.jpg)
មន្ត្រីចូលរួមកិច្ចប្រជុំតាមអនឡាញពីថ្ងៃទី ៦ ខែកក្កដា។ រូប ក្រសួងមហាផ្ទៃ
បាត់ដំបង/ប៉ៃលិនៈ ក្រសួងមហាផ្ទៃ និងក្រសួងបរិស្ថានកំពុងសិក្សាវាយតម្លៃលើដីនៅក្នុងតំបន់ការពារធម្មជាតិ និងរបៀងអភិរក្សជីវចម្រុះនៅក្នុងភូមិសាស្ត្រខេត្តបាត់ដំបង និងខេត្តប៉ៃលិន ដោយការសិក្សានេះអាចនឹងធ្វើការកាត់ឆ្វៀលដីដែលប្រជាពលរដ្ឋបានប្រើប្រាស់ និងអាស្រ័យផលក្នុងតំបន់ការពារធម្មជាតិយូរឆ្នាំមកហើយ។
កាលពីថ្ងៃទី ៦ កក្កដា លោក ស ខេង រដ្ឋមន្ត្រីក្រសួងមហាផ្ទៃបានដឹកនាំកិច្ចប្រជុំអន្តរក្រសួងស្តីពីវឌ្ឍនភាពនៃការងារពិនិត្យ សិក្សានិងចងក្រងឯកសារទីតាំងដីនៅក្នុងតំបន់ការពារធម្មជាតិ និងរបៀងអភិរក្សជីវចម្រុះនៅក្នុងភូមិសាស្ត្រខេត្តបាត់ដំបង និងខេត្តប៉ៃលិន។
តាមទំព័រហ្វេសប៊ុកក្រសួងមហាផ្ទៃបានឲ្យដឹងថា កិច្ចប្រជុំត្រូវបានធ្វើឡើងតាមរយៈប្រព័ន្ធវីដេអូសន្និសីទ Zoom ដោយមានការចូលរួមពីលោក សាយ សំអាល់ រដ្ឋមន្ត្រីក្រសួងបរិស្ថាន និងថ្នាក់ដឹកនាំ រដ្ឋលេខាធិការក្រសួងពាក់ព័ន្ធ ស្ថាប័ន និងអង្គភាពពាក់ព័ន្ធជាច្រើនទៀត។
លោក នេត្រ ភក្ត្រា អ្នកនាំពាក្យក្រសួងបរិស្ថានបានប្រាប់ ភ្នំពេញ ប៉ុស្តិ៍ នៅថ្ងៃទី ៧ កក្កដាថា ការពិភាក្សាគ្នាពេលនោះ គឺដើម្បីធ្វើការសិក្សាវាយតម្លៃទៅលើដីនៅក្នុងតំបន់ការពារធម្មជាតិ និងរបៀងអភិរក្សជីវចម្រុះនៅក្នុងភូមិសាស្ត្រខេត្តបាត់ដំបង និងខេត្តប៉ៃលិន។
លោកបន្តថា នៅពេលសិក្សាចប់ អន្តរក្រសួងអាចនឹងសម្រេចកាត់ឆ្វៀលដីដែលប្រជាពលរដ្ឋបានប្រើប្រាស់ និងអាស្រ័យផលក្នុងតំបន់ការពារធម្មជាតិយូរឆ្នាំមកហើយ ទៅឲ្យប្រជាពលរដ្ឋធ្វើជាម្ចាស់តែម្តង។
លោកបានបញ្ជាក់ថា៖ «ការសិក្សា និងចងក្រងទិន្នន័យដីដែលប្រជាពលរដ្ឋបានប្រើប្រាស់ និងអាស្រ័យផលក្នុងតំបន់ការពារធម្មជាតិយូរឆ្នាំ ដើម្បីពិនិត្យ និងកាត់ឆ្វៀលជូនប្រជាពលរដ្ឋស្របតាមស្មារតីនៃកិច្ចប្រជុំពេញអង្គគណៈរដ្ឋមន្ត្រីកាលពីថ្ងៃទី ៣ ខែ កក្កដា ឆ្នាំ ២០២០»។
