.jpg)
សមត្ថកិច្ចចាប់ខ្លួនបុរសដែលចាក់បុរសម្នាក់ស្លាប់ និងម្នាក់របួស។ រូប នគរបាល
សៀមរាបៈ នគរបាលស្រុកជីក្រែងបានបញ្ជូនជនសង្ស័យម្នាក់ដែលចាក់បុរសម្នាក់ស្លាប់ និងម្នាក់ទៀតរបួសធ្ងន់ក្នុងជម្លោះតូចតាចមួយទៅស្នងការដ្ឋាននគរបាលខេត្តសៀមរាបនៅថ្ងៃទី ៧ កក្កដា បន្ទាប់ពីត្រូវបានចាប់ខ្លួនកាលពីល្ងាចថ្ងៃទី ៦ កក្កដានៅភូមិថ្នល់ដាច់ ឃុំ សង្វើយ ស្រុកជីក្រែង ខេត្តសៀមរាប។
លោក តាំង លីហេង អធិការនគរបាលស្រុកជីក្រែងប្រាប់ភ្នំពេញប៉ុស្តិ៍ នៅថ្ងៃទី ៧ កក្កដាថា ជនសង្ស័យឈ្មោះ ជិន វណ្ណា ភេទប្រុស អាយុ ១៨ ឆ្នាំ។ រីឯជនរងគ្រោះស្លាប់ឈ្មោះ រុន ដូង ភេទប្រុសអាយុ ២១ ឆ្នាំ និងឈ្មោះ រិន លាប ភេទប្រុសអាយុ ២៦ ឆ្នាំ។ ពួកគេទាំង ៣ នាក់រស់នៅភូមិ ព្រីងឃុំ-ស្រុកជីក្រែង ខេត្តសៀមរាប។ លោកថ្លែងថា៖ «ករណីនេះ ក្រោយបង្កហេតុភ្លាមៗកម្លាំងយើងក៏ចេញតាមជនសង្ស័យដែររហូតយើងចាប់បាន។ យើងបញ្ជូនគាត់បន្តទៅខេត្តទៀត»។
បើតាមលោក លី ហេង ប្រាប់តាមចម្លើយរបស់ជនសង្ស័យថា នៅមុនកើតហេតុ បុរសសង្ស័យបានទៅរកឆ្លុះត្រីនៅបឹងក្បែរភូមិ រហូតដល់ម៉ោងជិត ១១ យប់ថ្ងៃទី ៥ កក្កដា ក៏ដើរត្រឡប់មកផ្ទះវិញ។ ពេលគាត់កំពុងដើរកាត់ភូមិស្រាប់តែឃើញបុរស ២ នាក់ (ជនរងគ្រោះ) កំពុងផឹកស្រា ហើយស្រែកសួរគាត់ថា ទៅណាមកណា ខណៈជនរងគ្រោះស្រវឹង។
លោកបន្តថា នៅពេលនោះក៏ទាស់សម្តីគ្នា និងមានការវាយតប់គ្នាផង រហូតជនសង្ស័យដែលមានកាន់កាំបិតចិតបន្លែក្នុងដៃផង ក៏ចាក់ឈ្មោះ រុន ដូង ត្រូវចំចុងដង្ហើម ១ កាំបិតរងរបួសធ្ងន់ និងចាក់ឈ្មោះ រិន លាបចំចង្កេះ ១ កាំបិតហើយគេចខ្លួនតែម្តង។
ក្រោយកើតហេតុប្រជាពលរដ្ឋបានចាត់ចែងដឹកជនរងគ្រោះទៅមន្ទីរពេទ្យបង្អែកខេត្តសៀមរាប ប៉ុន្តែដោយស្ថានភាពរបួសធ្ងន់ពេកទើបឈ្មោះ រុន ដូង ដាច់ខ្យល់ស្លាប់ ពេលបញ្ជូនដល់មន្ទីរពេទ្យ ចំណែក រិន លាប ត្រូវបានក្រុមគ្រូពេទ្យជួយសង្គ្រោះជីវិតបាន និងកំពុងសម្រាកព្យាបាលនៅមន្ទីរពេទ្យនៅឡើយទេ៕
