កំពតៈ ប្រជាពលរដ្ឋដែលពុលស្រាជិត ៣០ នាក់ ស្ថិតនៅភូមិកោះឈ្វាំង ឃុំស្វាយទងខាងត្បូង ស្រុកកំពង់ត្រាច បានត្រឡប់មកកាន់លំនៅឋានវិញហើយ បន្ទាប់ពីទទួលបានការព្យាបាលពីក្រុមគ្រូពេទ្យ ខណៈអ្នកលក់ស្រាស និងស្រាថ្នាំចំនួន ៦ នាក់ ត្រូវបានធ្វើកិច្ចសន្យា បន្ទាប់ពីមានករណីពុលស្រាស្លាប់ចំនួន ១២ នាក់។
លោក ថា គង់ មេប៉ុស្តិ៍ ឃុំស្វាយទងខាងត្បូង ប្រាប់ ភ្នំពេញ ប៉ុស្តិ៍ នៅថ្ងៃទី ៧ ខែកក្កដាថា អាជ្ញាធរបានឱ្យអ្នកលក់ស្រាស និងស្រាថ្នាំ ទាំងអស់ផ្អាកការលក់ និងធ្វើកិច្ចសន្យាចំនួន ៦ នាក់ ។ ប៉ុន្តែសម្រាប់អ្នកផលិតវិញ លោក មិនបានដឹងនោះទេ ព្រោះស្ថិតនៅមូលដ្ឋានឃុំផ្សេង។
លោក ថា គង់ ថ្លែងថា៖ «យើងបានធ្វើកិច្ចសន្យា ដោយមានការថតរូបទុក និងមានអាជ្ញាធររួមមានជាមួយមេឃុំ ដឹងលឺ និងណែនាំពួកគាត់បានត្រឹមត្រូវ។ បើមានលក់ទៀត យើងខ្ញុំសុំយោបល់ថ្នាក់លើដកហូត និងមានវិធានការជាក់ស្តែង»។
ទោះជាយ៉ាងលោក ថា គង់ បញ្ជាក់ថា នៅក្នងមូលដ្ឋានឃុំរបស់លោក មិនមានទីតាំងលក់ស្រាស ឬស្រាថ្នាំនេះច្រើននោះទេ ហើយកន្លែងដែលមានពលរដ្ឋស្លាប់នោះ គឺនៅឆ្ងាយ ហើយអាជ្ញាធរមិនបានចុះទៅពិនិត្យមើលសព្វគ្រប់ ដោយពួកគាត់បាននាំយកស្រាពីទីតាំងផ្សេងមកពិសារបានធ្វើឱ្យមានករណីពុលកើតឡើង ។
បើតាមលោក ថា គង់ សម្រាប់អ្នកលក់នៅក្នុងមូលដ្ឋានរបស់លោក បានធ្វើកិច្ចសន្យាម្តងរួចហើយ ចាប់តាំងពីមានករណីពលរដ្ឋពុលស្រាស្លាប់ និងសង្គ្រោះបន្ទាន់នៅឃុំផ្សេង។ ក្រៅអំពីអ្នកស្លាប់ ចំពោះករណីពលរដ្ឋនៅក្នុងឃុំ ដែលជាប់ពាក់ព័ន្ធនឹងពុលស្រាជិត ៣០ នាក់ បានត្រឡប់មកកាន់ផ្ទះវិញហើយ។
លោក លន សុខា មេឃុំស្វាយទងខាងត្បូងឱ្យដឹងដែរថា គិតត្រឹមថ្ងៃទី ៧ ខែកក្កដា ប្រជាពលរដ្ឋដែលរស់នៅក្នុងឃុំរបស់លោកមិនមានករណីស្លាប់ទៀតនោះទេ ខណៈអ្នកសម្រាកព្យាបាលនៅមន្ទីរពេទ្យក៏បានវិលត្រឡប់មកកាន់ទីលំនៅឋានរបស់ខ្លួនវិញអស់ហើយដែរ។
បើតាមលោក លន សុខា ករណីពលរដ្ឋពុលស្រាស្ថិតនៅភូមិកោះឈ្វាំង ឃុំស្វាយទងខាងត្បូង ស្រុកកំពង់ត្រាច ខេត្តកំពត បានកើតឡើង ចាប់តាំងពីយប់ថ្ងៃទី ២ និងស្លាប់ជាបន្តបន្ទាប់ចាប់តាំងពីថ្ងៃទី ៣ ខែកក្កដា មាន ១២ នាក់ និងអ្នកផ្សេងទៀតត្រូវបានក្រុមគ្រូពេទ្យសង្គ្រោះជីវិតបានទាន់ពេល។
បន្ទាប់ពីមានករណីពុលស្រាក្នុងចំណោមប្រជាពលរដ្ឋបណ្តាលឱ្យគ្រោះថ្នាក់ដល់អាយុជីវិត ជាបន្តបន្ទាប់ លោក ជាវ តាយ អភិបាលខេត្តកំពត កាលពីថ្ងៃទី ៥ ខែកក្កដា បានចេញសេចក្តីប្រកាសឱ្យអាជ្ញាធរពាក់ព័ន្ធ ផ្អាកអាជីវកម្មផលិតស្រា ដែលគ្មានច្បាប់អនុញ្ញាតពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅទូទាំងខេត្ត៕