.jpg)
ជនរងគ្រោះដែលស្លាប់ដោយសង្ស័យមកពីពុលស្រានៅខេត្តកណ្ដាល កាលពីថ្ងៃទី ៤ កក្កដា ។ រូបថត ហ្វេសប៊ុក
កំពត/កណ្តាលៈ ប្រជាពលរដ្ឋដែលបានស្លាប់ដោយសង្ស័យមកពីពុលស្រានៅភូមិកោះឈ្វាំង ឃុំស្វាយទងខាងត្បូង ស្រុកកំពង់ត្រាច ខេត្តកំពត បានកើនដល់ ១២ នាក់ ខណៈប្រជាពលរដ្ឋចំនួន ៣ នាក់ ដែលរស់ភូមិកោះចូរាម ឃុំកោះចូលរាម ស្រុកខ្សាច់កណ្ដាល ខេត្តកណ្ដាលត្រូវបានសង្ស័យពុលស្រាស្លាប់ផងដែរ។
លោក លន សុខា មេឃុំស្វាយទងខាងត្បូង ប្រាប់ ភ្នំពេញ ប៉ុស្តិ៍ នៅថ្ងៃទី ៥ ខែ កក្កដា ឆ្នាំ ២០២១ នេះថា ព្រឹកនេះ លោកទទួលបានដំណឹងថាមានពលរដ្ឋចំនួន៣នាក់ទៀតបានស្លាប់ ដោយសារពុលស្រា ដែលកើនដល់ ១២ នាក់ ខណៈលោកកំពុងឱ្យក្រុមការងារធ្វើកំណត់ហេតុ។
លោកមេឃុំបានថ្លែងថា៖ «មាន ៣ នាក់ទៀតស្លាប់យើងកំពុងធ្វើកំណត់ហេតុ ប៉ុន្តែឥឡូវនេះ មិនទាន់ចប់នៅឡើយទេ»។
ដោយឡែកលោក ក្រាយ សាវឿន មេប៉ុស្តិ៍ឃុំកោះចូលរាមបានឱ្យដឹងដែរថា ពលរដ្ឋចំនួន ៣ នាក់ ដែលរស់ក្នុងភូមិកោះចូរាម ឃុំកោះចូលរាម ស្រុកខ្សាច់កណ្ដាល ខេត្តកណ្ដាលបានស្លាប់ កាលពីថ្ងៃទី ៤ ខែកក្កដា ដោយសង្ស័យពុលស្រា ហើយបាននិងកំពុងពិនិត្យសំណាក។
លោកបានបន្តថា ជនរងគ្រោះទាំង ៣ នាក់នេះ បានហូបស្រានៅយប់ថ្ងៃទី ៣ ខែកក្កដា ដោយពួកគាត់ត្រូវបានអះអាងថា ជាអ្នកពិសាស្រាជាអចិន្ត្រៃយ៍។
លោកបានបញ្ជាក់ថា៖ «ខ្ញុំកំពុងធ្វើដំណើរជាមួយមន្ត្រីជំនាញ ដើម្បីទៅពិនិត្យមើលស្រាមិនទាន់ដឹងថា យ៉ាងម៉េចទេ»៕
