.jpg)
គ្រឿងចក្រឈូសឆាយដីគម្របព្រៃឈើត្រូវបានបង្ក្រាប។ រូបថត សហការី
កំពង់ធំៈ មន្ត្រីជំនាញរដ្ឋបាលព្រៃឈើនឹងចុះទៅធ្វើការវាស់វែង និងពិនិត្យមើលករណីឈូសឆាយ លើដីគម្របព្រៃឈើរបស់រដ្ឋ បន្ទាប់ពីសមត្ថកិច្ចបង្ក្រាប និងរឹបអូសគ្រឿងចក្រចំនួន ៦ គ្រឿង ដែលធ្វើសកម្មភាពឈូសឆាយកាលពីថ្ងៃទី ៦ កក្កដា ស្ថិតក្នុងឃុំទ្រា ស្រុកស្ទោង ដែលការបង្ក្រាបនេះ ក្រោមការដឹកនាំរបស់លោក សាយ វាសនា ព្រះរាជអាជ្ញារង អមសាលាដំបូងខេត្តកំពង់ធំ។
ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ លោក ប៉ែន វណ្ណរិទ្ធ ប្រាប់ ភ្នំពេញ ប៉ុស្តិ៍ ពីម្សិលមិញថា លោកនឹងចាត់ឲ្យមន្ត្រីជំនាញរដ្ឋបាលព្រៃឈើចុះទៅវាស់វែង និងពិនិត្យមើលលើទីតាំងដីគម្របព្រៃឈើដែលត្រូវបានឈូសឆាយ ដើម្បីដឹងច្បាស់ពីចំនួនផ្ទៃដីដែលត្រូវបានឈូសឆាយ។
បើសិនជារកឃើញថា ពិតជាមានការឈូសឆាយចូលដល់ដីគម្របព្រៃឈើរបស់រដ្ឋពិតមែននោះ មន្ត្រីជំនាញនឹងអនុវត្តតាមនីតិវិធី មិនបណ្តោយឲ្យជនប្រព្រឹត្តបទល្មើសរួចពីសំណាញ់ច្បាប់ឡើយ។ ប៉ុន្តែលោកមិនបានបញ្ជាក់ពីពេលវេលាច្បាស់លាស់ ដែលមន្ត្រីនឹងចុះទៅវាស់វែងនៅទីកន្លែង ដែលមានការទន្ទ្រាននោះទេ។
លោកថ្លែងថា៖ «ករណីចាប់ឃាត់គ្រឿងចក្រហ្នឹងពិតជាមានមែន ហើយឥឡូវនេះយើងកំពុងធ្វើកិច្ចការងារហ្នឹង ដោយឲ្យខាងសង្កាត់រដ្ឋបាលព្រៃឈើស្ទោងប្រគល់គ្រឿងចក្រមកខណ្ឌរដ្ឋបាលព្រៃឈើ ដើម្បីចាត់ចែងតាមនីតិវិធី ហើយយើងនឹងចុះទៅពិនិត្យមើលជាក់ស្តែង ថាតើមានផ្ទៃដីប៉ុន្មានដែលឈូសឆាយ។ អ៊ីចឹងតួលេខពិតប្រាកដ យើងមិនទាន់ដឹងនៅឡើយទេ»។
លោក សាយ វាសនា ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តកំពង់ធំ ថ្លែងពីម្សិលមិញថា លោកបានដឹកនាំបញ្ជាកម្លាំងសមត្ថកិច្ចឃាត់គ្រឿងចក្រចំនួន ៦ គ្រឿងនៅថ្ងៃទី ៦ កក្កដា ខណៈពួកគេកំពុងឈូសឆាយលើដីគម្របព្រៃឈើ ឆ្នាំ ២០០២ ដែលជាដីព្រៃអភិរក្សរក្សាទុករបស់រដ្ឋ។
