ភ្នំពេញៈ រដ្ឋមន្ដ្រីក្រសួងមហាផ្ទៃលោក ស ខេង បានណែនាំដល់គណៈបញ្ជាការឯកភាពរាជធានី-ខេត្ដ ឱ្យយកចិត្ដទុកដាក់គ្រប់គ្រងសភាពការណ៍ និងដោះស្រាយបញ្ហាជាប្រចាំជាមួយពលរដ្ឋនៅតាមមូលដ្ឋាន ខណៈនៅសល់ពេលវេលាតែ ១ ឆ្នាំទៀតនឹងឈានដល់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលឱកាសនេះក្រុមអ្នកនយោបាយនឹងប្រើប្រាស់បញ្ហា និងទំនាស់ផ្សេងៗ ទាញយកប្រជាប្រិយភាព ដើម្បីទទួលបានការគាំទ្រ ឬសំឡេងឆ្នោត។
លោក ស ខេង ថ្លែងបែបនេះក្នុងពេលធ្វើជាអធិបតីក្នុងពិធីប្រកាសចូលកាន់តំណែងរបស់លោក ស៊ុន សុវណ្ណារិទ្ធិ ជាអភិបាលនៃគណៈអភិបាលខេត្តកំពង់ឆ្នាំងជំនួសលោក ឈួរ ច័ន្ទឌឿន កាលពីថ្ងៃទី ១ ខែកក្កដា នៅខេត្ដកំពង់ឆ្នាំង។ លោកបានណែនាំដល់គណៈបញ្ជាការឯកភាពរាជធានី-ខេត្ដបន្តថែរក្សា និងពង្រឹងសន្តិភាព ស្ថិរភាពនយោបាយ សន្តិសុខ និងសណ្ដាប់ធ្នាប់សាធារណៈ ដើម្បីបង្កបរិយាកាសអំណោយផលដល់ការអភិវឌ្ឍប្រទេសជាតិលើគ្រប់វិស័យ។
លោក ស ខេង ដែលក៏ជាឧបនាយករដ្ឋមន្ត្រីផងនោះបញ្ជាក់ថា អាជ្ញាធរគ្រប់លំដាប់ថ្នាក់ត្រូវពង្រឹងការគ្រប់គ្រងសភាពការណ៍តាមមូលដ្ឋាន ដើម្បីដាក់ចេញវិធានការទប់ស្កាត់ឱ្យបានទាន់ពេលវេលានូវសកម្មភាពនៃការផ្សព្វផ្សាយព័ត៌មានមិនពិត និងភាពចលាចល។ ជាពិសេសសកម្មភាពប៉ុនប៉ងផ្ដួលរំលំរាជរដ្ឋាភិបាល។
លោកបានថ្លែងថា៖ «ត្រូវយកចិត្ដទុកដាក់គ្រប់គ្រងដោះស្រាយជម្លោះ និងការទាមទារតវ៉ានានាប្រកបដោយសន្តិវិធីផ្អែកលើគោលការណ៍ច្បាប់ និងត្រូវចៀសវាងដាច់ខាតនូវអំពើហិង្សាតាមគ្រប់រូបភាព»។
លោកឧបនាយករដ្ឋមន្ត្រីបញ្ជាក់ថា៖ «នៅសល់ ១ ឆ្នាំទៀតនឹងមានការបោះឆ្នោតជ្រើសរើសក្រុមប្រឹក្សាឃុំសង្កាត់។ អ៊ីចឹងហើយអ្នកនយោបាយទាំងឡាយគេតែងតែប្រើប្រាស់នូវបញ្ហានានាដែលជាបញ្ហាប្រឈម បញ្ហាអសកម្ម ឬអាចនិយាយថា ទំនាស់នានានៅក្នុងមូលដ្ឋាន ដើម្បីឆ្កឹះក្នុងបំណងទាញយកប្រជាប្រិយភាពបម្រើឱ្យគណបក្សរបស់ខ្លួនឈានទៅទទួលបានការគាំទ្រ ឬក៏សំឡេងឆ្នោតពីការបោះឆ្នោត»។
