.jpg)
ឯកឧត្តម បណ្ឌិតសភាចារ្យ ហាង់ជួន ណារ៉ុន (រូបកណ្តាល) រដ្ឋមន្ត្រីក្រសួងអប់រំ យុវជន និងកីឡា។ រូបថត MoEYS
គ្រូបង្រៀនជាកត្តាមួយដែលមិនអាចខ្វះបានក្នុងការអភិវឌ្ឍប្រទេសជាតិ ជាពិសេសគុណភាពវិស័យអប់រំ ។ ក្រសួងអប់រំ យុវជន និងកីឡា បាននិងកំពុងយកចិត្តទុកដាក់ជាទីបំផុតទៅលើគុណភាព និងសមត្ថភាពធនធានមនុស្ស ដើម្បីឆ្លើយតបទៅនឹងសកលភាវូបនីយកម្មអប់រំនៅក្នុងតំបន់ និងនៅលើសកលលោក។ អត្ថបទនេះនឹងបកស្រាយអំពី “ស្ដង់ដាវិជ្ជាជីវៈគ្រូបង្រៀន” ដែលជាឧបករណ៍សម្រាប់លើកស្ទួយការអភិវឌ្ឍគុណភាព និងសមត្ថភាពគ្រូបង្រៀន។
គ្រូបង្រៀនក្នុងអត្ថបទនេះសំដៅដល់បុគ្គលិកអប់រំនៅគ្រឹះស្ថានសាធារណៈ និងគ្រឹះស្ថានសិក្សាឯកជន ដែលមានអាជ្ញាប័ណ្ណអប់រំ ប៉ុន្តែមិនសំដៅដល់គ្រូបង្រៀនខាងសាសនា បច្ចេកទេសយុទ្ធសាស្ត្រយោធា និងសន្តិសុខ ផ្នែកគ្រប់គ្រងរដ្ឋបាលដែនដី ផ្នែកភូមិន្ទរដ្ឋបាល និងផ្នែកវិជ្ជាជីវៈតុលាការនោះទេ។
ស្របតាមចក្ខុវិស័យក្នុងការពង្រីកសមត្ថភាពគ្រូបង្រៀនឱ្យដល់កម្រិតអតិបរមា ក្រសួងអប់រំ យុវជន និងកីឡាក្នុងឆ្នាំ ២០១៦ បានរៀបចំឡើងនូវស្ដង់ដាវិជ្ជាជីវៈគ្រូបង្រៀន សម្រាប់ជាត្រីវិស័យចង្អុលប្រាប់អ្នកអប់រំទាំងអស់ក្នុងការរៀបចំកម្មវិធីបណ្ដុះបណ្ដាលគ្រូក៏ដូចជាវគ្គវិក្រឹតការនានា ដើម្បីធ្វើបច្ចុប្បន្នភាពសមត្ថភាពគ្រូបង្រៀនឱ្យស្របតាមយុគសម័យឌីជីថលបច្ចេកវិទ្យាព័ត៌មាន និងសង្គមដោយផ្អែកលើពុទ្ធិ។ ស្ដង់ដាគ្រូបង្រៀននេះចែកចេញជា ៤ សមាសភាគគឺ៖ (១) ចំណេះវិជ្ជាជីវៈ (២) ការប្រតិបត្តិវិជ្ជាជីវៈ (៣) ការសិក្សាវិជ្ជាជីវៈ និង (៤) សីលធម៌វិជ្ជាជីវៈ។
១.ចំណេះដឹងវិជ្ជាជីវៈ៖ គ្រូបង្រៀនត្រូវមានចំណេះដឹងវិជ្ជាជីវៈសម្បូរបែបដូចជា៖
១.១.ចំណេះដឹងពីសិស្ស
-គ្រូបង្រៀនត្រូវស្គាល់សិស្សឱ្យបានច្បាស់អំពីតម្រូវការសិក្សា សមត្ថភាព ប្រវត្តិសិក្សា និងឥរិយាបថរបស់សិស្ស។
-គ្រូបង្រៀនត្រូវដឹងច្បាស់ពីប្រភេទគ្រួសារ និងកត្តាផ្សេងៗ (ឧ. យេនឌ័រ សាវតារសង្គម សេដ្ឋកិច្ច ពិការភាព និងក្រុមជនជាតិភាគតិច (។ល។) ដែលមានឥទ្ធិពលដល់ការសិក្សារបស់សិស្ស និងត្រូវដឹងពីរបៀបដោះស្រាយកត្តាទាំងនេះ។
