ភ្នំពេញៈ មន្ត្រីនៃក្រសួងប្រៃសណីយ៍ និងទូរគមនាគមន៍បានឱ្យដឹងថា ដោយមានតម្រូវការនូវឧបករណ៍តេស្តអង់ទីហ្សែនកូវីដ ១៩ ពីបណ្តាក្រុមហ៊ុន និងស្ថាប័នជាច្រើនបន្តបន្ទាប់ ក្រសួងបានបញ្ជាទិញឧបករណ៍តេស្តរហ័សនេះប្រមាណជា ៨០ ម៉ឺនតេស្តបន្ថែមទៀត សម្រាប់ផ្គត់ផ្គង់នូវតម្រូវការនេះ។
លោក ម៉ុក រ៉ាឌី អគ្គនាយកនៃអគ្គនាយករដ្ឋបាលក្រសួងប្រៃសណីយ៍ និងទូរគមនាគមន៍បានលើកឡើងកាលពីថ្ងៃទី ៦ ខែកក្កដា ថា គិតត្រឹមថ្ងៃទី ៦ ខែកក្កដា ក្រសួងប្រៃសណីយ៍ និងទូរគមនាគមន៍បានធ្វើការសម្របសម្រួលទៅលើការចែកចាយបន្តនូវឧបករណ៍តេស្តរហ័ស ដោយក្រសួងបានទទួលការបញ្ជាទិញចំនួន ១ ៤០៥ សំណើ ដែលគិតជាបរិមាណបញ្ជាទិញប្រមាណជា ៤០ ម៉ឺនឧបករណ៍តេស្ត។
លោកថា ក្នុងរយៈពេល ៥ ថ្ងៃកន្លងមកនេះដែរ មានឧបករណ៍ចំនួនប្រមាណជា ១០៥ ០០០ តេស្ត ត្រូវបានលក់ជូនក្រុមហ៊ុន ស្ថាប័នដែលបានដាក់សំណើទិញរួចរាល់ហើយផងដែរ។
លោក រ៉ាឌី ថ្លែងថា៖ «បើតាមសម្ទុះនៃតម្រូវការ ហើយតាមការព្យាករក្នុងរយៈពេល ១ ទៅ ២ សប្តាហ៍ខាងមុខទៀតនេះ យ៉ាងតិចក៏ត្រូវការឧបករណ៍តេស្តប្រមាណជា ៨០ ម៉ឺនតេស្តដែរ ដែលយើងត្រូវធ្វើការបម្រុងសម្រាប់ផ្គត់ផ្គង់តម្រូវការរបស់ក្រសួង ស្ថាប័នផ្សេងៗដែលបានដាក់សំណើមកក្រសួង»។
លោក រ៉ាឌី ថ្លែងថា ជាមធ្យមក្នុង ១ ថ្ងៃមានប្រមាណជាជាង ១០០ ក្រុមហ៊ុន និងស្ថាប័នបានមកដល់ក្រសួងផ្ទាល់ ដើម្បីធ្វើការស្នើទិញឧបករណ៍តេស្តរហ័សអង់ទីហ្សែនកូវីដ ១៩ នេះ។ ក្នុង ១ សប្តាហ៍ ក្រសួងប្រៃសណីយ៍ និងទូរគមនាគមន៍ទទួលទំនិញពីរោងចក្រផលិតឧបករណ៍តេស្តរហ័សនេះ ចំនួន ២ ដង គឺរៀងរាល់ថ្ងៃអង្គារ និងថ្ងៃព្រហស្បតិ៍ ដោយសារតែរោងចក្រនៅប្រទេសកូរ៉េខាងត្បូងដែលផលិតឧបករណ៍នេះត្រូវបានក្រសួងសុខាភិបាលរបស់កម្ពុជាបានសម្រេចឱ្យប្រើប្រាស់ឧបករណ៍នេះ ហើយអង្គការស្ថាប័នធំៗលើពិភពលោក ដូចជាអង្គការសុខភាពពិភពលោកក៏ទទួលស្គាល់ឧបករណ៍តេស្តនេះផងដែរ។
លោក រ៉ាឌី បានឱ្យដឹងចំនួននៃសំណើទិញទៅកាន់រោងចក្រផ្ទាល់មានជាង ១០០ ប្រទេសបានសម្រុកបញ្ជាទិញ ដែលធ្វើឱ្យបរិមាណនៃការទទួលបានគឺមិនទាន់ឆ្លើយតបទាន់នឹងតម្រូវការបាន ១០០% ទេ។
លោកក៏បានបញ្ជាក់ផងដែរថា នៅតាមក្រុមគ្រួសារនានាក៏មានការដាក់សំណើទិញឧបករណ៍តេស្តច្រើនដែរ ប៉ុន្តែជាគោលការណ៍ ក្រសួងផ្តល់អាទិភាពទៅដល់ក្រុមហ៊ុន ស្ថាប័នដែលមានបុគ្គលិកច្រើនហើយកំពុងតែមានហានិភ័យ ដូចនេះនៅតាមគ្រួសារ គឺនឹងធ្វើការដោះស្រាយតាមក្រោយជាបន្តបន្ទាប់ទៀត។
បើតាមគម្រោង ក្រសួងនឹងនាំចូលតេស្តនេះក្នុងរង្វង់ចំនួន ៣០ ម៉ឺនឧបករណ៍តេស្តក្នុង ១ សប្តាហ៍ ហើយកន្លងមកនេះមានចំនួន ៣០ ម៉ឺនឧបករណ៍តេស្តរួចហើយដែលក្រសួងទទួលបាន ហើយក៏នឹងមានការដឹកមកជាបន្តតាមលំដាប់លំដោយផងដែរ។
