.jpg)
កម្មកររោងចក្រទទួលបានប្រាក់ជំនួយ ក្រោយការបិទខ្ទប់ដោយកូវីដ។ រូប ក្រសួងការងារ
ភ្នំពេញៈ ក្រសួងផែនការរកឃើញអ្នករងគ្រោះក្រោយការបិទខ្ទប់ ដែលបានបាត់ការងារ និងបានឆ្លងជំងឺកូវីដ ១៩ ហើយស្លាប់ដោយសារជំងឺនេះ ក្នុងដំណាក់កាលទី ២ មានចំនួន ៥៩ ០០០ គ្រួសារ បើគិតប្រជាជនប្រមាណ ១៩ ម៉ឺននាក់ ដែលពួកគេនឹងទទួលបានប្រាក់ឧបត្ថម្ភពីរាជរដ្ឋាភិបាលក្នុងពេលឆាប់ៗខាងមុខនេះ។
លោក ណុប កនណាវុឌ្ឍ អ្នកនាំពាក្យក្រសួងផែនការ ប្រាប់ ភ្នំពេញ ប៉ុស្តិ៍ ពីម្សិលមិញថា ប្រជាពលរដ្ឋដែលជួបបញ្ហាជីវភាពក្រោយពីការបិទខ្ទប់ដោយសារការរីករាលដាលជំងឺកូវីដ ១៩ មកដល់ពេលនេះក្រសួងផែនការ បានសម្ភាស និងកំណត់គ្រួសារគោលដៅជាលើកទី២ ឬហៅថាជំហានទី២ រួចហើយកាលពីចុងខែមិថុនា។ ជាលទ្ធផល មានគ្រួសារជួបបញ្ហាចំនួន ៥៩ ០០០ គ្រួសារ ស្មើនឹងប្រជាជនសរុបប្រមាណ ១៩ ម៉ឺននាក់។
លោកថ្លែងថា៖ «លើកទី១ កាលពីខែឧសភាកន្លងទៅ យើងបានរកឃើញគ្រួសារ ដែលជួបបញ្ហាជីវភាព ក្រោយការបិទខ្ទប់មានប្រមាណ ៦១ ០០០ គ្រួសារ ស្មើនឹងប្រជាជនសរុបប្រមាណ ២៦០ ០០០ នាក់។ ឯលទ្ធផលនៃការរកឃើញលើកទី២ នេះ យើងបានបញ្ជូនទៅក្រសួងសេដ្ឋកិច្ច និងហិរញ្ញវត្ថុរួចរាល់ហើយ ដើម្បីធ្វើការគិតគូរគណនាថវិកាឧបត្ថម្ភ ដែលគ្រោងនឹងបើកជូនឆាប់ៗនាពេលខាងមុខ»។
មន្ត្រីនាំពាក្យរូបនេះបញ្ជាក់ថា លទ្ធផលដែលបានធ្វើការសម្ភាសរកឃើញនេះ គឺស្ថិតនៅតំបន់បិទខ្ទប់ទាំង ៣ រួមមាន រាជធានីភ្នំពេញ តាខ្មៅ ក្រុងព្រះសីហនុ និងអ្នកជំងឺដោយសារកូវីដ ១៩ ទូទាំងប្រទេស។
លោកថា ទាំង ២ ដំណាក់កាលនេះក្រសួងផែនការ រកឃើញអ្នកដែលរងគ្រោះក្រោយការបិទខ្ទប់ និងឆ្លងជំងឺកូវីដ ១៩ និងស្លាប់ដោយសារជំងឺនេះមានចំនួនសរុប ១២ ម៉ឺនគ្រួសារ ស្មើនឹងប្រជាជនប្រមាណ ៤០ ម៉ឺននាក់។
បើតាមលោក ណុប កនណាវុឌ្ឍ ការផ្តល់ប្រាក់ឧបត្ថម្ភអាចមាននៅដំណាក់កាលទី ៣ ទៀត ប្រសិនបើរាជរដ្ឋាភិបាលពិនិត្យមើលឃើញថា គ្រួសារផ្សេងៗទៀតដែលជួបបញ្ហាជីវភាពដូចគ្នាមិនទាន់ទទួលបានប្រាក់ឧបត្ថម្ភជីវភាពដូចអ្នករងគ្រោះ ដែលកំពុងទទួលបាន។
