ភ្នំពេញៈ ក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា ល្បឿននៃការងារបង្កបង្កើនផលស្រូវ និងការដាំដំណាំផ្សេងៗដើមរដូវវស្សាឆ្នាំ ២០២១ គិតត្រឹមថ្ងៃទី ៣០ ខែមិថុនា ឆ្នាំ ២០២១ មានការកើនឡើងបន្តិច បើធៀបនឹងរយៈពេលដូចគ្នាកាលពីឆ្នាំមុន ខណៈរដ្ឋមន្ត្រីលោក វេង សាខុន ណែនាំឱ្យមន្ត្រីថ្នាក់ក្រោម យកចិត្តទុកដាក់បន្ថែមទៀតក្នុងការជំរុញការដាំដុះ។
របាយការណ៍របស់ក្រសួងកសិកម្ម ស្តីពីល្បឿនការងារបង្កបង្កើនផលស្រូវរដូវវស្សាឆ្នាំ ២០២១ ចេញផ្សាយកាលពីថ្ងៃទី ២ ខែកក្កដាបានឱ្យដឹងថា ការងារដាំដុះ គឺទទួលបានលទ្ធផលភ្ជួររាស់រៀបចំដីសម្រេចបានចំនួន ២ ១៤៥ ០០៦ ហិកតា ក្នុងនោះ ភ្ជួររាស់ដោយគោក្របីចំនួន ៨ ៨៩៨ ហិកតា ស្មើនឹង ០,៤១% និងដោយគ្រឿងយន្តចំនួន ២ ១៣៦ ១០៨ ហិកតា ស្មើនឹង ៩៩,៥៩% តិចជាងឆ្នាំមុន ២២ ១៨៥ ហិកតា (ហ.ត)។
ចំណែកការសាប គឺសរុបបានចំនួន ៩ ៩៣៩ ហ.ត លើសឆ្នាំមុនចំនួន ៣ ៩៨០ ហ.ត ខណៈលទ្ធផលស្ទូង និងព្រោះ សម្រេចបានចំនួន ១ ៩៨៣ ០៤៥ ហ.ត ស្មើនឹង ៧៦,០១% នៃផែនការ ២ ៦០៩ ០៦៥ ហ.ត លើសឆ្នាំមុន ១៩១ ០៨១ ហ.ត។ នេះបើយោងតាមក្រសួងកសិកម្ម។
របាយការណ៍ដដែលបានសង្កត់ធ្ងន់ថា៖ «លទ្ធផលស្ទូង និងព្រោះសម្រេចបានតាមប្រភេទរួមមាន ស្រូវស្រាលចំនួន ៧២៦ ១៧៣ ហ.ត លើសឆ្នាំមុន ១៣០ ៨៦៤ ហ.ត។ ស្រូវកណ្ដាលចំនួន ៨៨១ ៧៦៥ ហ.ត លើសឆ្នាំមុន ៥០ ៥៩៧ ហ.ត។ ស្រូវធ្ងន់ចំនួន ៣៣៥ ៧៣៨ ហ.ត លើសឆ្នាំមុន ២០ ៩៣៩ ហ.ត។ ស្រូវចម្ការចំនួន ១៧ ៨៧១ ហ.ត លើសឆ្នាំមុន ១៨៩ ហ.ត។ ស្រូវទ្បើងទឹកចំនួន ២១ ៤៩៨ ហ.ត តិចជាងឆ្នាំមុន ១១ ៥០៨ ហ.ត»។
ក្រៅពីនេះ ចំពោះល្បឿនការងារបង្កបង្កើនផលដំណាំសាកវប្បកម្ម និងដំណាំឧស្សាហកម្មរដូវវស្សាឆ្នាំ ២០២១ វិញ ក្រសួងកសិកម្មបានឱ្យដឹងថា ផ្ទៃដីដំណាំសាកវប្បកម្ម មានពោតស ដំឡូងជ្វា បន្លែគ្រប់មុខ ម្ទេស ឪឡឹក បានអនុវត្ដបានចំនួន ៤៣ ២០២ ហ.ត ស្មើនឹង ៨០,៤៧ ភាគរយនៃផែនការ ៥៣ ៦៨៦ ហ.ត តិចជាងឆ្នាំមុន ៦៩០ ហ.ត។
ចំណែកផ្ទៃដីដំណាំឧស្សាហកម្ម មានពោតក្រហម ដំឡូងមី សណ្តែកបាយ សណ្តែកដី សណ្តែកសៀង ល្ង អំពៅ ក្រចៅ ឈូកជាដើមនោះ អនុវត្ដបានចំនួន ៦៤៩ ៦៩៦ ហ.ត ស្មើនឹង ៧៩,២៣ ភាគរយនៃផែនការ ៨១៩ ៩៨៩ ហ.ត លើសឆ្នាំមុន ៤ ១៨៥ ហ.ត។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបាននិយាយថា ល្បឿនការងារបង្កបង្កើនផលដំណាំស្រូវរដូវវស្សាឆ្នាំ ២០២១ នេះ សម្រេចបាន ៧៦,០១ ភាគរយនៃផែនការ ខណៈឆ្នាំមុនសម្រេចបាន ៦៩,២៤ ភាគរយ បើប្រៀបធៀបរយៈពេលដូចគ្នា។ លោកបន្តថា រីឯដំណាំសាកវប្បកម្ម និងដំណាំឧស្សាហកម្មសម្រេចបាន ៧៩ ភាគរយ ខណៈឆ្នាំមុនសម្រេចបាន ៧៥ ភាគរយ បើប្រៀបធៀបរយៈពេលដូចគ្នា។