ទាក់ទងនឹងការបណ្តុះបណ្តាលពីការប្រើប្រាស់ឧបករណ៍តេស្តនេះ លោក ម៉ុក រ៉ាឌី បានលើកឡើងថា ក្រសួងបានបង្កើតក្រុមការងារក្នុងការគាំទ្រការងារនេះរហូតដល់ចំនួន ៦ ក្រុមដែលចាប់ពីក្រុមផ្តល់ព័ត៌មាន ក្រុមទទួលសំណើបញ្ជាទិញ ក្រុមអនុម័តសំណើ ក្រុមទទួលដោះស្រាយករណីបន្ទាន់ និងអ្នកយកអីវ៉ាន់ទៅដល់កន្លែងផ្ទាល់ផងដែរ។
លោក ម៉ុក រ៉ាឌី បានប្រាប់ទៀតថា៖ «បន្ថែមពីលើនេះ យើងក៏មានក្រុមការងារមួយទៀត ដើម្បីផ្តល់ព័ត៌មានក៏ដូចជាបណ្តុះបណ្តាលពួកគាត់ក្នុងការប្រើប្រាស់ដោយសហការជាមួយនឹងអនុគណៈកម្មការទទួលបន្ទុកកិច្ចការងារបណ្តុះបណ្តាលដែលស្ថិតក្រោមឆត្ររបស់គណៈកម្មការប្រយុទ្ធប្រឆាំងនឹងជំងឺកូវីដ ១៩»។
ជាមួយគ្នានេះ ក្រសួងក៏បានសហការជាមួយនឹងក្រសួងសុខាភិបាលក្នុងការផលិតចេញនូវវីដេអូអប់រំពីរបៀបប្រើប្រាស់ឧបករណ៍តេស្តនេះដែរ។ មានក្រុមហ៊ុន ស្ថាប័នមួយចំនួនក៏ត្រូវបានក្រសួងសហការជួយបណ្តុះបណ្តាលជូនពួកគាត់ដោយធ្វើតាមអនឡាញ និងផ្ទាល់ ប៉ុន្តែមានក្រុមហ៊ុន ស្ថាប័នដែលមានបុគ្គលិកច្រើនគឺមិនត្រូវការការបណ្តុះបណ្តាលទេគឺត្រូវការតែឧបករណ៍តេស្ត ដោយសារមានបុគ្គលិក និងមន្ត្រីសុខាភិបាលរបស់ក្រុមហ៊ុនស្ថាប័នរបស់ពួកគាត់ហើយ។ នេះបើតាមការបញ្ជាក់របស់លោក ម៉ុក រ៉ាឌី។
លោក ជឹម តុលា តំណាងក្រុមហ៊ុនឯកជនមួយបានឱ្យដឹងថា ក្រុមហ៊ុនលោកបានដាក់សំណើទិញចំនួន ១០០ តេស្តសម្រាប់ប្រើប្រាស់នៅក្នុងក្រុមហ៊ុនរបស់លោក ដែលនេះជាគោលការណ៍របស់ក្រុមហ៊ុនផ្ទាល់ បន្ទាប់ពីជំងឺកូវីដ ១៩ នេះមានការរីករាលដាលខ្លាំងក្នុងប្រទេសកម្ពុជា ដែលតម្រូវឱ្យមានការការពារខ្លាំងមែនទែន។
លោកបានថ្លែងថា៖ «ក្រុមហ៊ុនខ្ញុំមានអគារសម្រាប់បុគ្គលិកស្នាក់នៅ ប៉ុន្តែតាមគោលការណ៍ខាងក្រុមហ៊ុន គឺតម្រូវឱ្យបុគ្គលិកណាដែលចេញក្រៅសួរសុខទុក្ខក្រុមគ្រួសារ ឬញុំាអីខាងក្រៅ ឬមានការធ្វើដំណើរឆ្លងខេត្ត គឺក្រុមហ៊ុនត្រូវឱ្យគាត់ពិនិត្យសំណាក នៅពេលដែលគាត់ចូលមកក្នុងអគាររបស់ក្រុមហ៊ុន»។
លោក ជឹម តុលា បានបន្ថែមថា នៅពេលដែលបុគ្គលិកនោះពិនិត្យសំណាករួចរាល់ហើយ ក៏តម្រូវឱ្យធ្វើការសម្រាកក្នុងបន្ទប់ ដើម្បីតាមដានសុខភាពចំនួន ៧ ទៅ ១៤ ថ្ងៃទៀតដែរ ទើបអនុញ្ញាតឱ្យចូលធ្វើការវិញ។
គួរបញ្ជាក់ផងដែរថា នៅថ្ងៃទី ១ ខែកក្កដា លោកនាយករដ្ឋមន្ត្រី ហ៊ុន សែន បានសម្រេចឱ្យមានការប្រើប្រាស់តេស្តរហ័ស រកកូវីដ ១៩ នេះនៅតាមក្រុមហ៊ុន ស្ថាប័នដែលមានបុគ្គលិកច្រើន ដើម្បីបង្ការទប់ស្កាត់ការរីករាលដាលជំងឺកូវីដ ១៩ បានទាន់ពេលវេលា៕
វីដេអូ៖