កំពង់ធំៈ ស្ត្រីម្នាក់បានស្លាប់ ដោយសាររន្ទះបាញ់ និង ២ នាក់ទៀតបានរងរបួស ខណៈផ្ទះឈើប្រក់ស័ង្កសី និងផ្ទះតៀមធ្វើពីឈើប្រក់ស័ង្កសីចំនួន ១០១ ខ្នងត្រូវបានដួលរលំ និងរបើកដំបូល ដោយសារភ្លៀងខ្យល់កន្ត្រាក់បក់បោកយ៉ាងខ្លាំង កាលពីយប់ថ្ងៃទី ៥ កក្កដា នៅឃុំចំនួន ៣ ក្នុងស្រុកកំពង់ស្វាយ ខេត្តកំពង់ធំ។
លោក កែ កញ្ចនា អធិការនគរបាលស្រុកកំពង់ស្វាយ ប្រាប់នៅរសៀលថ្ងៃទី ៦ កក្កដាថា ស្ត្រីរងគ្រោះដោយរន្ទះបាញ់ស្លាប់ឈ្មោះ ញឹប ហ៊ីន អាយុ ៤១ ឆ្នាំរស់នៅភូមិឥន្ទកុមារ ឃុំ-ស្រុកកំពង់ស្វាយ។ ចំណែកឯផ្ទះរលំ និងរបើកដំបូលមានចំនួន ១០១ ខ្នង ស្ថិតក្នុងឃុំសានគរ ឃុំកំពង់ស្វាយ និងឃុំត្រពាំងឫស្សី ហើយភូមិដែលរងគ្រោះរលំផ្ទះធ្ងន់ធ្ងរជាងគេគឺភូមិជ័យ និងភូមិស្លែងខ្ពស់ ស្ថិតក្នុងឃុំសានគរ។
ចំពោះផ្ទះរលំទាំងស្រុងជាផ្ទះឈើប្រក់ស័ង្កសីមានចំនួន ៣ ខ្នង និងរោងម៉ាស៊ីនកែច្នៃតុទូមានទំហំ ១០ ម៉ែត្រ គុណ ១៥ ម៉ែត្រចំនួន ១ គឺរលំខ្ទេចរាបដល់ដីតែម្តង។ ក្នុងចំនួន ៣ ឃុំខាងលើ មានស្ត្រីចំនួន ២ នាក់រងរបួសស្រាល ដោយសារផ្ទះរលំត្រូវ និងផ្ទះខូចខាតមធ្យមមានចំនួន ៤៩ ខ្នងក្នុងចំណោម ១០១ ខ្នងផ្ទះ។
លោកបានថ្លែងថា៖ «ព្រឹកមិញ (ថ្ងៃទី ៦ កក្កដា) ខាងកាកបាទក្រហមខេត្តកំពង់ធំ និងខាងកាកបាទក្រហមស្រុកកំពង់ស្វាយចុះទៅសួរសុខទុក្ខ និងចែកអំណោយដល់គ្រួសារពលរដ្ឋរងគ្រោះដែរ»។
បើតាមលោក កញ្ចនា រយៈពេល ២ ខែក្នុងឆ្នាំ ២០២១ នេះនៅក្នុងស្រុកកំពង់ស្វាយបានទទួលរងគ្រោះទ្រង់ទ្រាយធំ ដោយសារខ្យល់កន្ត្រាក់នេះមានចំនួន ២ លើករួចមកហើយ គឺនៅក្នុងខែមិថុនាមានផ្ទះប្រមាណជាជិត ៦០ ខ្នង ដែលរងគ្រោះរលំផ្ទះ និងរបើកដំបូល និងមានស្លាប់ស្ត្រីម្នាក់ដែរ។
ដោយឡែកលោក លឹម ធាង នាយករដ្ឋបាលសាលាស្រុក កំពង់ស្វាយក៏បានប្រាប់នៅថ្ងៃទី ៦ កក្កដាដែរថា ករណីនេះគឺអាជ្ញាធរស្រុកកំពង់ស្វាយបានចុះស្រង់ស្ថិតិគ្រួសារពលរដ្ឋរងគ្រោះនៅក្នុងឃុំទាំង ៣ នោះហើយ ដើម្បីដោះស្រាយបន្តទៀត ខណៈរបាយការណ៍ចំនួនផ្ទះរងគ្រោះមាន ១០១ ខ្នងផ្ទះ។
លោកថា៖ «ខាងមន្ត្រីស្រុកបានចុះវាយតម្លៃពីទំហំនៃការខូចខាតផ្ទះថា តើធ្ងន់ប៉ុន្មានភាគរយ និងមធ្យមប៉ុន្មានភាគរយ»៕