.jpg)
មន្ត្រីចុះពិនិត្យអ្នកទោសក្នុងពន្ធនាគារខេត្តតាកែវ ពីថ្ងៃ ៣ កក្កដា។ រូបថត ប៉ូលិស
តាកែវៈ លោក នុត សវនា អ្នកនាំពាក្យអគ្គនាយកដ្ឋានពន្ធនាគារថ្លែងថា ទណ្ឌិតនៅក្នុងពន្ធនាគារខេត្តតាកែវចំនួន ៥ នាក់មានវិជ្ជមានកូវីដ ១៩ ដោយបច្ចុប្បន្ននេះក្រុមមន្ត្រីកំពុងតែបន្តស្រាវជ្រាវស្វែងរកប្រភពចម្លង និងស្រាវជ្រាវរកអ្នកពាក់ព័ន្ធផ្ទាល់ និងប្រយោលផងដែរ តែមន្ត្រីខេត្តរំពឹងថា នឹងអាចគ្រប់គ្រងបាន។
លោក នុត សវនា បានប្រាប់ភ្នំពេញប៉ុស្តិ៍កាលពីម្សិលមិញថា៖ «ចំពោះអ្នកវិជ្ជមានត្រូវបានដាក់ឱ្យព្យាបាលនៅនឹងកន្លែង ព្រោះយើងមានបន្ទប់សម្រាប់ទុកដាក់អ្នកដែលមានមេរោគ ប៉ុន្តែប្រសិនបើគាត់មានអាការធ្ងន់ធ្ងរ យើងនឹងយកគាត់ទៅព្យាបាលនៅខាងក្រៅ»។
ជាមួយគ្នានេះដែរ លោក នុត ស៊ីណាត ប្រធានមន្ទីរពេទ្យខេត្តតាកែវក៏បានប្រាប់ភ្នំពេញប៉ុស្តិ៍កាលពីម្សិលមិញដែរថា ទណ្ឌិតដែលមានវិជ្ជមានកូវីដ ១៩ ក្នុងពន្ធនាគារខេត្តតាកែវត្រូវបានក្រុមគ្រូពេទ្យរកឃើញក្នុងចំណោមទណ្ឌិតចំនួន ១៣៥ នាក់ និងបុគ្គលិក (ឆ្មាំគុក) ចំនួន ១៥ នាក់ត្រូវបានយកសំណាកធ្វើតេស្តរកជំងឺកូវីដ ១៩។
លោកបានប្រាប់ថា៖ «ស្ថានភាពនៃជំងឺកូវីដ ១៩ ក្នុងខេត្តតាកែវ នៅតែបន្តកើនឡើងជារៀងរាល់ថ្ងៃ និងនៅគ្រប់ទីកន្លែង»។
លោក នុត ស៊ីណា បន្តថា អ្នកទាំងនេះត្រូវបានសង្ស័យថាអាចឆ្លងមកពីសាច់ញាតិដែលចូលសួរសុខទុក្ខ ខណៈខេត្តកំពុងរីករាលដាលនូវជំងឺកូវីដ ១៩ នេះ។
លោកបញ្ជាក់ថា៖ «អារឿងកូវីដឥឡូវវានៅគ្រប់ទីកន្លែង ប៉ុន្តែយើងនៅតែមានវិធានការការពារ និងធ្វើទាន់សភាពការណ៍»។
បើតាមលោក នុត ស៊ីណា គិតមកទល់ពេលនេះខេត្តតាកែវមានអ្នកវិជ្ជមានចំនួន ២ ៧០០ នាក់ និងមានអ្នកស្លាប់ ៤៦ នាក់ព្រមទាំងមានអ្នកជាសះស្បើយជាច្រើនរយនាក់ផងដែរ។
ចំណែកលោក មាស អ៊ុយ អ្នកនាំពាក្យរដ្ឋបាលខេត្តតាកែវបានថ្លែងថា ស្ថានភាពនៃការរីករាលដាលនៃជំងឺកូវីដក្នុងខេត្តនៅតែបន្តកើនឡើង ហើយកាលពីពេលកន្លងមកនេះ មានភូមិមួយចំនួនត្រូវបានបិទជាបណ្តោះអាសន្ន បន្ទាប់ពីរកឃើញអ្នកមានវិជ្ជមានជាបន្តបន្ទាប់។ ជាមួយគ្នានេះក៏មានករណីឆ្លងចូលដល់ពន្ធនាគារខេត្តទៀតដោយក្នុងនោះ ក៏មានទណ្ឌិតមួយចំនួនមានវិជ្ជមានផងដែរ។
លោកបានបន្តថា ទាំងក្រុមគ្រូពេទ្យក៏ដូចជាខាងអាជ្ញាធរបាន និងកំពុងខិតខំទាំងអស់គ្នាក្នុងការទប់ស្កាត់ការរីករាលដាលបន្តទៀត។ សម្រាប់ខេត្តតាកែវមកទល់ពេលនេះមានអ្នកឆ្លងរាប់ពាន់នាក់ និងអាចឈរនៅលេខរៀងទី២ បើធៀបទៅនឹងខេត្តមួយចំនួនរបស់កម្ពុជា។
លោក មាស អ៊ុយ ថ្លែងថា៖ «សម្រាប់ទណ្ឌិតនៅក្នុងពន្ធនាគារក៏ខាងខេត្តមានការយកចិត្តទុកដាក់ និងប្រុងប្រយ័ត្នខ្ពស់ផងដែរ។ ទោះជាយ៉ាងណាសម្រាប់ខេត្តតាកែវបានឆ្លងកាត់ករណីឆ្លងធំៗនៅក្នុងរោងចក្រយើងគ្រប់គ្រងបាន។ ចំពោះនៅក្នុងពន្ធនាគារនេះក៏យើងនឹងអាចគ្រប់គ្រងបានដែរ»។
បើតាម លោក នុត សវនាទណ្ឌិតនៅក្នុងប្រទេសកម្ពុជាបានមានវិជ្ជមានកូវីដ ១៩ ជាច្រើនរូប ប៉ុន្តែក៏បានព្យាបាលជាច្រើនផងដែរ។ ដោយឡែកទណ្ឌិតដែលកំពុងស្នាក់នៅក្នុងពន្ធនាគារខេត្តតាកែវបច្ចុប្បន្ននេះមាន ១ ០៧០ នាក់៕
