.jpg)
នគរបាលចុះបង្ក្រាបកញ្ឆាដែលគេដាំក្នុងចម្ការស្វាយនៅខេត្តឧត្តរមានជ័យ។ រូប ប៉ូលិស
ឧត្តរមានជ័យៈ ស្ត្រី ២ នាក់ និងបុរសម្នាក់ កំពុងត្រូវបានតំណាងអយ្យការអមសាលាដំបូងខេត្តឧត្តរមានជ័យសាកសួរ បន្ទាប់ពីឃាត់ខ្លួនបាន ៣ ថ្ងៃពាក់ព័ន្ធនឹងការលួចដាំកញ្ឆា ដែលសមត្ថកិច្ចបានចុះទៅកាប់ចោលចំនួន ១២ ៥០០ ដើម នៅភូមិ-ឃុំ ស្រុកអន្លង់វែង និងដកហូតកញ្ឆាក្រៀមចំនួន ៣៦ គីឡូក្រាម។
ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តឧត្តរមានជ័យ លោក ប៉េង ម៉េងគ័ង ប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យឈ្មោះ អ៊ាម ទឹម អាយុ ៣៥ ឆ្នាំ ត្រូវជាប្តីស្ត្រីឈ្មោះ សែម ផល្លី អាយុ ៣៥ ឆ្នាំ និងស្ត្រីម្នាក់ទៀតឈ្មោះ ង៉ូយ ស្តើង អាយុ ៤៥ ឆ្នាំ កំពុងត្រូវតំណាងអយ្យការសាកសួរនៅឡើយ។ លោកប្រាប់ថា ចំពោះមូលហេតុដែលតំណាងអយ្យការទើបសាកសួរ ដោយសារតែពួកគេត្រូវបានបញ្ជូនដល់សាលាដំបូងពេលល្ងាចទៅហើយ។ ហេតុដូច្នេះតំណាងអយ្យការចាប់ផ្តើមសាកសួរពួកគេនៅព្រឹកថ្ងៃទី ៧ កក្កដា។
លោកថា៖ «តំណាងអយ្យការទើបសួរពួកគេទេ ហើយនីតិវិធីកំពុងបន្តនៅឡើយ។ ពេលតំណាងអយ្យការសាកសួរចប់ទើបសម្រេចចោទប្រកាន់»។
លោក ថោង សាមិ ស្នងការរងទទួលផែនការងារប្រឆាំងគ្រឿងញៀនឱ្យដឹងពីម្សិលមិញថា ការឃាត់ខ្លួនជនសង្ស័យទាំង ៣ នាក់នេះ ដោយសារពួកគេលួចដាំដើមកញ្ឆាដែលច្បាប់បានហាមឃាត់។
លោកថ្លែងថា៖ «ការលួចដាំដំណាំកញ្ឆានេះ តាមច្បាប់គ្រឿងញៀនបានហាមឃាត់។ ហេតុដូច្នេះទង្វើរបស់ពួកគាត់គឺខុសច្បាប់»។
លោកស្នងការរងបានរំឭកថា មុនមានការឃាត់ខ្លួនអ្នកទាំង ៣ នាក់ខាងលើនេះ គឺកម្លាំងសមត្ថកិច្ចរបស់លោកបានទទួលព័ត៌មានថា នៅក្នុងចម្ការស្វាយរបស់អ្នកចម្ការមានលួចលាក់ដាំដើមកញ្ឆាបន្លំជាមួយដើមស្វាយ។
លោកបានបន្តថា បន្ទាប់មកកម្លាំងសមត្ថកិច្ចរបស់លោកបានចុះដល់ទីតាំងចម្ការស្វាយនោះ ហើយបានកាប់បំផ្លាញដំណាំកញ្ឆាស្រស់បានចំនួន ១២ ៥០០ ដើម លើផ្ទៃដីទំហំ ៥,៥០០ ម៉ែត្រការ៉េ និងដកហូតកញ្ឆាក្រៀមបានចំនួន ៣៦ គីឡូក្រាម រថយន្ត ១ គ្រឿង និងគោយន្តកន្រៃ្ត ១ គ្រឿងផង៕