បើតាមលោកព្រះរាជអាជ្ញារង នៅពេលកម្លាំងសមត្ថកិច្ចទៅដល់អ្នកបញ្ជាគ្រឿងចក្រ និងអ្នកពាក់ព័ន្ធនៅទីនោះបានរត់គេចខ្លួនបាត់អស់ ហេតុនេះអត្តសញ្ញាណជនសង្ស័យមិនទាន់អាចកំណត់បានទេ។ ទោះយ៉ាងណា គ្រឿងចក្រត្រូវបានកម្លាំងសមត្ថកិច្ចឃាត់យកមករក្សាទុកនៅសង្កាត់រដ្ឋបាលព្រៃឈើស្ទោង ដើម្បីចាត់ការតាមនីតិវិធី។
លោកថ្លែងថា៖ «គ្រឿងចក្រដែលយើងឃាត់បាន មានអាប៊ុល ៣ គ្រឿង អាអ៊ិច ២ និងត្រាក់ទ័រ ១ គ្រឿង។ មូលហេតុដែលយើងចុះទៅឃាត់នេះ ដោយសារគាត់បានឈូសឆាយចូលដីគម្របព្រៃឈើឆ្នាំ ២០០២ ហើយទំហំផ្ទៃដីបើតាមមើលជាក់ស្តែងកន្លែងដែលធ្វើការឈូសឆាយហ្នឹងចូលប្រហែល ១៧ ហិកតា»។
លោក ប៉ែន ប៊ុណ្ណារ៍ មន្ត្រីជាន់ខ្ពស់នៃសមាគមការពារសិទ្ធិមនុស្ស (ADHOC) ថ្លែងថា រឿងរ៉ាវពាក់ព័ន្ធក្នុងការទន្ទ្រានដីរដ្ឋកើតឡើងដដែលៗ ស្ទើរតែគ្រប់ខេត្ត ក្រោមរូបភាព ប្រជាពលរដ្ឋចូលទៅកាប់រានទន្ទ្រានអាស្រ័យផល ហើយលក់ទៅឱ្យអ្នកមានលុយមានអំណាចដែលមានការឃុបឃិតពីអាជ្ញាធរមួយចំនួន ដោយបានចេញលិខិតទិញ-លក់។
លោកថ្លែងថា៖ «ប្រជាពលរដ្ឋនៅតែទៅកាប់រានទន្ទ្រានដីព្រៃ អស់ពីកន្លែង ១ ទៅកន្លែង ១ ទៀតគ្រប់ខេត្តទាំងអស់។ អ៊ីចឹងយើងឃើញថា វិធានការរបស់អាជ្ញាធរអត់មានពិតប្រាកដ ហើយដោយសារអំពើពុករលួយជាប្រព័ន្ធផង ធ្វើឱ្យអ្នកមានលុយមានអំណាចប្រើប្រាស់រូបភាពដដែលៗបានជោគជ័យ។ បើសិនបណ្តោយ យើងអាចនិយាយបានថា ទាល់តែអស់ដីតែម្តងបានវាចប់»។
លោក យ៉ូវ សេងគុណ នាយករដ្ឋបាលខេត្តកំពង់ធំថ្លែងថា ការឈូសឆាយដី ដែលរានដល់តំបន់ គម្របព្រៃឈើរបស់រដ្ឋនោះ គឺជាករណីរបស់បុគ្គលឯកជន ដែលទៅស្វែងរកទិញដីពីប្រជាពលរដ្ឋហើយធ្វើការឈូសឆាយក្រោមស្លាកក្រុមហ៊ុនផ្សេងៗ ដើម្បីពុះដីឡូត៍លក់។ លោកអះអាងថា រដ្ឋបាលខេត្តមិនបានអនុញ្ញាតឱ្យមានការវិនិយោគប៉ះលើដីគម្របព្រៃឈើនោះទេ ចំណែកករណីឈូសឆាយថ្មីនេះ មន្ត្រីជំនាញកំពុងស្រាវជ្រាវ។
លោកប្រាប់ថា៖ «អត់មានការវិនិយោគលក្ខណៈក្រុមហ៊ុនជាមួយរដ្ឋនៅតំបន់នោះទេ។ គាត់ធ្វើការទិញលក់ពីប្រជាពលរដ្ឋ លក្ខណៈឯកជនសាងសង់ផ្ទះល្វែង ដីឡូត៍អីហ្នឹង តែខ្ញុំមិនបានដឹងយ៉ាងម៉េចទេ ព្រោះមិនទាន់ទទួលបានរបាយការណ៍ច្បាស់លាស់ពីមន្ត្រីជំនាញនៅឡើយ»៕
