ភ្នំពេញៈ ក្រុមការងារក្រសួងបរិស្ថាន និងក្រុមអ្នកច្បាប់នៃទីស្តីការគណៈរដ្ឋមន្ត្រីបានឯកភាពកែសម្រួលខ្លឹមសារ និងការប្រើប្រាស់ពាក្យពេចន៍មួយចំនួនលើសេចក្តីព្រាងអនុក្រឹត្យ ស្តីពីការរៀបចំ និងការប្រព្រឹត្តទៅរបស់ក្រសួងបរិស្ថាន ហើយនឹងរៀបចំកិច្ចប្រជុំបន្តនៅចុងសប្តាហ៍នេះ ដើម្បីពិភាក្សាលើសេចក្តីព្រាងអនុក្រឹត្យដែលនៅសេសសល់។
ការឯកភាពនេះបានធ្វើឡើងក្នុងកិច្ចប្រជុំតាមអនឡាញ (Zoom) កាលពីថ្ងៃទី ៥ ខែកក្កដា ដែលក្រុមការងារក្រសួងបរិស្ថាន ដឹកនាំដោយលោក សៅ សុភាព រដ្ឋលេខាធិការក្រសួងបរិស្ថាន។
ទំព័រហ្វេសប៊ុករបស់ក្រសួងបរិស្ថានបានឱ្យដឹងថា កិច្ចប្រជុំនេះគឺដើម្បីបន្តពិនិត្យ ពិភាក្សា និងកែសម្រួល សេចក្តីព្រាងអនុក្រឹត្យ ស្តីពីការរៀបចំ និងការប្រព្រឹត្តទៅរបស់ក្រសួងបរិស្ថាន និងសេចក្តីព្រាងព្រះរាជក្រឹត្យស្តីពីការកែសម្រួលមាត្រា ១០ នៃព្រះរាជក្រឹត្យស្តីពីការរៀបចំ និងការប្រព្រឹត្តទៅរបស់ក្រុមប្រឹក្សាជាតិអភិវឌ្ឍន៍ដោយចីរភាព។
ក្រសួងបរិស្ថានបន្តថា៖ «ជាលទ្ធផល អង្គប្រជុំបានឯកភាពកែសម្រួលខ្លឹមសារ និងការប្រើប្រាស់ពាក្យពេចន៍មួយចំនួន ដោយបានបញ្ចប់ត្រឹមជំពូកទី ៨ មាត្រា ៤០ និងឯកភាពរៀបចំ កិច្ចប្រជុំនៅថ្ងៃទី ៨ ខែកក្កដា»។
អនុក្រឹត្យស្តីពីការរៀបចំ និងការប្រព្រឹត្តទៅរបស់ក្រសួងបរិស្ថាន ចុះថ្ងៃទី ៥ ខែ កក្កដា ឆ្នាំ ២០១៦ គឺមាន ១៥ ជំពូក និង ៤៩ មាត្រា ចំណែកព្រះរាជក្រឹត្យស្តីពីការរៀបចំ និងការប្រព្រឹត្តទៅរបស់ក្រុមប្រឹក្សាជាតិអភិវឌ្ឍន៍ដោយចីរភាព ចុះថ្ងៃទី ៩ ឧសភា ឆ្នាំ ២០១៥ គឺមានចំនួន ៦ ជំពូក និង ១៤ មាត្រា។
លោក នេត្រ ភក្ត្រា អ្នកនាំពាក្យក្រសួងបរិស្ថានថ្លែងនៅថ្ងៃទី ៦ កក្កដាថា នេះគឺជាផ្នែកមួយនៃកំណែទម្រង់ផ្ទៃក្នុងក្រសួងបរិស្ថាន និងកែសម្រួល រចនាសម្ព័ន្ធការងារគ្រប់គ្រង និងតួនាទីភារកិច្ចរបស់អង្គភាពក្រោមចំណុះ។
«ការកែសម្រួលនេះ គឺសំដៅបង្កើនប្រសិទ្ធភាពកាន់តែខ្លាំងរបស់ក្រសួងក្នុងការបំពេញការងារដោយផ្តោតលើកិច្ចគាំពារបរិស្ថានការគ្រប់គ្រងធនធានធម្មជាតិ ការអភិរក្សជីវចម្រុះ និងការអភិវឌ្ឍដោយចីរភាព ក៏ដូចជាបង្កើនប្រសិទ្ធភាពក្នុងការបំពេញការងារ»៕