ប៉ុន្តែយ៉ាងណា លោក នេត្រ ភក្ត្រា មិនទាន់អាចបញ្ជាក់បានទេថា អន្តរក្រសួងនឹងធ្វើការសម្រេចកាត់ឆ្វៀលផ្ទៃដីអភិរក្សចំនួនប៉ុន្មានហិកតា ឬនៅក្នុងតំបន់ណានៃខេត្តទាំង ២ នេះទេ ដោយគ្រាន់តែបញ្ជាក់ថា ក្រុមការងារអន្តរក្រសួងទាំង ២ កំពុងសិក្សាលម្អិត។
លោក សឿម ប៊ុនរិទ្ធិ អ្នកនាំពាក្យសាលាខេត្តបាត់ដំបង និងលោក អ៊ុន ប៊ុនលី នាយករដ្ឋបាលសាលាខេត្តប៉ៃលិន កាលពីម្សិលមិញ មិនអាចសុំការអត្ថាធិប្បាយបានទេ ដោយលោកទាំង ២ បានអះអាងថា ជាប់រវល់។
លោក យិន ម៉េងលី មន្ត្រីសម្របសម្រួលសមាគមការពារសិទ្ធិមនុស្សអាដហុកខេត្តបាត់ដំបង និងប៉ៃលិនសាទរចំពោះកិច្ចពិភាក្សារបស់អន្តរក្រសួងទាំង ២ នេះក្នុងការវាយតម្លៃចំពោះគម្រោងផ្តល់ដីនៅក្នុងតំបន់ការពារធម្មជាតិ និងរបៀងអភិរក្សជីវចម្រុះនៅក្នុងភូមិសាស្ត្រខេត្តបាត់ដំបង និងខេត្តប៉ៃលិនជូនដល់ពលរដ្ឋអាស្រ័យផលជាក់ស្តែង។
លោករំពឹងថា នីតិវិធីកាត់ឆ្វៀលដីនេះនឹងធ្វើឡើងដោយត្រឹមត្រូវ យុត្តិធម៌ និងឱ្យប្រាកដថាពលរដ្ឋដែលទទួលបានដីពិតប្រាកដ គឺជាពលរដ្ឋរងគ្រោះ និងខ្វះខាតដីអាស្រ័យផល ហើយបានអាស្រ័យផលលើដីទាំងនេះ យូរឆ្នាំមកហើយ។
លោកបញ្ជាក់ថា៖ «បើសិនជាធ្វើបានត្រឹមត្រូវ ការកាត់ឆ្វៀលដីនេះជូនដល់ពលរដ្ឋក្រីក្រពិត ប្រាកដនោះនឹងធ្វើឱ្យជីវភាពពលរដ្ឋកាន់តែល្អប្រសើរធូរធារ។ គាត់មានដីគ្រប់គ្រាន់សម្រាប់បង្កបង្កើនផល នោះនឹងធ្វើឱ្យគាត់ លែងធ្វើចំណាកស្រុក។ ក៏ប៉ុន្តែកុំឱ្យចូលលក្ខណៈមួយថា ត្រីងៀតឆ្លៀតពង»។
បើតាមលោក យិន ម៉េងលី ដែលធ្លាប់ឃ្លាំមើលការកាត់ឆ្វៀលដីសាធារណៈរបស់រដ្ឋកន្លងមក នៅខេត្តបាត់ដំបង គឺធ្លាប់កើតមានបញ្ហាច្រើន ដោយសារតែការមិនបានធ្វើការវាយតម្លៃ និងសិក្សាទៅដល់ស្ថានភាពដីជាក់ស្តែងជាពិសេសស្ថានភាពរស់នៅជាក់ស្តែងពិតប្រាកដរបស់ប្រជាពលរដ្ឋ។
លោក ម៉េងលី ជឿជាក់ថា គម្រោងកាត់ឆ្វៀលដីនៅក្នុងតំបន់ការពារធម្មជាតិ និងរបៀងអភិរក្សជីវចម្រុះនេះនឹងមិនស្ថិតក្នុងបញ្ហាដដែលៗបន្តទៀតនោះទេ៕
