កែបៈ អភិបាលខេត្តកែបបានបញ្ជាឱ្យបណ្តារដ្ឋបាលស្រុក និងមន្ទីរពាក់ព័ន្ធទាំងអស់ ធ្វើសកម្មភាពចុះផ្អាកអាជីវកម្មផលិតស្រា ដែលគ្មានច្បាប់អនុញ្ញាតពីក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍នៅក្នុងភូមិសាស្ត្រទូទាំងខេត្ត បន្ទាប់ពីមានករណីពលរដ្ឋនៅក្នុងខេត្តកំពតដែលជាខេត្តជិតខាងគ្នា បានពុលស្រាស្លាប់ជាបន្តបន្ទាប់រហូតដល់ ១២ នាក់។
ក្នុងលិខិតផ្ញើជូនគ្រប់អភិបាលស្រុក និងមន្ទីរពាក់ព័ន្ធនៅថ្ងៃទី ៦ ខែ កក្កដា ឆ្នាំ ២០២១ លោក សោម ពិសិដ្ឋ អភិបាលខេត្តកែបសរសេរថា ដើម្បីចៀសវាងការលក់ និងចរាចរចែកចាយស្រាក្លែងក្លាយ ឬការផលិតស្រា ដោយមិនអនុវត្តតាមបច្ចេកទេសត្រឹមត្រូវ និងគ្មានច្បាប់អនុញ្ញាតអាជីវកម្មពីក្រសួងឧស្សាហកម្ម វិទ្យាសាស្ត្របច្ចេកវិទ្យា និងនវានុវត្តន៍ ដែលអាចបង្កឱ្យមានគ្រោះថ្នាក់ដល់អាយុជីវិតបងប្អូនប្រជាពលរដ្ឋ រដ្ឋបាលខេត្តសូមឱ្យលោកប្រធានមន្ទីរ និងលោកស្រីអភិបាលនៃគណៈអភិបាលក្រុង ស្រុកពិនិត្យ និងធ្វើការផ្អាកអាជីវកម្មផលិតស្រាទាំងឡាយណាដែលគ្មានច្បាប់អនុញ្ញាតអាជីវកម្មពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងត្រូវណែនាំដល់ម្ចាស់អាជីវកម្មឱ្យសុំអនុញ្ញាតច្បាប់ប្រកបអាជីវកម្ម។
លោក អ៊ឹង វុទ្ធី នាយករដ្ឋបាលខេត្តកែបប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែកក្កដាថា លោក សោម ពិសិដ្ឋបានចេញលិខិតនេះឱ្យបណ្តាស្រុក និងមន្ទីរពាក់ព័ន្ធចុះបិទ និងពិនិត្យមើលទីតាំងអាជីវកម្មផលិតស្រា នៅក្នុងខេត្តនេះ បន្ទាប់ពីខេត្តកំពតមានករណីពលរដ្ឋពុលស្រាស្លាប់ជាបន្តបន្ទាប់ដែលខ្លាចមានការរាលដាលដល់ខេត្តកែបទៀត។
ម្យ៉ាងទៀត ចំពោះការលក់ស្រា ឬគ្រឿងស្រវឹងនេះត្រូវបានរដ្ឋបាលខេត្តប្រកាសឱ្យបិទយូរណាស់មកហើយ ព្រោះខ្លាចពលរដ្ឋប្រមូលផ្ដុំគ្នាពិសាស្រា ឬស្រាបៀរ ដែលអាចមានការឆ្លងជំងឺកូវីដ ១៩។ ដោយឡែកចំពោះការចេញសេចក្តីជូនដំណឹងដល់អាជ្ញាធរពាក់ព័ន្ធចុះបិទ និងពិនិត្យនេះក៏ជាការក្រើនរំឭកបន្ថែមទៀត និងដើម្បីមានវិធានការទាន់ពេលវេលា ។
លោក អ៊ឹង វុទ្ធីបញ្ជាក់ទៀតថា សម្រាប់ខេត្តកែបមិនដែលមានករណីពលរដ្ឋពុលស្រាដូចខេត្តកំពត ឬខេត្តផ្សេងៗទេហើយកន្លងមកនេះ អាជ្ញាធរក៏បានចុះទៅណែនាំ អប់រំ ដល់ម្ចាស់អាជីវកម្ម និងអ្នកលក់ដូរផងដែរ។ «បច្ចុប្បន្នឯកឧត្តមអភិបាលខេត្តបានឱ្យមន្ទីរជំនាញសហការជាមួយនឹងស្រុក ដើម្បីចុះស្រាវជ្រាវ និងធ្វើកំណត់ហេតុ ដើម្បីមានវិធានការទប់ស្កាត់ ក្រែងលោមានករណីពុលស្រានេះដូចនៅខេត្តកំពត»។
បើតាមលោក អ៊ឹង វុទ្ធី ការផលិតស្រាស ឬស្រាថ្នាំរបស់ពលរដ្ឋមួយចំនួន មិនមានការត្រួតពិនិត្យត្រឹមត្រូវនោះទេ។ ម្យ៉ាងទៀត ពលរដ្ឋចូលចិត្តផឹកស្រាស ឬស្រាថ្នាំនេះ ដោយសារវាមានតម្លៃធូរថ្លៃ និងឆាប់ស្រវឹង។
ចំពោះករណីពុលស្រានៅក្នុងកំពតលោក លន សុខា មេឃុំស្វាយទងខាងត្បូង ស្រុកកំពង់ត្រាច ឱ្យដឹងថា គិតត្រឹមថ្ងៃទី ៦ ខែកក្កដា ពលរដ្ឋដែលពុលស្រានៅក្នុងមូលដ្ឋានរបស់លោកមិនមានអ្នកស្លាប់ថ្មីបន្តទៀតនោះទេ ពោលគឺស្លាប់តែ ១២ នាក់។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប» បានអំពាវនាវដល់ប្រជាពលរដ្ឋ ដែលជាអ្នកផលិតស្រា ត្រូវយកចិត្តទុកដាក់ ផលិតតាមបច្ចេកទេសឱ្យបានត្រឹមត្រូវ ចៀសវាងការយកសារធាតុផ្សេងៗមកបន្ថែម ដែលនាំឱ្យប៉ះពាល់ដល់សុខភាព និងអាយុជីវិតរបស់ពលរដ្ឋ និងត្រូវប្រឈមចំពោះមុខច្បាប់ថែមទៀត។
ជាមួយគ្នានេះ អគ្គនាយកដ្ឋាន ក.ប.ប ក៏បានអំពាវនាវដល់ប្រជាពលរដ្ឋទាំងអស់ ដើម្បីសុខភាព និងអាយុជីវិត ត្រូវប្រុងប្រយ័ត្ន និងកុំជាវស្រាស ឬស្រាថ្នាំ ដែលគ្មានស្លាកសញ្ញា និងគ្មានប្រភពត្រឹមត្រូវ ច្បាស់លាស់ យកមកប្រើប្រាស់ ឬបរិភោគជាដាច់ខាត ព្រោះវាអាចបណ្តាលឱ្យបាត់បង់ជីវិតដូចករណីនៅខេត្តកំពត ខេត្តកណ្តាល និងខេត្តផ្សេងទៀត៕