១.២.ចំណេះដឹងខ្លឹមសារមេរៀន
-គ្រូបង្រៀនត្រូវយល់ដឹងពីគោលនយោបាយអប់រំជាតិ និង គោលបំណងអប់រំចំណេះទូទៅ។
-គ្រូបង្រៀនគឺត្រូវយល់ដឹងអំពីទ្រឹស្ដីនៃការសរសេរកិច្ចតែងការបង្រៀន។
-គ្រូបង្រៀនត្រូវយល់ដឹងពីខ្លឹមសារនៃកម្មវិធីសិក្សា ហើយមានសមត្ថភាពពន្យល់ និងបង្រៀនខ្លឹមសារ មុខវិជ្ជាដែលមានក្នុងកម្មវិធីសិក្សាបានល្អ។
-គ្រូបង្រៀនត្រូវយល់ដឹងពីរបៀបបញ្ជ្រាបខ្លឹមសារពីមុខវិជ្ជាមួយទៅមុខវិជ្ជាផ្សេងទៀត ក្នុងន័យឱ្យសិស្សទទួលបានបំណិនជាច្រើន និងមានចិត្តកាន់តែចង់រៀន។
១.៣.ចំណេះដឹងអំពីរបៀបរៀនរបស់សិស្ស
-គ្រូបង្រៀនត្រូវយល់ដឹងពីបរិស្ថានសិក្សាក្នុងថ្នាក់រៀន និងសហគមន៍។
-គ្រូបង្រៀនត្រូវយល់ដឹងពីរបៀបរៀនរបស់សិស្ស។
-គ្រូបង្រៀនត្រូវយល់ដឹងពីភាពខុសគ្នានៃសម្បទា ល្បឿន និងរបៀបសិក្សារបស់សិស្ស។
២.ការប្រតិបត្តិវិជ្ជាជីវៈ៖ គ្រូបង្រៀនត្រូវបំពេញសកម្មភាពដូចតទៅ៖
២.១.ការធ្វើផែនការ និងការពិនិត្យតាមដានការវាយតម្លៃលទ្ធផលសិក្សា
-គ្រូបង្រៀនត្រូវរៀបចំកិច្ចតែងការបង្រៀន កម្មវិធីបង្រៀន និងការវាយតម្លៃលទ្ធផលសិក្សាឱ្យបានត្រឹមត្រូវ ហើយមានប្រសិទ្ធភាព ដោយផ្អែកលើសៀវភៅសិស្ស សៀវភៅគ្រូ និងសម្ភារសិក្សាផ្សេងៗទៀត។
-គ្រូបង្រៀនត្រូវរៀបចំសម្ភារបង្រៀន និងរៀន ដើម្បីធ្វើឱ្យការសិក្សាសម្រេចបានលទ្ធផលល្អ និងដើម្បីគាំទ្រដល់កិច្ចតែងការបង្រៀន។
-គ្រូបង្រៀនត្រូវប្រើប្រាស់វិធីសមស្រប សម្បូរបែប សម្រាប់វាយតម្លៃលទ្ធផលសិក្សារបស់សិស្ស ដែលស្របទៅតាមតម្រូវការ និងទេពកោសល្យរបស់សិស្ស។
-គ្រូបង្រៀនត្រូវតាមដានការចូលរួម និងថែរក្សាកំណត់ត្រានៃភាពរីកចម្រើនរបស់សិស្ស។
-គ្រូបង្រៀនត្រូវផ្ដល់ព័ត៌មានត្រឡប់ទៅសិស្ស មាតាបិតា ឬអាណាព្យាបាលសិស្ស អំពីការអភិវឌ្ឍចំណេះដឹង បំណិន និងឥរិយាបថរបស់សិស្ស។
២.២.ការគ្រប់គ្រងបរិស្ថានសិក្សា
-គ្រូបង្រៀនត្រូវផ្ដល់បរិស្ថានសិក្សាដែលមានសុវត្ថិភាព និងធ្វើឱ្យសិស្សទាំងអស់ខិតខំរៀនឱ្យអស់ពីសមត្ថភាពដូចជា ការគ្រប់គ្រងថ្នាក់រៀនមានប្រសិទ្ធភាព ការជួយសិស្សឱ្យមានអន្តរកម្មវិជ្ជមានជាមួយសិស្សដទៃទៀត និងធ្វើឱ្យសិស្សពង្រីកការសិក្សាបានច្រើន។
