.jpg)
ព្យុះភ្លៀងបោកបក់ខ្លាំង ធ្វើឱ្យមានរលកសមុទ្រធំៗ នៅឆ្នេរសមុទ្រខេត្តព្រះសីហនុ កាលពីខែសីហា ឆ្នាំ ២០២០។ ហ៊ាន រង្សី
ភ្នំពេញៈ ក្រសួងធនធានទឹក និងឧតុនិយម នៅថ្ងៃទី ៥ ខែ កក្កដា ឆ្នាំ ២០២១ បានចេញសេចក្ដីជូនដំណឹង ប្រាប់ប្រជាពលរដ្ឋឱ្យមានការប្រុងប្រយ័ត្ន ចំពោះភ្លៀង និងខ្យល់កន្ត្រាក់បក់បោកខ្លាំង ដែលនឹងកើតមានជាបន្តបន្ទាប់ ក្នុងរយៈពេល ៤ ថ្ងៃជាប់គ្នា នៅក្នុងតំបន់វាលទំនាប ជាប់បឹងទន្លេសាប និងក្នុងតំបន់ឆ្នេរ។
តាមរយៈសេចក្ដីជូនដំណឹងនោះ អ្នកនេសាទ និងអ្នកនិយមធ្វើដំណើរកម្សាន្តតាមសមុទ្រ គប្បីបង្កើនការប្រុងប្រយ័ត្ន ហើយបើមិនចាំបាច់ក្នុង ៤ ថ្ងៃនេះ គឺចាប់ពីថ្ងៃទី ៥ ដល់ថ្ងៃទី ៨ ខែកក្កដាគួរកុំចរាចរណ៍ទូក ឬនាវាចេញពីផែ ឬច្រាំង ព្រោះវាអាចនឹងប្រឈមគ្រោះថ្នាក់កើតឡើងជាយថាហេតុ។
នៅពេលនេះ ប្រទេសកម្ពុជា កំពុងទទួលរងនូវឥទ្ធិពលកូនព្យុះមួយ ឈ្មោះ IN-FA ដែលកូនព្យុះនេះ បានវិវត្តន៍ពីសម្ពាធទាបមួយ ដែលបានកើតឡើងនៅក្នុងសមុទ្រចិនភាគខាងលិច នៃប្រទេសហ្វីលីពីន កាលពីថ្ងៃចន្ទសប្ដាហ៍មុន។
តាមរយៈការតាមដានអំពីដំណើវិវត្តន៍របស់កូនព្យុះនេះ ក្រសួងធនធានទឹកនិងឧតុនិយមបានព្យការណ៍ថា៖ «បណ្តាខេត្តនៅតំបន់វាលទំនាបជាប់ជុំវិញបឹងទន្លេសាប និងតំបន់មាត់សមុទ្រ មានភ្លៀងធ្លាក់ច្រើន និងមានខ្យល់កន្ត្រាក់ក្នុងកម្រិតបង្គួរ។ ចំណែកស្ថានភាពទឹកទន្លេមេគង្គ ក៏នឹងចាប់ផ្តើមឡើងវិញជាបន្តបន្ទាប់ផងដែរ ដោយសារមានភ្លៀងធ្លាក់ខ្លាំងនៅក្នុងតំបន់ផ្នែកខាងលើនៃផ្ទៃរងទឹកភ្លៀងអាងទន្លេមេគង្គ»។
លោក ហេង រ័ត្នម៉ូនីដា ប្រធានមន្ទីរធនធានទឹកនិង ឧតុនិយមខេត្តក្រចេះ បានប្រាប់ ភ្នំពេញ ប៉ុស្តិ៍ថា នៅពេលនេះកម្ពស់ទឹកទន្លេមេគង្គក្នុងខេត្តក្រចេះបានឡើងបន្តិចវិញ គឺក្នុងកម្រិតកម្ពស់ ៩,៩២ ម៉ែត្រ ខ្ពស់ជាងថ្ងៃទី ៤ ខែ កក្កដា ០,៤៥ ម៉េត្រ ដែលការស្ទុះងើបឡើងវិញនេះ បណ្ដាលមកពីមានធ្លាក់ភ្លៀងនៅផ្នែកខាងលើផ្ទៃអាងទន្លេមេគង្គ។
លោ កា រ័ត្នម៉ូនីដា បានបញ្ជាក់ថា៖«ទោះយ៉ាងណាការហក់ឡើងនៃកម្ពស់ទឹកទន្លេមេគង្គនៅពេលនេះ មិនទាន់បង្កឲ្យមានក្ដីព្រួយបារម្ភឡើយ។ ប៉ុន្តែវាជាសញ្ញាល្អសម្រាប់ប្រជាកសិករ ក្នុងការដាំដុះផលដំណាំនានា ពិសេសដំណាំស្រូវ និងបន្លែរួមផ្សំ សម្រាប់ផ្គត់ផ្គង់ជីវភាពគ្រួសារ ក្នុងគ្រាកំពុងជួបប្រឈមទៅនឹងវិបត្តិនៃជំងឺរាតត្បាតកូវីដ ១៩ ជាសកល»។
