ឧត្តរមានជ័យៈ នគរបាលប្រឆាំងគ្រឿងញៀន ខេត្តឧត្តរមានជ័យនឹងបញ្ជូនជនសង្ស័យប្រុសស្រី ៣ នាក់ ទៅសាលាដំបូងខេត្តនៅថ្ងៃទី ៦ កក្កដានេះ បន្ទាប់ពីចាប់ខ្លួនពួកគេពីថ្ងៃទី ៤ កក្កដា នៅភូមិ-ឃុំ-ស្រុកអន្លង់វែង ករណីលួចដាំដើមកញ្ឆាចំនួន ១២ ៥០០ ដើម និងរឹបអូសកញ្ជាក្រៀមបានចំនួន ៣៦ គីឡូក្រាម។
លោក ថោង សាមិ ស្នងការរងទទួលផែនការងារប្រឆាំងគ្រឿងញៀននៃស្នងការដ្ឋាននគរបាលខេត្តឧត្តរមានជ័យប្រាប់នៅរសៀលថ្ងៃទី ៥ កក្កដាថា ករណីនេះមានជនសង្ស័យ ៣ នាក់ (ស្រី ២ នាក់) ត្រូវសមត្ថកិច្ចរៀបចំកសាងសំណុំរឿងបញ្ជូនទៅសាលាដំបូងនៅថ្ងៃទី ៦ កក្កដា។
លោកថ្លែងថា៖ «ប៉ុន្តែខ្ញុំមិនអាចប្រាប់ឈ្មោះរបស់ពួកគេទាំង ៣ នាក់នេះបានទេ ព្រោះកំពុងស្ថិតនៅក្នុងនីតិវិធីបញ្ជូនទៅតុលាការនៅឡើយ។ ពួកគេនៅតែជាជនសង្ស័យនៅឡើយទេ»។
លោក ស៊ីម វណ្ណៈ អធិការនគរបាលស្រុកអន្លង់វែងឱ្យដឹងនៅរសៀលថ្ងៃទី ៥ កក្កដាថា កាលពីថ្ងៃទី ៤ កក្កដា ដោយទទួលបានសេចក្តីរាយការណ៍ពីប្រជាពលរដ្ឋ និងចុះស្រាវជ្រាវពីសមត្ថកិច្ចជំនាញរបស់លោកឃើញមានករណីលួចដាំដំណាំកញ្ឆានៅចំណុចភូមិ-ឃុំ-ស្រុកអន្លង់វែងខុសច្បាប់។ លោកបានដឹកនាំកម្លាំងចុះទៅដល់ទីតាំងខាងលើហើយពិនិត្យឃើញថា ជនសង្ស័យបានលួចដាំកញ្ឆាបន្លំក្នុងចម្ការស្វាយ នៅចំណុចពាង ២ ស្ថិតក្នុងភូមិ-ឃុំខាងលើ។
ក្នុងការបង្ក្រាបនោះ សមត្ថកិច្ចបានដុតបំផ្លាញដើមកញ្ឆាស្រស់បានចំនួន ១២ ៥០០ ដើម ដកហូតកញ្ឆាក្រៀមបានចំនួន ៣៦ គីឡូក្រាម រថយន្ត ១ គ្រឿង គោយន្តកន្រៃ្ត ១ គ្រឿង និងឧបករណ៍ផ្សេងៗមួយចំនួនទៀតនៅក្នុងចម្ការនោះ៕