-គ្រូបង្រៀនត្រូវជួយសិស្សឱ្យបង្កើនការទទួលខុសត្រូវចំពោះការសិក្សារបស់ខ្លួនដូចជា ការធ្វើស្វ័យសិក្សា និងការរៀបចំគម្រោងតូចៗ និងរបាយការណ៍ក្រុម ។ល។
-គ្រូបង្រៀនត្រូវចូលរួមអភិវឌ្ឍសាលារៀន ដើម្បីទ្រទ្រង់ការសិក្សា និងសុខុមាលភាពរបស់សិស្សព្រមទាំងសហសេវិក/មិត្តរួមអាជីព។
២.៣.វិធីបង្រៀន
-គ្រូបង្រៀនត្រូវប្រើវិធីបង្រៀនផ្សេងៗ ដើម្បីជួយសម្រួលការសិក្សារបស់សិស្ស និងសម្រេចឱ្យបានតាមស្ដង់ដាកម្មវិធីសិក្សារបស់ក្រសួង។
-គ្រូបង្រៀនត្រូវផ្ដល់មធ្យោបាយឱ្យស្របទៅតាមរបៀបសិក្សា និងតម្រូវការផ្សេងៗគ្នារបស់សិស្សតាមរយៈការអនុវត្តវិធីបង្រៀនសមស្រប និងសម្បូរបែប។
-គ្រូបង្រៀនត្រូវរៀបចំ និងផ្ដល់ឱ្យសិស្សនូវឱកាសសិក្សាពីដំណោះស្រាយ ដើម្បីចូលរួមគិតឱ្យបានល្អិតល្អន់ និងដោយច្នៃប្រឌិត។
-គ្រូបង្រៀនត្រូវប្រើប្រាស់បច្ចេកវិទ្យាព័ត៌មាន និងសារគមនាគមន៍ និងធនធានក្នុងបណ្ណាល័យ ដើម្បីឱ្យការបង្រៀន និងរៀនកាន់តែមានប្រសិទ្ធភាព។
៣.ការសិក្សាវិជ្ជាជីវៈ៖ គ្រូបង្រៀន គឺជាអ្នកលើកទឹកចិត្ត និងជាអ្នកធានាឱ្យសិស្សទទួលបានជោគជ័យក្នុងការសិក្សា ដូច្នេះគ្រូបង្រៀនត្រូវអនុវត្តសកម្មភាពដូចខាងក្រោម៖
៣.១.ស្វ័យសិក្សា
-គ្រូបង្រៀនត្រូវវាយតម្លៃការបង្រៀន ការអភិវឌ្ឍខ្លួន និងការប្រើប្រាស់ផែនការសម្រាប់ដឹកនាំស្វ័យសិក្សាវិជ្ជាជីវៈបានទៀងទាត់។
-គ្រូបង្រៀន ត្រូវអភិវឌ្ឍ ចំណេះដឹង បច្ចេកវិទ្យាព័ត៌មាន សារគមនាគមន៍ និងបំណិនសម្រាប់អនុវត្តក្នុងការបង្រៀន និងរៀន និងមានឆន្ទៈធ្វើស្វ័យសិក្សាស្រាវជ្រាវបំពេញបន្ថែមទាំងចំណេះដឹងមូលដ្ឋាន ទាំងបច្ចេកទេសបង្រៀនថ្មីៗតាមរយៈការប្រើប្រាស់បច្ចេកវិទ្យាព័ត៌មាន និងសារគមនាគមន៍។
៣.២.ចូលរួមកែលម្អការបង្រៀន
-គ្រូបង្រៀនត្រូវធ្វើឱ្យប្រសើរឡើងនូវបំណិនទំនាក់ទំនងជាមួយសិស្ស មាតាបិតា មិត្តរួមអាជីព និងសហគមន៍។
-គ្រូបង្រៀនត្រូវអានអត្ថបទវិជ្ជាជីវៈគ្រូបង្រៀន និងស្រាវជ្រាវ ដើម្បីពង្រីកចំណេះដឹងឱ្យបានទូលំទូលាយ និងធ្វើថ្នាក់និទស្សន៍ដើម្បីបង្ហាញបទពិសោធដែលទទួលបានពីការអាន និងស្រាវជ្រាវឯកសារផ្សេងៗដល់មិត្តរួមអាជីពដើម្បីបង្កើនសមត្ថភាព។