ស្រដៀងគ្នានេះ លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់និងនេសាទខេត្តបាត់ដំបង បានប្រាប់ ភ្នំពេញ ប៉ុស្តិ៍ថា ដោយសាររបាយទឹកភ្លៀងធ្លាក់មិនគ្រាប់គ្រាន់កាលពីដើមរដូវវស្សា បានធ្វើឲ្យដំណាំស្រូវរបស់ប្រជាកសិករមួយចំនួននៅក្នុងស្រុកបរវេល និងស្រុកសង្កែ មានការលូតលាស់មិនសូវល្អ ព្រោះតែខ្វះទឹកស្រោចស្រព។
ទោះយ៉ាងណា ក្រោយទទួលបានសេចក្ដីជូនដំណឹងបន្ថែមអំពីស្ថានភាពអាកាសធាតុរបស់ក្រសួងធនធានទឹក និង ឧតុនិយម ដែលបានអះអាងថា នឹងមានភ្លៀងធ្លាក់ច្រើនជាបន្តបន្ទាប់ក្នុងរយៈពេល ៤ ថ្ងៃជាប់គ្នា ដោយចាប់ផ្ដើមពីថ្ងៃទី ៥ ដល់ថ្ងៃទី ៨ ខែកក្កដានោះ លោ កវជិរា លោកបានថ្លែងប្រកបដោយសុទិដ្ឋិនិយមថា៖ «ដំណាំស្រូវដែលកំពុងរងផលប៉ះពាល់ដោយសារបញ្ហាខ្វះទឹកនោះនឹងលូតលាស់ល្អឡើងវិញ ហើយកសិករនិងសប្បាយចិត្ត»។
បើតាមលោក វជិរា មកទល់ពេលនេះ ការបង្កបង្កើនផលស្រូវរដូវវស្សារបស់ប្រជាកសិករនៅទូទាំងខេត្តបាត់ដំបងនៅក្នុងឆ្នាំនេះ សម្រេចបាន ១៩៨,៥៤៣ ហិកតា ស្មើនឹងជាង ៦១ ភាគរយនៃផែនការដាំដុះសរុប ៣២៣,២០០ ហិកតា។
ប៉ុន្តេនៅពេលលើកឡើងពីបញ្ហាខ្យល់កន្ត្រាក់ លោក វជិរា បានទទួលស្គាល់ថា «វានៅតែជាហានិភ័យ» សម្រាប់ប្រជាកសិករនៅតាមតំបន់ទីដាច់ស្រយ៉ាល ដែលមានលំនៅឋានតូចៗមិនរឹងមាំ។
លោកបានបន្តថា កាលពីថ្ងៃទី ៤ ខែកក្កដា កន្លងទៅថ្មីៗនេះ ផ្ទះប្រជាពលរដ្ឋជិត ៦០ ខ្នង ក្នុងស្រុករុក្ខគិរី បានរងការខូចខាតប៉ើងរបើកដំបូលដោយសារខ្យល់កន្ត្រាក់ ប៉ុន្តែមិនបង្កគ្រោះថ្នាក់ដល់មនុស្ស សត្វនៅទេ។
ជុំវិញករណីខ្យល់កន្ត្រាក់នេះ លោក ហេង សុភណ្ឌរិទ្ធ ប្រធានមន្ទីរធនធានទឹកនិងឧតុនិយម ខេត្តព្រះសីហនុបានថ្លែងថា នៅពេលនេះ ស្ថានភាពអាកាសធាតុក្នុងខេត្តព្រះសីហនុ មិនមានភាពប្រែប្រួលគួរឲ្យកត់សំគាល់នៅឡើយទេ ប៉ុន្តែក្រុមមន្ត្រីជំនាញកំពុងពិនិត្យអង្កេតអំពីស្ថានវិវត្តន៍នៃអាកាសធាតុ។
លោកបានថ្លែងថា៖ «យោងតាមការព្យាការណ៍របស់ក្រសួង ខ្យល់កន្ត្រាក់ និងរលកសមុទ្រអាចប្រែប្រួល និងកើតមានក្នុងអំឡុងពេលណាមួយក្នុងរយៈពេល ៤ ថ្ងៃជាបន្តបន្ទាប់នេះ។ ដូច្នេះក្នុងករណីពិនិត្យឃើញថា មានកូនព្យុះមកដល់ពេលណា យើងនឹងផ្ដល់ព័ត៌មានបន្ទាន់ទៅរដ្ឋបាលខេត្ត ដើម្បីចេញវិធានការ ផ្អាកចរាចរណ៍ទូកឬនាវាតាមសមុទ្រជាបណ្ដោះអាសន្ន ដើម្បីបង្កាគ្រោះថ្នាក់កើតឡើងជាយថាហេតុ »៕
វីដេអូ៖
