ភ្នំពេញៈ នគរបាលស្រុកបសេដ្ឋបញ្ជូនជនសង្ស័យ ២ នាក់ ទៅសាលាដំបូងខេត្តកំពង់ស្ពឺនៅថ្ងៃទី ៥ កក្កដា ក្រោយពីចាប់ខ្លួនបាន ៣ ថ្ងៃ នៅភូមិព្រៃពាយ ឃុំអំពិល ស្រុកបសេដ្ឋ ខេត្តកំពង់ស្ពឺ ពាក់ព័ន្ធជួញដូរគ្រឿងញៀនមេតំហ្វេតាមីនជាង ១០០ ក្រាម។
លោក អ៊ុំ ចំរើន អធិការនគរបាលស្រុកបសេដ្ឋបានឱ្យ ភ្នំពេញ ប៉ុស្តិ៍ ដឹងនៅថ្ងៃទី ៤ ខែកក្កដាថា បុរសសង្ស័យឈ្មោះ សាយ ហួត អាយុ ៣៧ ឆ្នាំ រស់នៅភូមិត្រពាំងខ្យង ឃុំទួលអំពិល ស្រុកបសេដ្ឋ និងឈ្មោះ ហោ គា អាយុ ៣៤ ឆ្នាំ នៅភូមិត្រពាំងប្រិយ៍ ឃុំសឹង្គ ស្រុកសំរោង ខេត្តតាកែវ ដែលសមត្ថកិច្ចកំពុងបន្តនីតិវិធីដើម្បីធ្វើកំណត់ហេតុបញ្ជូនសំណុំរឿងទៅសាលាដំបូងខេត្តកំពង់ស្ពឺនៅថ្ងៃទី ៥ កក្កដា។
លោកថ្លែងថា៖ «ករណីជនសង្ស័យ ២ នាក់នេះ ខាងគ្រូពេទ្យបានធ្វើតេស្តរកមេរោគកូវីដ ១៩ អត់ឃើញទេ។ ពាក់ព័ន្ធនឹងចំណាត់ការខាងតុលាការវិញក៏យើងបានរៀបចំឯកសាររួចរាល់តាមនីតិវិធីច្បាប់ហើយដែរ»។
លោក ចំរើន បញ្ជាក់ថា កាលពីវេលាម៉ោងជាង ៩ យប់ថ្ងៃទី ២ កក្កដា កម្លាំងនគរបាលប៉ុស្តិ៍ឃុំ អំពិលបានជិះម៉ូតូដើរល្បាតនៅក្នុងមូលដ្ឋានឃុំអំពិល។ នៅពេលកម្លាំងសមត្ថកិច្ចកំពុងដើរល្បាតនោះក៏បានឃើញជនសង្ស័យ ២ នាក់កំពុងធ្វើសកម្មភាពចែកចាយគ្រឿងញៀនជាក់ស្តែងស្ថិតនៅចំណុចក្នុងភូមិព្រៃពាយ ឃុំទួលអំពិល ស្រុកបសេដ្ឋ។
ខណៈនោះដោយសារក្រុមជនសង្ស័យដឹងខ្លួនហើយព្យាយាមរត់គេចខ្លួនតែក៏ត្រូវសមត្ថកិច្ចព័ទ្ធចាប់បានតែម្តង។ ចំពោះវត្ថុតាងដែលសមត្ថកិច្ចដកហូតបានរួមមានម្សៅក្រាមពណ៌សថ្លាដែលជាគ្រឿងញៀនមានចំនួន ៣ កញ្ចប់ តូចធំ ម៉ូតូ ១ គ្រឿង និងកាំភ្លើងខ្លី K-54 ១ ដើម និងបង់ ១ មានគ្រាប់ចំនួន ១១ គ្រាប់។
ជាមួយគ្នានេះដែរនគរបាលជំនាញផ្នែកគ្រឿងញៀនខេត្តកំពង់ស្ពឺបានធ្វើតេស្តលើម្សៅក្រាមពណ៌សថ្លានោះបង្ហាញថាជាប្រភេទគ្រឿងញៀនមេតំហ្វេតាមីនមានទម្ងន់ជាង ២ ខាំស្មើនឹងជាង ១០០ ក្រាម។
ករណីដោយឡែកទៀត នគរបាលបានចាប់ខ្លួនបុរស ២ នាក់ត្រួតពិនិត្យចរាចរណ៍តាមគោលដៅក្នុងក្រុងប៉ោយប៉ែតកាលពីថ្ងៃទី ២ ខែកក្កដា នៅចំណុចអូរព្រំដែនស្ថិតនៅភូមិក្បាលស្ពាន ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ពាក់ព័ន្ធជួញដូរគ្រឿងញៀន។
សមត្ថកិច្ចបានឆែកក្នុងកែបម៉ូតូ រកឃើញម្សៅក្រាមសថ្លាចំនួន ៧ ថង់តូច ថ្នាំគ្រាប់ពណ៌ក្រហម WY ចំនួន ១២ គ្រាប់ កាំបិតប៉័ងតោ ១ ទូរស័ព្ទដៃ ២ គ្រឿង។ ជនសង្ស័យឈ្មោះ ផល សុផាត ភេទប្រុស អាយុ ១៨ ឆ្នាំជាជនជាតិខ្មែរ និងឈ្មោះ អាធីត សំថង់ ភេទប្រុស អាយុ ៣១ ឆ្នាំ ជនជាតិថៃ៕