ភ្នំពេញៈ ក្នុងឆមាសទី ១ ដើមឆ្នាំ ២០២១ នេះ គ្រោះមហន្តរាយពីធម្មជាតិ ភ្លៀងលាយឡំខ្យល់កន្ត្រាក់ និងផ្គររន្ទះ រួមទាំងគ្រោះអគ្គិភ័យបានបណ្ដាលឱ្យមនុស្សជាង ២០០ នាក់បានស្លាប់ និងរងរបួស ព្រមទាំងបង្កការប៉ះពាល់ និងខូចខាតលំនៅឋានពលរដ្ឋអស់ជាច្រើនពាន់ខ្នង។ នេះបើតាមទិន្នន័យពីគណៈកម្មាធិការជាតិគ្រប់គ្រងគ្រោះមហន្តរាយ។
យោងតាមតារាងទិន្នន័យផលប៉ះពាល់ដោយគ្រោះមហន្តរាយក្នុងឆមាសទី ១ ឆ្នាំ ២០២១ ចុះថ្ងៃទី ២៩ ខែ មិថុនា ឆ្នាំ ២០២១ របស់គណៈកម្មាធិការជាតិគ្រប់គ្រងគ្រោះមហន្តរាយបានបង្ហាញថា គ្រោះមហន្តរាយពីធម្មជាតិដែលបង្កឡើងពីបាតុភូតភ្លៀងលាយឡំខ្យល់កន្ត្រាក់បានបណ្ដាលឱ្យពលរដ្ឋ ៥ នាក់ស្លាប់ និង ៥៦ នាក់ទៀតរងរបួស ព្រមទាំងបង្កការខូចខាត និងប៉ះពាល់លំនៅឋានប្រជាពលរដ្ឋសរុប ៥ ១៦៥ ខ្នងក្នុងនោះ ៦០០ ខ្នងរងការដួលរលំខូចខាតទាំងស្រុង និង ៤ ៥៦៥ ខ្នងទៀតបានរងការខូចខាតមធ្យម ដោយបានរបើកដំបូល។ ក្រៅពីនេះក៏បានបង្កការខូចខាតសាលារៀន ៣១ ខ្នង អគាររដ្ឋបាលសាធារណៈ ១៧ កន្លែង និងតូបលក់ដូរចំនួន ១០០ តូបផងដែរ។
តាមរយៈតារាងទិន្នន័យនោះ «ជនរងគ្រោះដែលបានស្លាប់ និងរងរបួសច្រើនជាងគេ ដោយសារបាតុភូតភ្លៀងលាយឡំខ្យល់កន្ត្រាក់ក្នុងឆមាសទី ១ ឆ្នាំ ២០២១ នេះ គឺខេត្តសៀមរាប បន្ទាប់មកគឺបន្ទាយមានជ័យបាត់ដំបងកំពង់ធំ ត្បូងឃុំ និងខេត្តស្ទឹងត្រែង»។
ចំណែកគ្រោះធម្មជាតិ ដែលបង្កឡើងដោយបាតុភូតរន្ទះបាញ់ក្នុងឆមាសទី១ ឆ្នាំ ២០២១ នេះ បានបណ្ដាលឱ្យមនុស្សចំនួន ៥៩ នាក់ស្លាប់ និង ៤៤ នាក់ទៀតរងរបួស។ ក្រៅពីនេះក៏បានបង្កឱ្យគោក្របីរបស់ប្រជាពលរដ្ឋចំនួន ៣២ ក្បាលងាប់ផងដែរ និងបានធ្វើឱ្យខូចខាតផ្ទះប្រជាពលរដ្ឋចំនួន ៥ ខ្នង។
ទិន្នន័យដដែលក៏បានបង្ហាញឱ្យដឹងផងដែរថាក្នុងរយៈពេល ៦ ខែឆ្នាំ ២០២១ នេះគ្រោះអគ្គិភ័យបានបង្កឱ្យមនុស្សចំនួន ១៤ នាក់ស្លាប់ និង ២៩ នាក់ទៀតរងរបួស ព្រមទាំងឆេះខូចខាតផ្ទះ ៣២១ ខ្នង តូបលក់ដូរ ៨០ តូប សាលារៀនចំនួន ៣ រោងចក្រ និងរោងសិប្បកម្ម សរុបចំនួន ១១ អគាររដ្ឋបាលសាធារណៈចំនួន ១៧ កន្លែង និងឆេះចម្ការដំណាំប្រជាពលរដ្ឋចំនួន ៨ កន្លែង និងព្រៃឈើចំនួន ១០ កន្លែង ដែលក្នុង ១ កន្លែងឆេះខូចខាតយ៉ាងតិចប្រមាណ ១០០ ហិកតា។
