The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ស៊ីម៉ាក់៖ មាន​គ្រាប់បែក​ចង្កោម​ពី​ ២៦ ​ទៅ​ ៣០ ​លាន​គ្រាប់ ​ត្រូវបាន​យកមកប្រើ​ក្នុង​សង្គ្រាម​នៅ​កម្ពុជា

មន្ត្រី​ស៊ីម៉ាក់៖ មាន​គ្រាប់បែក​ចង្កោម​ពី​ ២៦ ​ទៅ​ ៣០ ​លាន​គ្រាប់ ​ត្រូវបាន​យកមកប្រើ​ក្នុង​សង្គ្រាម​នៅ​កម្ពុជា

Content image - Phnom Penh Post
មន្ត្រី​ស៊ីម៉ាក់​បង្ហាញ​គ្រាប់បែក​ចង្កោម​ដែលជា​សំណល់​យុទ្ធភណ្ឌ​ពី​សង្គ្រាម​មួយ​ប្រភេទ​នៅ​កម្ពុជា​។ រូបថត ហ្វេសប៊ុក Heng Ratana

មន្ត្រី​ស៊ីម៉ាក់៖ មាន​គ្រាប់បែក​ចង្កោម​ពី​ ២៦ ​ទៅ​ ៣០ ​លាន​គ្រាប់ ​ត្រូវបាន​យកមកប្រើ​ក្នុង​សង្គ្រាម​នៅ​កម្ពុជា

ភ្នំពេញៈ មន្ត្រី​មជ្ឈមណ្ឌល​សកម្មភាព​កំចាត់មីន​កម្ពុជា​ (​ស៊ីម៉ាក់​ ឬ​ CMAC) ​រកឃើញ​ចំនួន​តួលេខ​នៃ​កូន​គ្រាប់បែក​ចង្កោម​មាន​ចន្លោះ​ពី​ ២៦ ​លាន​ទៅ​ ៣០ ​លាន​​គ្រាប់​ត្រូវ​បាន​ប្រើប្រាស់​លើ​ទឹកដី​កម្ពុជា​នៅ​សម័យ​សង្គ្រាម​។

ដោយឡែក​នៅក្នុង​រយៈពេល​ ៦ ​ខែ ឆ្នាំ​ ២០២១ នេះ CMAC ​បាន​ស្រាវជ្រាវ​រកឃើញ​គ្រាប់បែក​ចង្កោម​ជិត​ ២ ​ពាន់​គ្រាប់​លើ​ផ្ទៃដី​ចម្ការ​គ្រាប់​ប្រមាណ​ជាង​ ១៤ គីឡូម៉ែត្រ​ការ៉េ​។

លោក​ ហេង រតនា ​អគ្គនាយក​ CMAC ​បាន​ឱ្យដឹងថា ក្នុង​រយៈពេល​ ៦ ​ខែ ឆ្នាំ​ ២០២១ នេះ CMAC បាន​ស្រាវជ្រាវ​លើ​ផ្ទៃដី​ចម្ការ​គ្រាប់​ប្រមាណ​ជាង​ ១៤ ​គីឡូម៉ែត្រ​​ការ៉េ ហើយ​បាន​រកឃើញ​គ្រាប់បែក​ចង្កោម​ជិត​ ២ ​ពាន់​គ្រាប់​យកទៅ​បន្សាប និង​កម្ទេចចោល​។

លោក​ថ្លែងថា​៖ «​គ្រាប់​ណា​ដែល​វា​មាន​ស្ថានភាព​មិន​សុវត្ថិភាព​យើង​កម្ទេច​ហើយ​គ្រាប់​ណា​ដែល​យើង​បន្សាប​បាន​គឺ​យើង​បន្សាប​។ ​ការបន្សាប​ទី​ ១ អាចជួយ​ក្នុង​ការកាត់បន្ថយ​បញ្ហា​បរិស្ថាន និង​មួយទៀត​យើង​ចង់បាន​គ្រាប់​ទាំងអស់​នោះ​យកមក​ទុក​ហ្វឹកហ្វឺន​ និង​ដាក់​នៅ​សារមន្ទីរ​»​។

បើតាម​លោក​ ហេង រតនា ការស្រាវជ្រាវ និង​សម្អាត​គ្រាប់បែក​ចង្កោម CMAC ទទួលបាន​​ការឧបត្ថម្ភ​ជំនួយ​ថវិកា​មកពី​ប្រភព​សំខាន់ៗ​ចំនួន​ ២ ​គឺ​ទី​១ ​អង្គការ​ NPA ​ដែល​ទទួល​ជំនួយ​ពី​សហរដ្ឋអាមេរិក​មាន​ថវិកា​ចំនួន​ ១ ​លាន​ ៦ ​សែន​ដុល្លារ​ និង​ទី​២ ​គឺ​គម្រោង​ជំនួយ​របស់​រដ្ឋាភិបាល​ចិន​មាន​ ២ ​លាន ៥ ​សែន​​ដុល្លារ​ សម្រាប់​រយៈពេល​ ១ ​ឆ្នាំ​ ​ដោយ​គម្រោង​ទាំងនេះ​ទទួលបាន​រយៈពេល​ ៣ ​ឆ្នាំ ចាប់​តាំងពី​ខែ​មករា ឆ្នាំ​ ២០២០ មក​។

