ឧត្ដរមានជ័យៈមន្ត្រីជំនាញខេត្តឧត្តរមានជ័យ បានស្តារពើក និង ដីកាប់ឆ្ការត្រួសត្រាយព្រៃសម្អាតស្រះទឹកបុរាណមួយដែលជាកេរដំណែលបន្សល់ទុកតាំងពីសម័យអង្គរ នៅក្នុងភូមិក្ទម្ព សង្កាត់កូនក្រៀល ក្រុងសំរោង ខេត្តឧត្តរមានជ័យ ដើម្បីលើកតម្កើងស្នាដៃរបស់បុព្វបុរសខ្មែរ ដោយគ្រោងនឹងបញ្ចប់ក្នុងរយៈពេល១ខែ ក្រោមការគាំទ្រផ្នែកហិរញ្ញវត្ថុពីកិច្ចសហប្រតិបត្តិការអាល្លឺម៉ង់ (GIZ)។
កាលពីថ្ងៃទី៥ ខែកក្កដា លោកហុង យឿន ប្រធានមន្ទីរវប្បធម៌និងវិចិត្រសិល្បៈខេត្តឧត្តរមានជ័យនិងមន្ត្រីជំនាញពាក់ព័ន្ធបានរៀបចំពិធីសែនព្រេនសុំម្ចាស់ទឹកម្ចាស់ដីអារក្ខ អារក្ស អ្នកតាថែរក្សាប្រាសាទល្បើក(ល្បើកស្មោច)និងស្រះបុរាណនៅក្នុងភូមិស្រាស្ត្រខាងលើនេះ។ពិធីនេះគឺដើម្បីសុំកាប់ឆ្ការត្រួសត្រាយព្រៃ និង ស្តារពើកសម្អាតបរិវេណស្រះក្នុងន័យបង្កើនសោភណភាពនិងលើកតម្កើងនូវស្នាដៃរបស់បុព្វបុរសខ្មែរ ដែលបានបន្សល់ទុកឱ្យកូនចៅជំនាន់ក្រោយបានស្គាល់ និងសិក្សាស្វែងយល់ពីកេរដំណែលទាំងនោះ។
តាមទំព័រហ្វេសប៊ុករបស់មន្ទីរវប្បធម៌និងវិចិត្រសិល្បៈខេត្តឧត្តរមានជ័យ បានឲ្យដឹងថា ស្រះបុរាណនេះគឺមានទំហំ ៤៥០ម x ២៨០ម គិតទាំងទំនប់ព័ទ្ធជុំវិញ ហើយតាមគម្រោង មន្ត្រីជំនាញនឹងស្តារពើកនិងដីកាប់ឆ្ការត្រួសត្រាយព្រៃសម្អាតស្រះទឹកបុរាណ រយៈពេល ១ខែ។
ទំព័រហ្វេសប៊ុកដដែលបានបញ្ជាក់ថា«តាមរយៈការស្រាវជ្រាវរបស់មន្ត្រីបុរាណវិទ្យានៃមន្ទីរវប្បធម៌ និង វិចិត្រសិល្បៈខេត្តបានបញ្ជាក់ថា ស្រះនេះកសាងឡើងនៅសម័យអង្គរអំឡុងប្រហែលពាក់កណ្តាល សតវត្សទី ១។ បើយើងសរសេរថាស្តារស្រះ អ្នកអានអាចយល់ច្រឡំថា យើងកាយដីឬបារដីចេញពីស្រះ។ តែនេះគម្រោងយើងស្តារយកតែពើក និងស្មៅរុក្ខជាតិដែលដុះនៅខាងក្នុងស្រះ និងកាប់ត្រួសត្រាយព្រៃដុប ជុំវិញតែប៉ុណ្ណោះ»។
លោក ហុង យឿន ប្រធានមន្ទីរវប្បធម៌ និងវិចិត្រសិល្បៈខេត្តឧត្តរមានជ័យ បានប្រាប់ភ្នំពេញប៉ុស្តិ៍ នៅថ្ងៃទី ៧ កក្កដាថា ការកាប់ឆ្ការត្រួសត្រាយព្រៃ និង ស្តារពើកសម្អាតបរិវេណបុរាណដ្ឋាននេះ គឺបានទទួលការជួយឧបត្ថម្ភថវិកាពីរដ្ឋបាលខេត្ត ឧត្តរមានជ័យ ក្រោមជំនួយពី“កិច្ចសហប្រតិបត្តិការអាល្លឺម៉ង់ (GIZ) តាមរយៈរដ្ឋបាលខេត្ត ឧត្តរមានជ័យ។
លោកបានបន្តថា៖«គម្រោងនេះ គឺស្ថិតក្នុងកម្មវិធីអភិវឌ្ឍន៍សេដ្ឋកិច្ចមូលដ្ឋានដំណាក់កាលទី៤ ខេត្តឧត្តរមានជ័យ លើគម្រោង “ស្តារជីវភាពរស់នៅរបស់ប្រជាពលរដ្ឋមាតុភូមិនិវត្តន៍ពីប្រទេសថៃដែលរងផលប៉ះពាល់ដោយសារវិបត្តិកូវីដ១៩” ដែលអនុវត្តគម្រោងដោយមន្ទីរវប្បធម៌ និងវិចិត្រសិល្បៈខេត្តឧត្តរមានជ័យ»។
លោក លន់ ណុច ចៅសង្កាត់កូនក្រៀល ក្រុងសំរោង ខេត្តឧត្តរមានជ័យ បានប្រាប់ភ្នំពេញប៉ុស្តិ៍នៅថ្ងៃទី៧ កក្កដាថា តំបន់នៃស្រះនេះ គឺមានទាំងប្រាសាទបុរាណដែលវាបានក្លាយជាតំបន់ទេសចរណ៍មួយដ៏ពេញនិយមរបស់ពលរដ្ឋនៅក្នុងតំបន់ដោយពួកគាត់តែងមកទស្សនាជាប្រចាំ។
លោកបន្តថា ការស្តារស្រះ អាចជាការលើកតម្លៃ សោភណភាព និងជាការរក្សាទ្រង់ទ្រាយស្រះឲ្យនៅដដែល ស្របពេលដែលស្រះនេះ មិនធ្លាប់មានការស្តារជាថ្មីម្តងណាឡើយ។
លោកបានបញ្ជាក់ថា៖«នេះជាបេតិកភណ្ឌមួយដែលមាននៅក្នុងខេត្ត ហើយឃើញថា ជារបស់បុរាណ ដែលប្រជាពលរដ្ឋ គាត់ទទួលស្គាល់ តាំងពីណាពីណីមក…»៕