ភ្នំពេញៈ សមត្ថកិច្ចបញ្ជូនបុរសម្នាក់ទៅសាលាដំបូងរាជធានីភ្នំពេញនៅរសៀលថ្ងៃទី ៥ កក្កដា ក្រោយឃាត់ខ្លួនបាន ២ ថ្ងៃពាក់ព័ន្ធវាយនគរបាលរឿងជិះម៉ូតូមិនពាក់មួកសុវត្ថិភាពប្រព្រឹត្តនៅក្នុងភូមិសាស្ត្រសង្កាត់ទួលទំពូង ២ ខណ្ឌចំការមន រាជធានីភ្នំពេញ។
លោក កែវ សារុន អធិការរងទទួលផែនការងារចរាចរណ៍ និងសណ្តាប់ធ្នាប់សាធារណៈខណ្ឌចំការមន បានឱ្យដឹងនៅថ្ងៃទី ៥ កក្កដាថា បុរសសង្ស័យឈ្មោះថា វុទ្ធី អាយុ ២៨ ឆ្នាំ ជាកម្មករសំណង់ ស្នាក់នៅសង្កាត់និរោធ ខណ្ឌច្បារអំពៅ រាជធានីភ្នំពេញ។
លោកប្រាប់ថា៖ «ករណីនេះជនសង្ស័យត្រូវតែបញ្ជូនទៅតុលាការហើយ ដោយសារតែផុតកំណត់នីតិវិធី ៤៨ ម៉ោងនៃការឃុំខ្លួន។ ជនសង្ស័យពាក់ព័ន្ធប្រើហិង្សាបង្ករបួសស្នាមវាយសមត្ថកិច្ច។ លោកអធិការរងរូបនោះមានស្លាកស្លាមតិចតួចដែរ»។
លោក សារុន ថ្លែងថា កាលពីយប់ថ្ងៃទី ៣ កក្កដា កម្លាំងសមត្ថកិច្ចនៃអធិការដ្ឋានខណ្ឌចំការមនបានចុះដាក់ប៉ុស្តិ៍ត្រួតពិនិត្យអាវុធជាតិផ្ទុះ និងធ្វើការងារចរាចរណ៍នៅតាមបណ្តាយផ្លូវ ២៧១ ក្នុងភូមិសាស្ត្រសង្កាត់ទួលទំពូង ២ ដើម្បីពង្រឹងសន្តិសុខក្នុងមូលដ្ឋាន។
លោកបន្តថា នៅយប់នោះកម្លាំងសមត្ថកិច្ចរបស់លោកកំពុងអនុវត្តការងារ ស្រាប់តែជនសង្ស័យឈ្មោះ ថា វុទ្ធី បានជិះម៉ូតូ ១ គ្រឿងម៉ាក ហុងដាឌ្រីម មានស្លាកលេខភ្នំពេញ ១ID-2816 មកដល់ចំណុចគោលដៅដែលសមត្ថកិច្ចកំពុងឆែកឆេរអ្នកដំណើរហើយសមត្ថកិច្ចក៏បានហៅឱ្យជនសង្ស័យឈប់ម៉ូតូ។
ជនសង្ស័យមិនពាក់មួកសុវត្ថិភាពទេហើយសមត្ថកិច្ចបានតម្រូវឱ្យគាត់ធ្វើកំណត់ហេតុដកហូតវត្ថុតាងម៉ូតូហើយគាត់ក៏បានធ្វើកំណត់ហេតុព្រមទទួលស្គាល់កំហុសផងដែរ។ ដោយសារជនសង្ស័យយល់ព្រមទទួលកំហុសបែបនេះទើបសមត្ថកិច្ចតម្រូវឱ្យគាត់បង់ប្រាក់ផាកពិន័យ តែជនសង្ស័យមិនព្រមបង់ប្រាក់ផាកពិន័យទេ។
លោក សារុន បានស្រង់សម្តីតាមនគរបាលរងគ្រោះប្រាប់ទៅជនសង្ស័យពេលនោះថា៖ «នគរបាលគេចប់ម៉ោងធ្វើការងារហើយមិនអាចរង់ចាំបង (ជនសង្ស័យ) បានទេ។ បើបងមិនទាន់មានប្រាក់អាចទុកម៉ូតូនៅអង្គភាពខ្ញុំសិនក៏បានហើយពេលណាបងមានប្រាក់បង់ពិន័យគឺបងទៅយកម៉ូតូវិញពេលណាក៏បានដែរ»។
លោកបញ្ជាក់ទៀតថា ដោយសារដល់ម៉ោងកំណត់ចប់ភារកិច្ចហើយនោះសមត្ថកិច្ចត្រូវប្រមូលវត្ថុតាងដែលនៅសេសសល់យកទៅរក្សាទុកនៅអធិការដ្ឋាននគរបាលខណ្ឌចំការមន ដើម្បីដោះស្រាយគ្នាពេលក្រោយរួមទាំងម៉ូតូរបស់ជនសង្ស័យផង។
តែជនសង្ស័យប្រកែកមិនព្រមបង់ប្រាក់ផាកពិន័យតាមគោលការណ៍ទេ។ រីឯសមត្ថកិច្ចរបស់លោកក៏បានធ្វើការណែនាំឱ្យគាត់ទៅយកម៉ូតូ នៅអង្គភាពអធិការដ្ឋាននគរបាលខណ្ឌចំការមន។
តែពេលសមត្ថកិច្ចលើកម៉ូតូរបស់ជនសង្ស័យឡើងលើរថយន្តស្រាប់តែគាត់រារាំងមិនឱ្យសមត្ថកិច្ចលើកម៉ូតូរបស់គាត់ឡើងលើរថយន្ត។ រហូតមានការប្រតាយប្រតប់គ្នាហើយជនសង្ស័យបានវាយ ១ ដៃបណ្តាលឱ្យលោកអធិការរងម្នាក់របួសបែកមាត់ និងធ្លាក់បែកវិទ្យុទាក់ទង ១ គ្រឿង៕