លោកបានថ្លែងថា៖ «ក្រសួងផែនការបានណែនាំទៅអាជ្ញាធរមូលដ្ឋានឱ្យរង់ចាំទទួលការដាក់ពាក្យស្នើសុំជានិច្ច ករណីមានបងប្អូនប្រជាពលរដ្ឋមានជួបបញ្ហាជីវភាពក្រោយការបិទខ្ទប់ ឬគ្រួសារដែលកំពុងធ្លាក់ទៅរកភាពក្រីក្រ»។
លោក មាស សុខសេនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ ភ្នំពេញ ប៉ុស្តិ៍ ពីម្សិលមិញថា ក្រសួងបានត្រៀមថវិការួចរាល់ហើយសម្រាប់ការដោះស្រាយបញ្ហាជំងឺកូវីដ ១៩ និងថែមទាំងមានការបង្កើនថវិកាសម្រាប់ការចាំបាច់ផ្សេងៗទៀត ប្រសិនបើវិធានការរបស់រាជរដ្ឋាភិបាលនៅតែបន្ត។
លោកថ្លែងថា៖ «ឱ្យតែមានសំណើពីខាងក្រសួងផែនការគាត់ឆ្លងគណៈកម្មការត្រឹមត្រូវអស់ហើយ យើងនឹងបើកផ្តល់ជូនដោយអត់ដែលមានការរារែកចំពោះថវិការឿងជំងឺកូវីដនោះទេ គឺយើងត្រៀមជានិច្ច ព្រោះអាហ្នឹងជាបញ្ហាអាទិភាព»។
លោក ឡាំ សុជាតិ នាយកប្រតិបត្តិវិទ្យាស្ថានតស៊ូមតិ និងគោលនយោបាយ បានថ្លែងពីម្សិលមិញថា ការធ្វើបច្ចុប្បន្នភាពកំណត់អត្តសញ្ញាណអ្នកក្រីក្រនេះ រដ្ឋាភិបាលធ្វើបានល្អក្នុងពេលកន្លងមក។ ប៉ុន្តែទោះយ៉ាងណាបញ្ហាកូវីដ ១៩ នៅតែបន្តការអូសបន្លាយ។ ហេតុនេះគួរតែបង្កើនល្បឿនស្វែងរកបន្ថែមទៀតចំពោះអ្នករងគ្រោះខ្លាំងដោយសារជំងឺកូវីដ ១៩ នេះ។
លោកបញ្ជាក់ថា ការកំណត់អត្តសញ្ញាណអ្នកក្រីក្រនេះនៅមានភាពខ្វះចន្លោះខ្លះដែរ ព្រោះស្ថានភាពជីវភាពរបស់ប្រជាជនជាក់ស្តែងមួយៗក៏អាចមានការប្រែប្រួលឆាប់រហ័សពីធូរធារទៅក្រីក្រវិញ ឬក៏ពីក្រីក្រទៅធូរធារ។
លោក សុជាតិ បានបញ្ជាក់ថា៖ «ជួនកាលអ្នកដែលក្រពិតប្រាកដហ្នឹង អាជ្ញាធរគាត់អាចខ្វះចន្លោះ។ ប៉ុន្តែក្នុងចំណោមអ្នកដែលគេធ្វើការកំណត់អត្តសញ្ញាណក្រីក្រហ្នឹង ក៏យើងឃើញថា ភាគច្រើនអាចត្រឹមត្រូវជាអ្នកក្រីក្រ ហើយវាអាចមានមួយចំនួនតូច វាអាចមានការរកមិនឃើញ»៕
វីដេអូ៖
