.jpg)
សមត្ថកិច្ចមូលដ្ឋានពិនិត្យស្រាក្នុងប៊ីដុង។ រូបថត CCF
ភ្នំពេញៈ មនុស្ស ៩ នាក់ស្លាប់ និង ១២ នាក់ទៀតកំពុងសម្រាកព្យាបាលនៅឯមន្ទីរពេទ្យ ក្រោយពីបានផឹកស្រាស និងស្រាថ្នាំ នៅភូមិកោះឈ្វាំង ឃុំស្វាយទងខាងត្បូង ស្រុកកំពង់ត្រាច ខេត្តកំពត។ យោងតាមការឱ្យដឹងរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.»។
សេចក្តីប្រកាសព័ត៌មានរបស់ ក.ប.ប. នៅថ្ងៃទី ៤ ខែកក្កដា បានបញ្ជាក់ថា បន្ទាប់ពីចុះដល់ទីតាំងកើតហេតុ មន្ត្រីជំនាញបានសាកសួរ និងទទួលបានព័ត៌មានថា កាលពីថ្ងៃទី ៣ ខែកក្កដា មានប្រជាពលរដ្ឋដែលរស់នៅភូមិកោះឈ្វាំងនេះមានអាការក្អួតចង្អោរ ទន់ដៃជើងរហូតស្លាប់បាត់បង់ជីវិតចំនួន ៩ នាក់ និង ១២ នាក់ផ្សេងទៀត ត្រូវបាននាំយកទៅសម្រាកព្យាបាលនៅមន្ទីរពេទ្យដំណាក់ចង្អើរ និងមន្ទីរពេទ្យបង្អែកស្រុកកំពង់ត្រាច។
ប្រភពដដែលបានបន្តថា មន្ត្រីជំនាញបានប្រមូលសំណាកគំរូស្រាស និងស្រាថ្នាំដែលនៅសេសសល់នៅផ្ទះជនរងគ្រោះ និងទីតាំងលក់ស្រានេះ និងបន្តចុះស្រាវជ្រាវដល់កន្លែងផលិតស្រា ដែលស្ថិតនៅខាងជើងវត្តអង្គដំបងដែក ស្ថិតក្នុងភូមិតាក្ងាប ឃុំស្វាយទងខាងជើង ស្រុកកំពង់ត្រាច។ សំណាកគំរូទាំងអស់ដែលប្រមូលបានត្រូវបានបញ្ជូនមកវិភាគនៅមន្ទីរពិសោធន៍របស់អគ្គនាយកដ្ឋាន ក.ប.ប. ដើម្បីរកវត្តមានសារធាតុមេតាណុល ដែលជាសារធាតុបង្កគ្រោះថ្នាក់។
ទោះយ៉ាងណាក៏ដោយ លោក អូន ខន អភិបាលស្រុកកំពង់ត្រាចបានប្រាប់ ភ្នំពេញ ប៉ុស្តិ៍ នៅថ្ងៃទី ៤ ខែកក្កដា នេះថាកាលពីថ្ងៃទី ៣ មានមនុស្សស្លាប់ ៤ នាក់ ហើយឈានដល់ថ្ងៃទី ៤ ខែកក្កដា នេះមានមនុស្ស ២ នាក់ទៀតបានស្លាប់បន្ថែមដែលធ្វើឱ្យអ្នកស្លាប់បានកើនដល់ ៦ នាក់ប៉ុន្តែមនុស្ស ៣ នាក់ផ្សេងទៀតដែលបានស្លាប់ដែរនោះ គឺដោយសារពួកគាត់មានវ័យចាស់ជរា។
លោក អូន ខន ថ្លែងថា៖ «ពួកគាត់ជាអ្នកនេសាទត្រី ដែលស្ថិតនៅតំបន់ដាច់ស្រយាល មុនដំបូងស្មានតែពុលត្រីកាម៉ុង ប៉ុន្តែនៅពេលយើងសួរនាំអ្នកផ្សេងទៀត ដែលអត់ហូបត្រីកាម៉ុងផង ក៏បានស្លាប់។ ដូច្នេះហើយយើងសន្និដ្ឋានថា វាជាការពុលស្រា»។
លោក អូន ខន បានថ្លែងថា អ្នកដែលលក់ស្រាសបានរត់គេចខ្លួនកាលពីថ្ងៃទី ៣ ខែកក្កដា ខណៈកម្លាំងសមត្ថកិច្ចកំពុងតែស្រាវជ្រាវ ហើយនគរបាលប៉ុស្តិ៍ និងរដ្ឋបាលឃុំស្វាយទងខាងត្បូង បានឱ្យបញ្ឈប់ការលក់ហើយ ប៉ុន្តែជាគោលការណរ៍របស់រដ្ឋបាលស្រុកគឺឱ្យបិទទាំងអស់ ទាំងបិត និងលក់ស្រាស ព្រមទាំងមានទាំងកិច្ចសន្យាទៀត។
លោក លន សុខា មេឃុំស្វាយទងខាងត្បូង បានលើកឡើងដែរថា អ្នកស្លាប់ទាំង ៦ នាក់នេះមានប្រុស ២ នាក់ និងស្រី ៤ នាក់ ដែលមានអាយុចម្លោះពី ៣៣ ឆ្នាំ ទៅ ៦០ ឆ្នាំ ខណៈដែល ៣ នាក់ទៀត ដែលបានស្លាប់ដែរនោះ គឺពួកគាត់មានវ័យចាស់ជរា មិនបានពិសាស្រាទេ។
លោក លន សុខា ថ្លែងថា៖ «នៅកន្លែងពលរដ្ឋស្លាប់ហ្នឹង ជាតំបន់សង្កាត់មាត់ញក គេលក់ស្រាតាមតូបតូចៗ ហើយគាត់ទិញហូបជាលក្ខណៈគ្រួសារ នៅពេលគាត់មកពីលូកក្តាម និងធ្វើនេសាទ។ ម្យ៉ាងនៅក្នុងឃុំនេះអត់មានកន្លែងបិតស្រាទេ លើកមុន មាន ២ នាក់ ប៉ុន្តែឈប់បិតហើយ។ ប៉ុន្តែនៅពេលដែលអាជ្ញាធរចុះទៅពិនិត្យមើល ឃើញស្រានៅក្នុងប៊ីដុងតិចតួចប៉ុណ្ណោះ ហើយត្រូវបាននាំចូលមកពីតំបន់ផ្សេង»។
សេចក្ដីប្រកាសរបស់ក្រសួងសុខាភិបាលកាលពីថ្ងៃទី ៣ ខែ មិថុនា ឆ្នាំ ២០២១ បានបង្ហាញថា ក្នុងត្រីមាសទី១ ឆ្នាំ នេះមានពលរដ្ឋចំនួន ៣១ នាក់ ក្នុងខេត្តចំនួន ៣ រួមមាន ខេត្តកណ្ដាល កំពត និង ខេត្តពោធិ៍សាត់បានស្លាប់ដោយសង្ស័យបណ្ដាលមកពីការទទួលទានស្រាស និងស្រាថ្នាំ ដែលមានសារធាតុមេតាណុលខ្ពស់៕
វីដេអូ៖
