ ខែកកក្កដា ឆ្នាំ ២០២១ គ្រោះថ្នាក់ចរាចរណ៍នៅទូទាំងប្រទេសបានកើតឡើង ១ ២៧៩ លើកបណ្តាលឲ្យមនុស្សស្លាប់ចំនួន ៧២២ នាក់ និងរបួសចំនួន ១ ៨១១ នាក់ក្នុងនោះរបួសធ្ងន់ចំនួន ១ ០៦០ នាក់។
នេះបើតាមទិន្នន័យដែលទទួលបានពីមន្ត្រីនាយកដ្ឋាននគរបាលចរាចរណ៍និងសណ្ដាប់សាធារណៈនៃអគ្គស្នងការនគរបាលជាតិ។
លោកឧត្តមសេនីយ៍ឯក ឆាយ គឹមខឿន អ្នកនាំពាក្យអគ្គស្នងការដ្ឋាននគរបាលជាតិបានប្រាប់ឲ្យដឹងថា រយៈពេល ១៨៤ ថ្ងៃ គិតចាប់ពីថ្ងៃទី១ ខែមករា ដល់ថ្ងៃទី ៣ ខែកក្កដា ឆ្នាំ ២០២១ គ្រោះថ្នាក់ចរាចរណ៍នៅទូទាំងប្រទេសបានកើតឡើង ១ ២៧៩ លើកបណ្តាលឲ្យមនុស្សស្លាប់បាត់បង់ជីវិតចំនួន ៧២២ នាក់ និងរបួសចំនួន ១ ៨១១ នាក់ ក្នុងនោះធ្ងន់ចំនួន ១ ០៦០ នាក់។
លោកបានបន្តថា ចំពោះការអនុវត្តរឹតបន្តឹងច្បាប់ចរាចរណ៍ក្នុងរយៈពេល១៨៤ថ្ងៃនោះ មន្ត្រីនគរបាលចរាចរណ៍បានឃាត់ចាប់យានយន្តល្មើសច្បាប់ចរាចរណ៍សរុបចំនួនបាន ១០៨ ២៣៩ គ្រឿងផងដែរ ក្នុងនោះម៉ូតូចំនួន ៧៩ ៥៧៤ គ្រឿង និងរថយន្តចំនួន ២៨ ៦៦៥ គ្រឿង ក្នុងនោះរថយន្តតូចមានចំនួន ២២ ១៧៥ គ្រឿង និងរថយន្តធំ មានចំនួន ៦ ៤៩០ គ្រឿង៕