.jpg)
ក្មេងស្រីដែលគេអះអាងថា ស្លាប់ដោយសាររថភ្លើងកិន នៅខេត្តពោធិ៍សាត់ កាលពីយប់ទៀបភ្លឺថ្ងៃទី ៧ កក្កដា។ រូបថត ហ្វេសប៊ុក
ភ្នំពេញៈ ក្មេងស្រីម្នាក់បានស្លាប់នៅនឹងកន្លែងកើតហេតុ ខណៈក្មេងប្រុសម្នាក់ទៀតរងរបួសដាច់ម្រាមដៃឆ្វេង ២ និងត្រូវរបួសក្បាលតិចតួចដោយសាររថភ្លើងកិន នៅពេលពួកគេកំពុងដេកលក់នៅលើផ្លូវរថភ្លើងកាលពីវេលាម៉ោង ៤ ទៀបភ្លឺ ថ្ងៃទី ៧ កក្កដានេះ នៅខាងកើតផ្លូវរមណីយដ្ឋានទឹកធ្លាក់ច្រកល្អៀង ចម្ងាយប្រមាណ ១៥០ ម៉ែត្រ ស្ថិតក្នុងភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់។
លោក ឯម រុន អធិការនគរបាលស្រុកក្រគរ ប្រាប់ ភ្នំពេញ ប៉ុស្តិ៍ នៅថ្ងៃនេះថា តាមការបញ្ជាក់ពីភ្នាក់ងារសម្រួលចរាចរណ៍លើដងផ្លូវ ដែលមានរថភ្លើងឆ្លងកាត់ គឺនៅវេលាម៉ោង ៤ ទៀបភ្លឺ ថ្ងៃទី ៧ ខែកក្កដា មានរថភ្លើង ១ ខ្សែ បានធ្វើចរាចរណ៍ក្នុងទិសដៅពីលិចទៅកើត។ លុះព្រឹកឡើងស្រាប់តែទទួលដំណឹងថា មានមនុស្សត្រូវរថភ្លើងកិន បណ្តាលឲ្យក្មេងស្រីម្នាក់ស្លាប់ និងក្មេងប្រុសម្នាក់របួស។
លោកអធិការបានឲ្យដឹងទៀតថា សមត្ថកិច្ចជំនាញបានទៅដល់កន្លែងកើតហេតុ ហើយធ្វើការពិនិត្យច្បាស់លាស់ឃើញថា ជនរងគ្រោះត្រូវបានរថភ្លើងកិនប្រាកដមែន។ ក្នុងករណីគ្រោះថ្នាក់នេះ មានជនរងគ្រោះម្នាក់ភេទស្រីបានដេកកើយលើផ្លូវរថភ្លើងត្រូវបានរថភ្លើងកិនចំកនិងក្បាល។ ចំណែកឯជនរងគ្រោះម្នាក់ទៀតភេទប្រុស ត្រូវរថភ្លើងកិនបណ្តាលឲ្យរងរបួសដាច់ម្រាមដៃខាងឆ្វេង ២ ម្រាម និងរបួសក្បាលតិចតួច។
លោកថ្លែងថា៖ «តាមការឲ្យដឹងពីសាច់ញាតិរបស់ក្មេងៗ២នាក់បងប្អូនហ្នឹងគេថា ឲ្យតែម៉ោង ៣ ម៉ោង ៤ ២ នាក់គ្នាវាហ្នឹង គឺចេញដើរទៅរករើសអេតចាយហើយ។ ដល់ពេលវាដើរៗទៅទំនងជាអត់ងងុយផង អីផងក៏ដេកលេង ហើយក៏លក់ទៅ។ រាល់ដងអាងតែមិនអី ក៏ចេះតែដេកទៅ តែដល់ថ្ងៃហ្នឹង រថភ្លើងមកក៏កិនបណ្តោយទៅ។ ករណីហ្នឹងយើងបានស្រាវជ្រាវច្បាស់លាស់អស់ហើយ មិនមែនជាករណីអីផ្សេងពីរថភ្លើងកិននោះទេ»។
បើតាមលោកអធិការ ជនរងគ្រោះទាំង ២ នាក់ ម្នាក់មានឈ្មោះ ញ៉ាញ់ អិត ភេទស្រី អាយុ ១៣ ឆ្នាំ ស្លាប់នៅកន្លែងកើតហេតុ ចំណែកម្នាក់ទៀត ឈ្មោះញ៉ាញ់ ញៀន ភេទប្រុសអាយុ ៨ ឆ្នាំ រងរបួសដាច់ម្រាមដៃខាងឆ្វេង២ម្រាម និងរងរបួសក្បាល ត្រូវបានបញ្ជូនទៅព្យាបាលនៅមណ្ឌលសុខភាពឈើតុំ។ ជនរងគ្រោះទាំង២នាក់នេះត្រូវជាបងប្អូនបង្កើតនឹងគ្នា មានទីលំនៅភូមិចាមចាស់ ឃុំឈើតុំស្រុកក្រគរ ខេត្តពោធិ៍សាត់។
លោក ឯម រុន បញ្ជាក់ថា នៅវេលាម៉ោង ១០ ព្រឹកថ្ងៃទី ៧ ខែកក្កដា សពក្មេងៗរងគ្រោះត្រូវបានសមត្ថកិច្ចធ្វើកំណត់ហេតុ និងប្រគល់ជូនក្រុមគ្រួសារ ដើម្បីយកទៅធ្វើបុណ្យតាមប្រពៃណី។
លោកថ្លែងថា៖ «រឿងហេតុកើតឡើងនៅពេលងងឹត។ ខ្ញុំបានដឹងរឿងនៅម៉ោង៦ភ្លឺទៅហើយ ទម្រាំចុះមកពិនិត្យមើលលិចកើត ម៉ោង ១០ ជាងបានរបាយការណ៍ពិតប្រាកដ រាយការណ៍ទៅថ្នាក់លើអីហើយអស់ ទើបប្រគល់ជូនក្រុមគ្រួសារជនរងគ្រោះ»៕
