កំពតៈ នគរបាលស្រុកកំពង់ត្រាច កំពុងតាមចាប់បុរសចំណាស់ម្នាក់ ដែលបានរត់គេចខ្លួនកាលពីថ្ងៃទី ២ ខែកក្កដា ពាក់ព័ន្ធករណីចាប់រំលោភក្មេងស្រីម្នាក់អាយុ១៣ឆ្នាំ ធ្វើឱ្យមានផ្ទៃពោះ នៅឃុំព្រែកក្រឹស ស្រុកកំពង់ត្រាច ខេត្តកំពត។
លោក ចែម ពិសី អធិការរង នៃអធិការដ្ឋាននគរបាលស្រុកកំពង់ត្រាច ឱ្យដឹងនៅរសៀលថ្ងៃទី ៧ កក្កដាថា ជនសង្ស័យឈ្មោះ ង៉ែត យន អាយុ ៥៣ ឆ្នាំ ។
រីឯក្មេងស្រីរងគ្រោះឈ្មោះ ម.ថ អាយុ ១៣ ឆ្នាំ ដែលទាំងជនល្មើស និងក្មេងរងគ្រោះ រស់នៅក្នុងឃុំ ព្រែកក្រឹស ស្រុកកំពង់ត្រាច ជាមួយគ្នា។
លោកបញ្ជាក់ថា៖ «ករណីនេះ ខាងសមត្ថកិច្ចរបស់ខ្ញុំ កំពុងតាមចាប់ព្រោះយើងស្គាល់អត្តសញ្ញាណជនល្មើសហើយ។ ទោះគាត់គេចដល់ទីណា ក៏មិនយូរមិនឆាប់ទេ នឹងជាប់សំណាញ់ច្បាប់មិនខាន»។
លោក ពិសី បានប្រាប់ឱ្យដឹង ដោយយោងតាមសម្តីម្តាយក្មេងរងគ្រោះថា រយៈពេលប៉ុន្មានខែមុន ក្នុងឆ្នាំ ២០២១ ម្តាយក្មេងរងគ្រោះ បានឱ្យនាងទៅដេកកំដរមើលថែយាយ (ខាងម្តាយ) នៅក្នុងភូមិមួយទៀត តែស្ថិតក្នុងឃុំព្រែកក្រឹសជាមួយគ្នា។
ក្រោយមកស្ត្រីជាម្តាយ ក៏យកកូន(ក្មេងរងគ្រោះ)មកផ្ទះវិញ។ លោកបន្តថា ពេលរស់នៅជាមួយម្តាយគឺនាងចេះតែមានអាការៈខុសប្រក្រតី និងពោះមានលក្ខណៈធំខុសធម្មតា។
ក្នុងថ្ងៃទី ២ ខែ កក្កដា ឆ្នាំ ២០២១ ស្ត្រីជាម្តាយ ក៏យកក្មេងរងគ្រោះ ទៅពិនិត្យនៅមណ្ឌលសុខភាព ឃុំព្រែកក្រឹសតែមិនអស់ចិត្ត ក៏ទៅពិនិត្យនៅមន្ទីរពេទ្យខេត្តកំពតទៀត។
លទ្ធផលបង្ហាញថា ក្មេងរងគ្រោះមានផ្ទៃពោះ ប៉ុន្តែលោកមិនចាំថា ប៉ុន្មានខែនោះទេ។
លោកបន្តទៀតថា ស្ត្រីជាម្តាយ បានជជីកសួរកូន (ក្មេងរងគ្រោះ) ប្រាប់ថា តាឈ្មោះ ង៉ែត យន បានចាប់នាងរំលោភក្នុងព្រៃ តែគាត់ហាមមិនឱ្យនាងនិយាយប្រាប់អ្នកណាទេ ហើយបើរឿងនេះដឹងដល់គេគាត់ (ជនសង្ស័យ) នឹងសម្លាប់ចោល។
លោកបញ្ជាក់ថា ក្រោយស្ត្រីជាម្តាយដឹងហេតុការណ៍ និងដឹងពីទង្វើអាក្រក់របស់ជនសង្ស័យមក ក៏នាំកូនទៅប្តឹងនៅប៉ុស្តិ៍នគរបាលឃុំព្រៃកក្រឹស ប៉ុន្តែដោយជនសង្ស័យដឹងខ្លួនមុន ក៏នាំប្រពន្ធកូនគេចខ្លួនបាត់ នៅថ្ងៃទី២ខែកក្កដា ដោយសារជនសង្ស័យដឹងថា រឿងនេះបានបែកការណ៍ហើយនោះ៕