.jpg)
រូបតំណាង៖ ហាងលក់មឈូសមួយកន្លែងក្នុងរាជធានីភ្នំពេញ។ ហេង ជីវ័ន
បន្ទាយមានជ័យៈ អគ្គស្នងការរងនគរបាលជាតិលោក ខេង សាម៉េត ឧបត្ថម្ភក្តាមឈូសចំនួន ១០០ ដល់ខេត្តបន្ទាយមានជ័យ ខណៈខេត្តនេះមានអ្នកជំងឺកូវីដ ១៩ កម្រិតធ្ងន់ប្រមាណ ៣០ នាក់។
លោកឱម ចន្ថា អភិបាលរងខេត្តបន្ទាយមានជ័យប្រាប់ភ្នំពេញប៉ុស្តិ៍នៅថ្ងៃទី ៤ ខែកក្កដាថា៖«ក្តាមឈូសហ្នឹងគឺឯកឧត្តម ខេង សាម៉េត អគ្គស្នងការរងនគរបាលជាតិ លោកជួយមកខេត្តបន្ទាយមានជ័យ ១០០ ហើយជួយដល់ខេត្តបាត់ដំបង ១០០ ទាំងអស់ ២០០។ នៅក្នុងអនុគណៈកម្មការជាតិ[ចាត់ចែងនិងគ្រប់គ្រងសាកសពជំងឺកូវីដ១៩] ហ្នឹងគឺត្រៀមនឹងជួយដែរ។ ប៉ុន្តែដល់ពេលយើងបាន ១០០ យើងគិតត្រឹម ១០០ ហ្នឹងប្រើប្រាស់សិន។ ប្រសិនមានការខ្វះខាតទៀតប្រហែជាថ្នាក់ជាតិហ្នឹងបន្ថែមទៅទៀត»។
លោកថ្លែងថា ប្រសិនបើរដ្ឋាភិបាលអាចបញ្ចប់ការចាក់វ៉ាក់សាំងជូនដល់ប្រជាពលរដ្ឋក្នុងរយៈពេល១ខែទៀត ស្ថានភាពជំងឺកូវីដ១៩ប្រចាំខេត្តនេះអាចមានការធូរស្បើយឡើងវិញ។ អ្នកជំងឺកូវីដ ១៩ ដែលកំពុងធ្ងន់ធ្ងរមួយចំនួន ដោយសារពួកគេមិនទាន់ទទួលបានការចាក់វ៉ាក់សាំង។
លោកចន្ថាថ្លែងថា៖«រដ្ឋាភិបាលគ្រោងនឹងបញ្ជូនថែមទៀត។ ប៉ន្តែគ្រាន់ថា ខ្ញុំមើលសន្ទុះអ្នកជំងឺអាចនឹងថមថយ នៅពេលខាងមុខរយៈពេលប្រហែលជាកន្លះខែទៅ ១ ខែទៀតអាចថមថយវិញ»។
លោកបន្តថា៖«ខ្ញុំគិតថា ប្រហែលជា [ប្រើ] មិនអស់ទេ មឈូល១០០ហ្នឹង។ អ្នកដែលធ្ងន់ៗនៅក្នុងមន្ទីរពេទ្យ សរុបខ្ទង់ប្រហែល ២០ [ទៅ] ៣០ នាក់អីប៉ុណ្ណឹងឯង»។
លោកថ្លែងថា នៅខេត្តរបស់លោកមន្ទីរពេទ្យ២កន្លែងដែលទទួលអ្នកជំងឺកូវីដ១៩ ដែលធ្ងន់ធ្ងរ គឺមន្ទីរពេទ្យបង្អែកក្រុងប៉ោយប៉ែតនិងមន្ទីរពេទ្យមិត្តភាពកម្ពុជា-ជប៉ុននៅស្រុកមង្គលបុរី ខណៈមន្ទីរពេទ្យមួយកន្លែងទៀតនៅក្នុងក្រុងសិរីសោភ័ណ និងមណ្ឌលចត្តាឡីស័កមួយចំនួនទៀតទទួលអ្នកជំងឺកូវីដ ១៩ កម្រិតស្រាល។
