.jpg)
ជនជាតិចិនដែលជាម្ចាស់សត្វតោ បង្ហាញក្តីស្រឡាញ់សត្វចិញ្ចឹមរបស់ខ្លួន នៅពេលទៅមើលសត្វតោនេះ នៅសួនសត្វភ្នំតាម៉ៅ ក្នុងខែនេះ។ រូបថត ហ្វេសប៊ុក
ភ្នំពេញៈ សត្វតោឈ្មោល ១ ក្បាល អាយុជាង ១ ឆ្នាំ ដែលទើបត្រូវបានដកហូតពីជនជាតិចិន រយៈពេលប៉ុន្មានថ្ងៃមុននេះ ត្រូវបានប្រគល់ឲ្យម្ចាស់ចិញ្ចឹមវិញនៅថ្ងៃនេះ បន្ទាប់ពីមានការសម្រេចអនុញ្ញាតពីលោកនាយករដ្ឋមន្ត្រី ហ៊ុន សែន ដោយឱ្យម្ចាស់យកទៅចិញ្ចឹមក្នុងលក្ខខណ្ឌពិសេស ដើម្បីធានាសុវត្ថិភាពដល់មនុស្ស។
លោកនាយករដ្ឋមន្ត្រី ហ៊ុន សែន បានសរសេរនៅលើហ្វេសប៊ុក របស់លោកកាលពីយប់ថ្ងៃទី ៤ កក្តដាថា៖ «ក្រោយក្តាប់បានរឿងសត្វតោ ល្ងាចនេះ[ថ្ងៃទី៤] ខ្ញុំបានពិភាក្សាជាមួយរដ្ឋមន្ត្រីក្រសួងកសិកម្ម និងបានឯកភាពគ្នាថា អនុញ្ញាតឱ្យម្ចាស់យកទៅចិញ្ចឹមវិញក្នុងលក្ខខណ្ឌម្ចាស់ត្រូវធ្វើទ្រុងឱ្យបានត្រឹមត្រូវ ដើម្បីធានាសុវត្ថិភាពទាំងមនុស្សក្នុងផ្ទះ និងអ្នករស់នៅជិតខាង»។
ជាមួយនឹងការសម្រេច និងអនុញ្ញាតបែបនេះ លោកនាយករដ្ឋមន្ត្រី ក៏បានសម្តែងការអរគុណដល់បងប្អូនជនរួមជាតិទាំងក្នុងនិងក្រៅប្រទេសដែលបានផ្តល់យោបល់ និងអាណិតដល់សត្វតោ ១ ក្បាលនេះ។
លោក ញឹក រតនពេជ្រ ប្រធានមជ្ឈមណ្ឌលសួនសត្វភ្នំតាម៉ៅ បានប្រាប់ ភ្នំពេញ ប៉ុស្តិ៍ នៅព្រឹកនេះថា បន្ទាប់ពីមានបញ្ជាពីលោកនាយករដ្ឋមន្ត្រី ហ៊ុន សែន សត្វតោឈ្មោលនេះ ត្រូវប្រគល់ជូនម្ចាស់វិញ នៅថ្ងៃទី ៥ កក្កដានេះ ដោយម្ចាស់តោ ត្រូវមកទទួលវាដល់មជ្ឈមណ្ឌលសួនសត្វភ្នំតាម៉ៅ។
លោកបានបញ្ជាក់ថា៖ «គេត្រូវមកទទួលវាថ្ងៃនេះហើយ វាមានសុខភាពល្អទេ។ ម្ចាស់ដើមនឹងមកទទួលយកទៅថែរក្សាវិញ ដោយមានលក្ខខណ្ឌផ្សេងៗ ដើម្បីអាចបន្ត[ចិញ្ចឹម]វានៅផ្ទះបាន»។
កាលពីថ្ងៃទី ២៧ ខែ មិថុនា ឆ្នាំ ២០២១ អាជ្ញាធរចម្រុះរាជធានីភ្នំពេញសហការជាមួយអង្គការ Wildlife Alliance បានរឹបអូសសត្វតោចិញ្ចឹម ១ ក្បាល នៅក្នុងផ្ទះវីឡា ១ កន្លែង ស្ថិតនៅផ្ទះលេខ២២ ផ្លូវ ៣០៦ ភូមិ ៧ សង្កាត់បឹងកេងកង ១ រាជធានីភ្នំពេញ។
សត្វតោនោះមានអាយុ ១៨ ខែ និងទម្ងន់ ៧០ គីឡូក្រាម ហើយក្រោយការដកហូត ក្រុមជួយសង្គ្រោះបានបញ្ជូនសត្វតោនេះទៅកាន់មជ្ឈមណ្ឌលសង្គ្រោះសត្វព្រៃភ្នំតាម៉ៅ៕
វីដេអូ៖