ទន្ទឹមនឹងលទ្ធផលនេះលោក វេង សាខុន បានណែនាំដល់អង្គភាពជំនាញក្រោមឱវាទរួមទាំងមន្ទីរកសិកម្ម រុក្ខាប្រមាញ់ និងនេសាទ រាជធានី ខេត្តទាំងអស់ឱ្យខិតខំជំរុញប្រជាកសិករក្នុងការរៀបចំដី ភ្ជួររាស់ សាប ព្រោះ តាមបច្ចេកទេសកសិកម្មសមស្រប ដើម្បីឱ្យទាន់រដូវកាលដាំដុះ។
លោកបានបញ្ជាក់ថា៖ «លើសពីនេះទៀត ក្រសួងក៏បានជំរុញឱ្យអង្គភាពជំនាញ បន្តចុះពិនិត្យតាមដានសុខភាពសត្វ ការអន្តរាគមន៍ចុះចាក់ថ្នាំការពារជំងឺឆ្លងសត្វ ដោយបង្កើនការចាក់វ៉ាក់សាំងការពារជំងឺឆ្លងសត្វផ្សេងៗ ជាពិសេសទប់ស្កាត់ចលនាសត្វដោយខុសច្បាប់នៅតាមបណ្តារាជធានី ខេត្តជាប់ជាប្រចាំ រួមទាំងបទល្មើសជលផល និងព្រៃឈើផងដែរ»។
កសិករម្នាក់នៅខេត្តកណ្តាល អ្នកស្រី នូន សាន និយាយថា ការធ្វើស្រែវស្សានៅឆ្នាំនេះ ក៏មិនសូវខុសពីឆ្នាំមុនៗប៉ុន្មាននោះទេ គឺការធ្វើស្រែរបស់គ្រួសារអ្នកស្រី គឺនៅតែពឹងអាស្រ័យ នឹងទឹកភ្លៀងដដែល បើទោះជាមានប្រឡាយបង្ហូរទឹកក៏ដោយ។
អ្នកស្រីថា ទឹកក្នុងប្រឡាយ គឺមិនអាចប្រើប្រាស់គ្រប់គ្រាន់សម្រាប់ធ្វើស្រែរបស់អ្នកភូមិនោះទេ ព្រោះប្រឡាយទាំងនេះ ក៏រំពឹងចាំតែទឹកភ្លៀងដូចគ្នា ព្រោះបើគ្មានភ្លៀងប្រឡាយ ក៏គ្មានទឹក ស្រែក៏ធ្វើមិនបានផល។
អ្នកស្រីបានបញ្ជាក់ថា៖ «នៅតំបន់ខ្ញុំ មានភ្លៀងដែរ តែភ្លៀងមិនខ្លាំង ដែលជាហេតុធ្វើឱ្យដីស្រែ មានទឹកមិនឆ្អែត ហើយសើមតែដីតិចៗ ដុះតែស្មៅ ផលស្រូវ មិនសូវបានទេ។ ឆ្នាំនេះ គឺខ្សត់ទឹកភ្លៀងណាស់ ប្រឡាយយើងក៏ពឹងមេឃ ស្រែយើងក៏ពឹងមេឃ ដល់មិនមានភ្លៀងច្រើនគឺពិបាកណាស់»។
អ្នកស្រីរំពឹងថា អាជ្ញាធរនឹងគិតគូរពីបញ្ហាដែលប្រជាកសិករកំពុងជួបប្រទះ ជារៀងរាល់ឆ្នាំទាក់ទងនឹងបញ្ហាខ្វះទឹកធ្វើស្រែ ហើយបញ្ហាធ្វើប្រឡាយដែលមិនអាចស្តុកទឹកឱ្យប្រជាកសិករធ្វើស្រែឱ្យបានឆាប់ ដើម្បីជំរុញការដាំដុះ។
អ្នកស្រីថ្លែងថា បើជួបបញ្ហាបែបនេះយូរៗទៅ នោះប្រជាកសិកររួមទាំងអ្នកស្រីផង គ្មានជម្រើសអ្វី ក្រៅពីទុកដីទំនេរចោលនោះទេ ព្រោះការធ្វើស្រែមិនបានចំណេញ គឺមានតែខាត ដោយមិនបានទិន្នផល៕