លោកថ្លែងថា៖«អ៊ីចឹងក្តាមឈូលនេះខ្ញុំបានបញ្ជូនទៅហ្នឹងគឺទុកនៅប៉ោយប៉ែត ៥០ ហើយបញ្ជូនសម្រាប់ក្រុងសិរីសោភ័ណហ្នឹង ២០ ហើយយកទៅខាងមន្ទីរពេទ្យមិត្តភាពកម្ពុជា-ជប៉ុនហ្នឹង ៣០ មឈូល»។
លោកចន្ថាថ្លែងថា បច្ចុប្បន្នប្រជាពលរដ្ឋកំពុងសហការជាមួយអាជ្ញាធរខេត្តនេះក្នុងការចូលរួមទប់ស្កាត់ជំងឺនេះ ដោយសារពួកគាត់ស្ម័គ្រចិត្តចាក់វ៉ាក់សាំង គោរពទៅតាមវិធានការរបស់ក្រសួងសុខាភិបាលនិងមានការភ្ញាក់រឭក និងមានការខ្លាចរអាដែលធ្វើឱ្យពួកគាត់មានការប្រុងប្រយ័ត្នរៀងៗខ្លួន។
លោកថ្លែងថា៖«ខ្ញុំគិតថាប្រសិនបើគាត់ចូលរួមបានប៉ុណ្ណឹង វាទៅមុខនឹងអាចថយ។ វាមិនអាច [រីករាលដាល]ទៅមុខទៀតទេ»។
លោកចន្ថាឱ្យដឹងថា រដ្ឋបាលខេត្តរបស់លោកមិនចាំបាច់ត្រៀមថវិកាសម្រាប់ទិញក្តាមឈូសនោះទេ។ ប្រសិនបើរដ្ឋបាលខេត្តនេះប្រើប្រាស់ជិតអស់ចំនួនក្តាមឈូសដែលមាន រដ្ឋបាលខេត្តនឹងរាយការណ៍ជូនរដ្ឋាភិបាលដែលលោកគិតប្រហែលជាអាចឧបត្ថម្ភបន្ថែមទៀត។
ថ្លែងក្នុងកិច្ចប្រជុំពិសេសមួយតាមប្រព័ន្ធវីដេអូដើម្បីពិភាក្សា និងដោះស្រាយទៅលើបញ្ហាជំងឺកូវីដ១៩ កាលពីថ្ងៃទី ១ ខែកក្កដា លោកនាយករដ្ឋមន្ត្រីហ៊ុន សែន បញ្ជាឱ្យលោកសៅ សុខាមេបញ្ជាការកងរាជអាវុធហត្ថលើផ្ទៃប្រទេសយកឈើដែលរឹបអូសបានដើម្បីរៀបចំធ្វើជាក្តាមឈូស។ ក្រសួងសេដ្ឋកិច្ចផ្តល់ថវិកាទិញក្តាមឈូស ដែលមានលក់យកមកស្តុកទុកតាមមន្ទីរពេទ្យនៅភ្នំពេញ និងនៅតាមខេត្ត។
លោកថ្លែងថា៖«ស្លាប់ជំនាន់កូវីដគឺកម្សត់ណាស់ និយាយតាមមួយបែបដូចជាសាកសពអនាថា ហើយយើងត្រូវតែមានក្តាមឈូសឱ្យបានត្រឹមត្រូវសម្រាប់យកទៅបូជាឬយកទៅកប់។ អ៊ីចឹង អនុគណៈកម្មការសាងសង់ និងជួសជុលពិភាក្សាជាមួយនឹងគណៈកម្មការគ្រង់គ្រង និងចាត់ចែងសាកសព ដើម្បី នឹងពិនិត្យមើល ហើយពិភាក្សាជាមួយនឹងឯកឧត្តមសៅ សុខា។ ឈើដែលយើងចាប់បានកន្លងទៅយកអាហ្នឹងធ្វើក្តាមឈូស។ យើងមិនដល់ថ្នាក់ថាឱ្យសាកសពរបស់យើងអត់ក្តាមឈូសទេ។ ត្រូវមានក្តាមឈូស។ ត្រូវគោរពទៅដល់សាកសពដល់វិញ្ញាណក្ខន្ធពលរដ្ឋរបស់យើងដែលបានចាកលោក»៕
វីដេអូ៖