លោកទេសរដ្ឋមន្ត្រី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយបានអំពាវនាវដល់អាជ្ញាធរមូលដ្ឋាន និងប្រជាពលរដ្ឋបង្កើនការប្រុងប្រយ័ត្ន ចំពោះគ្រោះមហន្តរាយទាំងនេះ ដោយត្រូវពន្លត់ភ្លើងអគ្គិសនី ភ្លើងចង្រា្កន ទៀន ធូប និងភ្នក់ភ្លើងទាំងអស់មុនពេលចូលគេង និងចាកចេញពីផ្ទះ ឬពីវាលស្រែចម្ការ។
លោកថ្លែងថា៖ «យើងមិនអាចទប់ស្កាត់គ្រោះមហន្តរាយពីធម្មជាតិ ដែលរួមមានខ្យល់ព្យុះ រន្ទះបាញ់ និងទឹកជំនន់បានទេ តែយើងអាចទប់ស្កាត់គ្រោះមហន្តរាយអគ្គិភ័យបានតាមរយៈការត្រួតពិនិត្យ និងពន្លត់ភ្លើងទាំងអស់គឺពន្លត់ទាំងភ្លើងអគ្គិសនី និងភ្លើងផ្សេងទៀត មុនពេលយើងចូលគេង ចាកចេញពីផ្ទះ និងកន្លែងធ្វើការងារផ្សេងៗ»។
ជាមួយគ្នានេះលោកអំពាវនាវដល់គ្រប់អាជ្ញាធរមូលដ្ឋាន និងស្ថាប័នព្រមទាំងអង្គភាពពាក់ព័ន្ធជាដៃគូត្រូវត្រៀមបម្រុងនូវមធ្យោបាយ និងឧបករណ៍សម្ភារព្រមទាំងស្បៀងបម្រុងទុកជាមុន ឱ្យបានគ្រប់គ្រាន់សម្រាប់ការឆ្លើយតប ទៅនឹងបញ្ហាប្រឈមនានា ពិសេសគ្រោះទឹកជំនន់ ដែលអាចនឹងកើតមាននៅក្នុងពេលខាងមុខដ៏ខ្លីនេះ។
លោកបានបញ្ជាក់ថា៖ «កម្លាំងអន្តរាគមន៍ថ្នាក់ជាតិបានត្រៀមរួចរាល់ហើយនូវមធ្យោបាយដឹកជញ្ជូនទាំងតាមជើងគោកជើងទឹក និងអាកាស ប៉ុន្តែសម្រាប់ថ្នាក់ខេត្ត និងថ្នាក់មូលដ្ឋានចាំបាច់ត្រូវត្រៀមឱ្យរួចរាល់នៅទីតាំងសុវត្ថិភាព និងស្បៀងអាហារ សម្រាប់ផ្ដល់ជាជំនួយបឋមដល់ជនរងគ្រោះពេលមានគ្រោះទឹកជំនន់មកដល់»។
បើតាមគណៈកម្មាធិការជាតិទន្លេមេគង្គកម្ពុជានៅថ្ងៃទី ៧ ខែ កក្កដា ឆ្នាំ ២០២១ នេះកម្ពស់ទឹកទន្លេមេគង្គនៅខេត្តស្ទឹងត្រែងបានហក់ឡើង ក្នុងកម្រិតកម្ពស់ ៤ ម៉ែត្រ និង នៅខេត្តក្រចេះបានហក់ឡើងដល់កម្រិតកម្ពស់ ១០,១៧ ម៉ែត្រ ហើយនឹងបន្តហក់ឡើង ជាបន្តបន្ទាប់រហូតដល់ថ្ងៃទី ១២ ខែកក្កដា។
ទោះយ៉ាងណា ការហក់ឡើងនៃកម្ពស់ទឹកទន្លេមេគង្គនាពេលនេះមិនបង្កឱ្យមានក្ដីព្រួយបារម្ភ អំពីការជន់លិចនោះទេ។
លោក ហេង រ័ត្នម៉ូនីដា ប្រធានមន្ទីរធនធានទឹក និងឧតុនិយម ខេត្តក្រចេះ ប្រាប់ភ្នំពេញប៉ុស្តិ៍ថា នៅពេលនេះភ្លៀងកំពុងបន្តធ្លាក់នៅក្នុងតំបន់ផ្ទៃរងទឹកភ្លៀងនៃអាងទន្លេមេគង្គ ដែលធ្វើឱ្យកម្ពស់ទឹកទន្លេមេគង្គកំពុងបន្តហក់ឡើងជាបន្តបន្ទាប់។ លោកថា៖ «ថ្វីដ្បិតកម្ពស់ទឹកទន្លេមេគង្គនៅពេលនេះបានហក់ឡើងជាបន្តបន្ទាប់ ប៉ុន្តែវាស្ថិតនៅឆ្ងាយពីកម្រិតនៃការប្រកាសអាសន្ន»៕
វីដេអូ៖