លោក​អគ្គនាយក​ស៊ីម៉ាក់ បញ្ជាក់​​ថា គ្រាប់បែក​ចង្កោម​ជា​សំណល់​យុទ្ធភណ្ឌ​ពី​សង្គ្រាម​មួយ​ប្រភេទ​នៅ​កម្ពុជា​។ បរិមាណ​កូន​​គ្រាប់បែក​ចង្កោម​តិច ឬ​ច្រើន​ដែល​ទម្លាក់​នៅ​ទីតាំង​នីមួយៗ​គឺ​ទៅតាម​ប្រភេទ​មេ​គ្រាប់បែក​ដែល​ដឹក​តាម​ប្រភេទ​យន្តហោះ​ទម្លាក់​គ្រាប់បែក​នានា​ដែល​អាចមាន​ចំនួន​ពី​ជាង​ ៤០០ ​កូន​គ្រាប់បែក​ចង្កោម​ទៅជិត​ ៧០០ ​គ្រាប់​ក្នុង​គ្រាប់បែក​ធំ​មួយ​។

Content image - Phnom Penh Post
មន្ត្រី​ស៊ីម៉ាក់​ពិនិត្យ​បំពង់​គ្រាប់បែក​ចង្កោម​ពីថ្ងៃ​ទី​ ៤ កក្កដា ឆ្នាំនេះ​។ រូបថត CMAC

លោក​ថ្លែងថា​៖ «​ប្រសិទ្ធភាព​​ផ្ទុះ​នៃ​កូន​គ្រាប់បែក​ចង្កោម​មួយ​គ្រាប់​អាច​កម្ទេច​សត្រូវ​នៅលើ​ផ្ទៃដី​ទំហំ ២០ ​មx២០ម ឬ ១២០ មx២៤០ ​ម ដោយ​អាស្រ័យ​លើកកម្ពស់​ទម្លាក់ និង​កម្រិត​ស្ថានភាព​ផ្ទុះ​របស់​កូន​គ្រាប់បែក​ចង្កោម​នីមួយៗ​។ ​នៅ​ចំពោះមុខ​នេះ បើ​យោងតាម​ឯកសារ​នានា​យើង​ដឹងថា ចំនួន​តួលេខ​នៃ​កូន​គ្រាប់បែក​ចង្កោម​នេះ​ពី​ ២៦ ​លាន​ទៅ​ ៣០ ​លាន​ត្រូវ​​បាន​ប្រើប្រាស់​លើទឹក​ដី​នៃ​ព្រះរាជាណាចក្រ​ដ៏តូច​មួយ​នេះ​» ។

លោក រតនា បញ្ជាក់​បន្ថែមថា បើតាម​បទពិសោធ​របស់ CMAC អាច​វាយតម្លៃ​បាន​ថា ប្រហែល​ ១ ​ភាគ​ ៤ ​នៃ​កូនគ្រាប់ បែក​ចង្កោម​ទាំងនេះ​ទម្លាក់​មក​មិនទាន់​ផ្ទុះ​នោះទេ​។ បើ​ផ្អែក​​តាម​ការកំណត់​ពី​រោងចក្រ​ផលិត​គ្រាប់បែក​នេះ​គឺ​កម្រិត​កំហុស​មិន​ផ្ទុះ មាន​ចំនួន​ប្រមាណ​ ៥ ​ភាគរយ​។

លោក​ថ្លែងថា​៖ «​ការកំណត់​កម្រិត​កំហុស​មិន​ផ្ទុះ​នៃ​កូន​​គ្រាប់បែក​ចង្កោម​របស់​អ្នក​ផលិត​ និង​អ្នក​ប្រើ​មិន​ដូចគ្នា​ទេ ហើយ​​អ្នក​វេទនា គឺ​អ្នក​ទទួលរង​ការទម្លាក់​លើ​បើ​វា​ផ្ទុះ​គ្រោះថ្នាក់​ស្លាប់ និង​របួស​ពេល​ទម្លាក់ តែ​ប្រសិនបើ​កូន​គ្រាប់បែក​ចង្កោម​មិនទាន់​ផ្ទុះ​ទេនោះ វា​ស្ថិតនៅ​រាយប៉ាយ​អាច​បន្ត​បង្ក​ផ្ទុះ​គ្រោះថ្នាក់​មនុស្ស​ជំនាន់​នេះ​ និង​ជំនាន់​ក្រោយៗ​ទៀត​នៅពេល​ណាមួយ​​ដែលមាន​ការប៉ះទង្គិច​វា​»​។

បើតាម​លោក ហេង រតនា ​គម្រោង​កាលពី​ឆ្នាំ ២០២០-២០២១ បានសម្រេច​លទ្ធផល​មាន​ជាអាទិ៍​ដូចជា បាន​រំដោះ តំបន់​គ្រាប់បែក​ចង្កោម​ចំនួន​ ១១៣ ​តំបន់ មាន​ផ្ទៃដី​សរុប​ទំហំ​ ៣ ១ ៧៥៤ ២៤៣ ​ម៉ែត្រការ៉េ រកឃើញ​ និង​កម្ទេចចោល​​គ្រាប់បែក​ចង្កោម និង​គ្រាប់​យុទ្ធភណ្ឌ​មិនទាន់​ផ្ទុះ​គ្រប់​ប្រភេទ​បាន​ចំនួន​ ១១ ១០៨ ​គ្រាប់ ផ្តល់​​ការអប់រំ​យល់ដឹង​ពី​មីន​ដល់​ប្រជាពលរដ្ឋ​បាន​ចំនួន ១៣៤ ៩១៩ ​នាក់ ស្រាវជ្រាវ​ព័ត៌មាន​បឋម​បាន​ចំនួន​ ២៩៩ ​ភូមិ រកឃើញ ចម្ការ​គ្រាប់បែក​ចង្កោម​ចំនួន ៤១៨ ដែលមាន​ផ្ទៃដី​ស្មើនឹង ៤៧ ៤៦៧ ៩០១ ម៉ែត្រការ៉េ​៕

វីដេអូ៖

អត្ថបទគួរចាប់អារម្មណ៍