គណៈបញ្ជាការឯកភាពរាជធានី-ខេត្ដត្រូវយកចិត្ដទុកដាក់ អប់រំ ណែនាំ និងបកស្រាយបំភ្លឺជូនប្រជាពលរដ្ឋឱ្យបានទាន់ពេលវេលានូវការបំផុសបំផុល ផ្សព្វផ្សាយ ព័ត៌មានមិនពិត និងសកម្មភាពផ្សេងៗ ដែលមានចរិតអុជអាលបង្កឱ្យមានហិង្សាក្នុងសង្គម។ បំផុសអប់រំប្រជាពលរដ្ឋឱ្យចូលរួមគោរពច្បាប់ ចូលរួមការពារផលប្រយោជន៍សាធារណៈ ផលប្រយោជន៍សហគមន៍ និងត្រូវចៀសវាងការចូលរួមក្នុងសកម្មភាពទាំងឡាយណាដែលផ្ទុយពីច្បាប់ ក៏ដូចជាសកម្មភាពដែលប៉ះពាល់ដល់សន្តិភាព ស្ថិរភាពនយោបាយ។ នេះជាការណែនាំរបស់លោក ស ខេង។
លោកបានបញ្ជាក់ទៀតថា៖ «អាជ្ញធរយើង សមត្ថកិច្ចទាំងអស់របស់យើង គឺត្រូវតែយកចិត្ដទុកដាក់ពីឥឡូវទៅ ដើម្បីនឹងគ្រប់គ្រងសភាពការណ៍ ហើយដោះស្រាយបញ្ហាជាប់ជាប្រចាំមិនត្រូវមើលស្រាលនោះទេ»។
ជាងនេះទៀត លោកក៏បានណែនាំដល់គណៈបញ្ជាការឯកភាពរាជធានី-ខេត្ដ មិនត្រូវមានទស្សនៈខុសឆ្គងថា បញ្ហាដែលកើតឡើងនោះដោយសារពួកប្រឆាំង ឬដោយសារហេតុផលណាមួយនោះទេ។ ប៉ុន្ដែត្រូវមើលបញ្ហាឱ្យច្បាស់ និងស្គាល់ខ្លួនឯងឱ្យច្បាស់តើមានបញ្ហាមែន ឬអត់?។ ជាមួយគ្នានេះ លោកក៏បានលើកជាឧទាហរណ៍ ដូចជា ករណីទំនាស់ដីធ្លី ដែលមានការរំលោភបំពានទៅលើផលប្រយោជន៍ និងសិទ្ធិប្រជាពលរដ្ឋ បើមាននោះត្រូវទទួលស្គាល់ និងដោះស្រាយ។
ប្រធានវិទ្យាស្ថានប្រជាធិបតេយ្យកម្ពុជា និងជាអ្នកវិភាគនយោបាយ លោក ប៉ា ចន្ទរឿន សាទរចំពោះការដាស់តឿនក្រើនរំឭករបស់រដ្ឋមន្ដ្រីក្រសួងមហាផ្ទៃ លោក ស ខេង ទៅកាន់គណៈបញ្ជាការឯកភាពរាជធានី-ខេត្ដ ដើម្បីឱ្យមានការបំពេញតួនាទីប្រកបដោយវិជ្ជាជីវៈរបស់ខ្លួនទៅដល់ប្រជាពលរដ្ឋ។
លោក ចន្ទរឿន បានថ្លែងថា៖ «ប្រសាសន៍នេះគឺជារឿងល្អ ដែលតម្រូវឱ្យគណៈបញ្ជាការឯកភាពរាជធានី-ខេត្ដ មន្ដ្រីរាជការតាមបណ្ដាខេត្ដឱ្យគោរពតាមលក្ខន្តិកៈមន្ដ្រីរាជការស៊ីវិល ដែលបែងចែករវាងតួនាទីជាមន្ដ្រីគណបក្ស និងមន្ដ្រីបម្រើប្រជាពលរដ្ឋ»។
លោកបានលើកឡើងថា ការងារមន្ដ្រីរាជការក្នុងតួនាទីអភិបាលរាជធានី ខេត្ដ គឺបានអនុវត្ដការងារក្នុងនាមជាអ្នកបម្រើប្រជាពលរដ្ឋទូទៅ មិនមែនបម្រើតែសមាជិកគណបក្សណាមួយនោះទេ៕