តាកែវៈ អង្គការជីវសត្វស្លាបអន្តរជាតិ (BirdLife) បានឱ្យដឹងថា ប្រមាណ ៨៥ ភាគរយនៃសម្បុកសត្វចង្កៀលខ្យង ដែលបានពងនៅតំបន់ការពារទេសភាពបឹងព្រែកល្ពៅបានញាស់កូនដោយជោគជ័យក្នុងរដូវកាលពងកូនឆ្នាំនេះ ខណៈការធ្វើសម្បុកក្នុងតំបន់នេះជាកំណត់ត្រាថ្មី ដែលពុំធ្លាប់មានក្នុងរយៈពេលប្រមាណជាង ១៥ ឆ្នាំចុងក្រោយ។
តំបន់ការពារទេសភាពបឹងព្រែកល្ពៅត្រូវបានរដ្ឋាភិបាលបង្កើតកាលពីឆ្នាំ ២០១៦ លើផ្ទៃដីទំហំជាង ៨ ពាន់ហិកតានៅក្នុងភូមិសាស្ត្រខេត្តតាកែវ។
តាមទំព័រហ្វេសប៊ុករបស់អង្គការ BirdLife បានឱ្យដឹងនៅថ្ងៃទី ៥ កក្កដាថា ក្នុងរដូវកាលពងកូនឆ្នាំ ២០២០ សត្វចង្កៀលខ្យង បានមករកចំណីក្នុងតំបន់ការពារទេសភាពបឹងព្រែកល្ពៅរហូតដល់រាប់ពាន់ក្បាល និងមានសម្បុកពងកូនយ៉ាងតិចចំនួន ២ ១៨៦ នៅលើដើមរាំងចំនួន ២៧០ ដើម។
អង្គការនេះបានឱ្យដឹងទៀតថា ការធ្វើសម្បុកនេះជាកំណត់ត្រាថ្មីដែលពុំធ្លាប់មានក្នុងរយៈពេលប្រមាណជាង ១៥ ឆ្នាំចុងក្រោយនេះ។
អង្គការនេះបានបញ្ជាក់ថា «ក្រោមជំនួយពីអង្គការ BirdLife និងដោយការយកចិត្តទុកដាក់ថែរក្សាការពារពីមន្ត្រីឧទ្យានុរក្សប្រចាំការ ក្រុមការងារទីវាលសម្បុកចង្កៀលខ្យងបានញាស់ជោគជ័យជាបន្តបន្ទាប់ ដែលសម្បុកចុងក្រោយគឺញាស់ក្នុងខែមេសា ឆ្នាំ ២០២១»។
លោក លឹម វ៉ាត នាយករងតំបន់ការពារទេសភាពបឹងព្រែកល្ពៅបានថ្លែងថា ក្នុងចំណោមសម្បុកពងកូនទាំងអស់ (ប្រមាណ ២ ១៨៦) មានការញាស់ជោគជ័យប្រមាណ ៨៥ ភាគរយ និង ១៥ ភាគរយទៀត រងការខូចខាត តាមរយៈទឹកជំនន់លិចសម្បុកដែលលើដើមឈើទាបៗ ខ្យល់កន្ត្រាក់ធ្លាក់ខូច និងមានជនខិលខូចលួចប្រមូលពងសត្វ។
លោកបន្តថា ចំពោះសម្បុកដែលញាស់ជោគជ័យជាមធ្យមបានកូនចង្កៀលខ្យងប្រហែល ៥ ៥៨០ ក្បាល ទទួលរងការខូចខាតអស់កូនប្រហែល ១០ ភាគរយ (ងាប់ដោយសារជំងឺ និងកត្តាផ្សេងៗ)។ ចំណែកប្រមាណ ៤០ ភាគរយបង្ខំចិត្តហើរចាកចេញពីសម្បុក និងទ្រនំដោយកត្តារាំងស្ងួតខ្វះប្រភពទឹក និងចំណី។
លោកបានបញ្ជាក់ថា៖ «បច្ចុប្បន្នមានកូនចង្កៀលខ្យងប្រមាណ ៥០ ភាគរយ (ជាមធ្យមប្រហែល ២ ៧៩០ ក្បាលកំពុងបន្តស្នាក់នៅលើសម្បុក និងទ្រនំ ដែលខ្លះទើបតែញាស់ហើយមិនទាន់អាចហើរបានឆ្ងាយពីមេបា។ យើងបានសង្កេតឃើញផងដែរថា មេបាចាស់ៗបានប្រមូលកំណាត់ឈើតូចៗ បន្ថែមដើម្បីជួសជុលសម្បុក និងធ្វើសម្បុកថ្មីលើមែកឈើដែលខ្ពស់ៗជាងមុន»។
លោក លឹម វ៉ាត បានឱ្យដែរថា ជាមួយនឹងការបង្កកំណើតថ្មីដោយជោគជ័យនេះ ក្រុមការងាទីវាលបានសនិ្នដ្ឋានថា សកម្មភាពនេះជាសញ្ញាល្អដែលបញ្ជាក់ថា ចង្កៀលខ្យងនឹងមិនបំផ្លាស់ទីចេញអស់ពីទីតាំងពងកូនឡើយ ហើយរដូវកាលពងកូនឆ្នាំ ២០២១-២០២២ អាចនឹងមានសម្បុកកើនឡើងបន្ថែមទៀត។
គម្រោងអភិរក្ស និងគ្រប់គ្រងតំបន់ដីសើមបឹងព្រែកល្ពៅសហការអនុវត្តដោយក្រសួងបរិស្ថាន ដែលមានមន្ទីរបរិស្ថានខេត្តតាកែវជាសេនាធិការ អង្គការជីវសត្វស្លាបអន្តរជាតិ (BirdLife) អង្គការជីវិតធម្មជាតិនៅកម្ពុជា (NatureLife) និងអង្គការ WWT។ នេះបើតាមទំព័រហ្វេសប៊ុករបស់អង្គការ (BirdLife)៕