.jpg)
ទិដ្ឋភាពទីតាំងដីរបស់វត្តនៅស្រុកល្វាឯមដែលមានការអះអាងថាបានលក់។ រូបថត សហការី
ភ្នំពេញៈ មន្ត្រីនៃក្រសួងធម្មការអះអាងថា នឹងចុះទៅស៊ើបអង្កេតករណីដែលថាមានការលក់ដីគរុភណ្ឌរបស់វត្តសុវណ្ណសាគរហៅ «វត្តបន្ទាយ» ដែលបច្ចុប្បន្នមានមួយផ្នែកត្រូវបានយកទៅធ្វើជាស្នាក់ការប៉ុស្តិ៍នគរបាលអរិយក្សត្រ នៅក្នុងឃុំអរិយក្សត្រ ស្រុកល្វាឯម ខេត្តកណ្តាល ក្នុងតម្លៃជិត ១ លានដុល្លារអាមេរិក។
លោក សេង សុមុនី អ្នកនាំពាក្យ ក្រសួងធម្មការ និងសាសនាប្រាប់ ភ្នំពេញ ប៉ុស្តិ៍ កាលពីម្សិលមិញថា លោកមិនទាន់ទទួលបានព័ត៌មានពីការលក់ដីគរុភណ្ឌរបស់វត្តសុវណ្ណសាគរនេះទេ ប៉ុន្តែលោកនឹងឱ្យមន្ត្រីចុះទៅសិក្សាស្រាវជ្រាវឱ្យបានពិតប្រាកដពីករណីនេះ។
លោកបានថ្លែងថា៖ «ខ្ញុំមិនមានរបាយការណ៍ជាក់លាក់នៅឡើយទេរហូតមកទល់ពេលនេះឮតែអ្នកកាសែតសួរ ប៉ុន្តែខ្ញុំបានប្រាប់ទៅមន្ទីរធម្មការ និងសាសនាខេត្តកណ្តាលឱ្យចុះធ្វើកិច្ចការងារនេះឱ្យកាន់តែច្បាស់ហើយ»។ បើតាមលោក សេង សុមុនី ខាងមន្ទីរធម្មការខេត្តប្រាប់លោកថា បាននិងកំពុងធ្វើកិច្ចការនេះ។
លោក ព្រហ្ម សារ៉ន អនុប្រធានមន្ទីរធម្មការ និងសាសនាខេត្តកណ្តាលថ្លែងយ៉ាងខ្លីថា លោកមិនបានដឹងពីការលក់ដូរដីវត្តនេះទេ ដោយលោកបានបង្វែរសំណួរឱ្យសួរព្រះគ្រូចៅអធិការវត្តទើបដឹងពីរឿងនេះ។
ក៏ប៉ុន្តែភ្នំពេញប៉ុស្តិ៍មិនអាចទាក់ទងទៅព្រះគ្រូចៅអធិការ និងគណៈកម្មការវត្ត សុវណ្ណសាគរ (ហៅវត្តបន្ទាយ) ដើម្បីសុំអត្ថាធិប្បាយបានទេកាលពីម្សិលមិញ។
ដោយឡែក លោក ឌុច ចាន់ មេឃុំអរិយក្សត្រ ប្រាប់កាលពីម្សិលមិញដែរថា លោកក៏មិនបានដឹងពីការលក់ដីវត្តនេះដែរ រឿងលុះត្រាព្រះគ្រូចៅអធិការ ឬគណៈកម្មការអាចារ្យវត្តទើបដឹងច្បាស់។ លោកថា ករណីនេះលោកមិនបានចុះហត្ថលេខាលើការទិញ-លក់លើដីនេះទេ ។
លោក ចាន់ បានបញ្ជាក់ថា៖ «យើងឮៗតាមខ្យល់ មិនអាចយកជាការកើតនោះទេ ទាល់តែសាមីវត្ត និងអ្នកទិញបានដឹងខ្លួនគាត់»។
ពាក់ព័ន្ធនឹងការចោទប្រកាន់ថាដីប៉ុស្តិ៍នគរបាលដែលសង់លើដីនោះក៏ត្រូវបានលក់ដែរនោះ លោក ហេង សុផល អធិការស្រុកល្វាឯម ប្រាប់ភ្នំពេញប៉ុស្តិ៍ ថា ដីនេះជាដីកម្មសិទ្ធិរបស់វត្ត សុវណ្ណសាគរ ដែលត្រូវបានខ្ចីមកសាងសង់ជាប៉ុស្ដិ៍នគរបាល សម្រាប់បម្រើសេវាសាធារណៈជូនពលរដ្ឋ ប៉ុន្តែបើទោះជាដីនោះជាកម្មសិទ្ធិរបស់ប៉ុស្តិ៍នគរបាលក៏គ្មាននរណាមានសិទ្ធិក្នុងការលក់ដែរ។
បើតាមលោក ហេង សុផល កាលពីឆ្នាំ ២០២០ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានតម្រូវ ប៉ុស្តិ៍នគរបាលនៅទូទាំងប្រទេស ត្រូវតែមានដី និងប៉ុស្តិ៍ដោយខ្លួនឯងឱ្យបានត្រឹមត្រូវ ហើយត្រូវបានរដ្ឋបាលខេត្តសិក្សា និងរកដី ១ កន្លែងដែលជាដីរបស់ឃុំដើម្បីសាងសង់ប៉ុស្តិ៍នគរបាលថ្មី។ ប៉ុន្តែប៉ុស្តិ៍នគរបាលចាស់គឺនៅដដែល ប្រសិនបើគេឱ្យរើ លោកនឹងរើចេញ ប៉ុន្តែស្នើសុំថវិកាខ្លះក្នុងការតយ៉ាបនៅប៉ុស្តិ៍ថ្មី។
លោក សុផល បានថ្លែងថា៖ «បើគេអត់ដេញ យើងនៅហ្នឹង ហើយរៀបចំទៅជាទីបញ្ជាការស្រាល ប៉ុន្តែបើគេដេញ យើងសុំពេលណាមួយ ដើម្បីរៀបចំឱ្យប៉ុស្តិ៍មួយនោះធ្វើឱ្យហើយ និងបម្រើប្រជាពលរដ្ឋបានស្រួលនោះយើងនឹងរើចេញហើយ»។
ទោះជាយ៉ាងណាលោក ហេង សុផល បានអះអាងថា ដីវត្តនោះត្រូវបានលក់រួចហើយ ក៏ប៉ុន្តែលោកមិនដឹងថាលក់ឱ្យទៅនរណានោះទេ ឬមានការដោះដូរក្នុងការសាងសង់យ៉ាងម៉េច លោកមិនបានដឹងនោះទេ ព្រោះវាជាសិទ្ធិរបស់វត្ត៕
វីដេអូ៖