-គ្រូបង្រៀនត្រូវធ្វើអន្តរកម្មជាមួយគ្រូដទៃទៀតក្នុងសកម្មភាពសិក្សាវិជ្ជាជីវៈផ្សេងៗ ដូចជាការចូលរួមសិក្ខាសាលា ឬវគ្គសិក្សា ដើម្បីទទួលបានបទពិសោធល្អដល់ការបង្រៀន និងរៀន។
៤.សីលធម៌វិជ្ជាជីវៈ៖ មានពាក់ព័ន្ធទៅនឹងគ្រប់ទិដ្ឋភាពទាំងអស់ក្នុងវិជ្ជាជីវៈគ្រូបង្រៀន ដែលរួមមានការប្ដេជ្ញាចិត្តបង្រៀនសិស្ស ប្រើប្រាស់មនសិការវិជ្ជាជីវៈប្រកបដោយគតិបណ្ឌិត និងមានចំណេះដឹងគ្រប់គ្រាន់តាមក្រមសីលធម៌ វិជ្ជាជីវៈគ្រូបង្រៀន និងច្បាប់ស្ដីពីការអប់រំ។ គ្រូបង្រៀនត្រូវចូលរួមសកម្មភាពដូចខាងក្រោម៖
-គ្រូបង្រៀនត្រូវគោរពពេលវេលាតាមភារកិច្ច មានវត្តមានជាប្រចាំនៅក្នុងសាលារៀន មានការស្លៀកពាក់សមរម្យ មានឥរិយាបទថ្លៃថ្នូរ និងចូលរួមក្នុងគ្រប់សកម្មភាពទាំងក្នុង និងក្រៅម៉ោងទាំងអស់របស់សាលារៀនឱ្យបានសមស្របតាមករណីដែលអាចធ្វើបាន។
-គ្រូបង្រៀនត្រូវបង្ហាញការយកចិត្តទុកដាក់ និងថែរក្សាសិស្ស ហើយជានិច្ចកាលធ្វើការ ដើម្បីប្រយោជន៍សិស្ស និងសង្គម។
-គ្រូបង្រៀនត្រូវបង្ហាញពីការប្ដេជ្ញាចិត្ត និងចូលរួមចំណែកក្នុងវិជ្ជាជីវៈគ្រូបង្រៀន ប្រកបដោយស្មារតីទទួលខុសត្រូវខ្ពស់។
-គ្រូបង្រៀនត្រូវបង្ហាញអាកប្បកិរិយាវិជ្ជមានជាគំរូប្រកបដោយសីលធម៌ និងមានទំនាក់ទំនងដោយសុខដុមជាមួយសិស្ស និងសហគមន៍។
-គ្រូបង្រៀនត្រូវប្រើប្រាស់ភាពយុតិ្តធម៌ និងតម្លាភាព ក្នុងការប្រព្រឹត្តជាមួយសិស្សសហសេវិក និងសមាជិកផ្សេងៗរបស់សហគមន៍។
សរុបមក ស្ដង់ដារវិជ្ជាជីវៈគ្រូបង្រៀនមានគោលដៅពង្រឹងគុណភាពគ្រូបង្រៀន និងកែលម្អលទ្ធផលសិក្សារបស់សិស្ស។ ស្ដង់ដារវិជ្ជាជីវៈ គឺជាឧបករណ៍ដ៏មានសារៈសំខាន់បំផុត និងជាខ្នាតសម្រាប់ធ្វើផែនការកសាងសមត្ថភាពគ្រូបង្រៀន។
« ចំណេះដឹងមានអត្ថប្រយោជន៍ លុះត្រាតែគ្រូបង្រៀនចេះប្រើប្រាស់ចំណេះដឹងនេះ ដើម្បីបង្កើនគុណភាពបង្រៀន បង្កើតបរិយាកាសអំណោយផលសម្រាប់ការសិក្សា ប្រើវិធីសាស្ត្របង្រៀនសមស្រប ដើម្បីកែលម្អលទ្ធផលសិក្សាសិស្សប្រសើរជាងមុន និងលើកកម្ពស់គុណភាពនៃប្រព័ន្ធអប់រំ ដើម្បីមនុស្សជាតិទាំងមូល » បណ្ឌិតសភាចារ្យ ហង់ជួន ណារ៉ុន។
