កណ្ដាលៈ សមត្ថកិច្ចនគរបាលមូលដ្ឋានបាននិយាយថាប្ដីប្រពន្ធដែលត្រូវបានគេប្រទះឃើញស្លាប់ និងរងរបួសធ្ងន់ ក្នុងរោងកសិដ្ឋានចិញ្ចឹមទា ១ កន្លែង ដែលមានទីតាំងស្ថិតនៅភូមិថ្មី ឃុំសន្លុង ស្រុកខ្សាច់កណ្ដាល ខេត្តកណ្ដាល សង្ស័យជាអំពើឃាតកម្មលួចបាញ់ប្រហារដោយអាវុធ។
លោក ម៉ែន សុខឿន អធិការស្រុកខ្សាច់កណ្ដាលបានប្រាប់ភ្នំពេញប៉ុស្តិ៍កាលពីម្សិលមិញថា ករណីនេះបានកើតឡើងនៅវេលាម៉ោង ៥ និង ៣០ នាទីព្រឹកថ្ងៃទី ៥ ខែ កក្កដា ឆ្នាំ ២០២១។
នៅកន្លែងកើតហេតុសមត្ថកិច្ចនគរបាលជំនាញបានរកឃើញសម្បកគ្រាប់កាំភ្លើងខ្លី ១០ គ្រាប់ និងស្នាមកាប់ទម្លាយជញ្ជាំងស័ង្កសីនៃកសិដ្ឋានចិញ្ចឹមទា ដែលជនរងគ្រោះឈ្មោះ យឹម គឹមហុក អាយុ ៤៥ ឆ្នាំ និងប្រពន្ធរបស់គាត់ឈ្មោះ សុន ស្រឿន អាយុ ៤៩ ឆ្នាំបានស្នាក់នៅ។
លោកបានបញ្ជាក់ថា៖ «យោងតាមវត្ថុតាងដែលបានរកឃើញនៅកន្លែងកើតហេតុ ករណីនេះ គឺជាអំពើឃាតកម្មបាញ់ប្រហារដោយអាវុធ ហើយក្រុមខ្មាន់កាំភ្លើងអាចមានគ្នាលើសពី ២ នាក់។ ក្នុងករណីនេះ ស្ត្រីជាប្រពន្ធបានស្លាប់ ដោយត្រូវក្រុមខ្មាន់កាំភ្លើងបាញ់ត្រូវចំទ្រូងចំនួន ២ គ្រាប់ ហើយកាប់ត្រូវចំក្បាល ១ កាំបិត ចំណែកបុរសជាប្ដីបានរងរបួសជើងត្រូវបញ្ជូនទៅព្យាបាលនៅមន្ទីរពេទ្យកាល់ម៉ែតក្នុងរាជធានីភ្នំពេញ»។
លោក សុខឿន បានប្រាប់ឱ្យដឹងផងដែរថា សពស្ត្រីរងគ្រោះត្រូវបានក្រុមគ្រូពេទ្យជំនាញវេចខ្ចប់យកទៅបូជានៅទីលានបូជាសពអ្នកដែលស្លាប់ដោយជំងឺកូវីដក្នុងខេត្តកំពង់ស្ពឺ បន្ទាប់ពីធ្វើតេស្តរកឃើញមាន «វិជ្ជមានជំងឺកូវីដ ១៩»។
បើតាមលោក សុខឿន នៅពេលនេះ កម្លាំងអធិការដ្ឋាននគរបាលស្រុកខ្សាច់កណ្ដាលកំពុងសហការជាមួយកម្លាំងស្នងការដ្ឋាននគរបាលខេត្តកណ្ដាល និងខេត្តកំពង់ស្ពឺស្រាវជ្រាវ និងតាមចាប់ក្រុមខ្មាន់កាំភ្លើង ដើម្បីកសាងសំណុំរឿងបញ្ជូនឱ្យតុលាការសម្រេចផ្ដន្ទាទោសតាមនីតិវិធីច្បាប់៕