.jpg)
មន្ត្រីជំនាញ គបផក ចុះត្រួតពិនិត្យហាងកែសម្ផស្សមួយក្នុងរាជធានីភ្នំពេញពីខែមីនា។ រូបថត គបផក
ភ្នំពេញៈ គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់មានហានិភ័យខ្ពស់ដល់សុខភាព និងសុវត្ថិភាពសង្គម (គ.ប.ផ.ក) នៃក្រសួងមហាផ្ទៃផ្អាកចុះប្រតិបត្តិការ បង្ក្រាប ត្រួតពិនិត្យ និងឆែកឆេរផលិតផលក្លែងក្លាយទូទៅតាមបណ្តារាជធានី-ខេត្ត លើកលែងតែករណីចាំបាច់បំផុត ដើម្បីទប់ស្កាត់ការរីករាលដាលសាជាថ្មីនៃជំងឺកូវីដ ១៩។
គណៈកម្មាធិការនេះបញ្ជាក់ក្នុងសេចក្តីណែនាំរបស់ខ្លួនថា៖ «រាល់ប្រតិបត្តិការទាំងអស់ ដែលបង្ក្រាបនូវរាល់ផលិតផលក្លែងក្លាយទូទៅ ត្រូវធ្វើការផ្អាកជាបណ្តោះអាសន្ន ដោយសារការរីករាលដាលសាជាថ្មីនៃជំងឺកូវីដ។ រាល់សកម្មភាពការកោះហៅ និងស៊ើបសួរនូវរាល់ករណីផលិតផលក្លែងក្លាយទាំងអស់ ត្រូវធ្វើការផ្អាកជាបណ្តោះអាសន្ន ដោយសារការរីករាលដាលសាជាថ្មីនៃជំងឺកូវីដ ១៩»។
បើទោះជាត្រូវផ្អាករាល់សកម្មភាពប្រតិបត្តិការទាំងអស់ក្នុងរាជធានី ខេត្ត ក៏ដោយ ក៏លោក មៀច សុផាន់ណា ប្រធានគណៈកម្មាធិការនេះបានបញ្ជាក់ក្នុងលិខិតថា នៅមានករណីលើកលែងដែលចាំបាច់បំផុតដែលក្រុមការងារ នៅតែអាចបន្តសកម្មភាព ចុះប្រតិបត្តិការបង្ក្រាបបាន។
លោកបញ្ជាក់ថា សកម្មភាពជាពិសេសនោះគឺទាក់ទងជាមួយនិងឧបករណ៍វេជ្ជសាស្ត្រ និងឱសថសាស្ត្រប្រឆាំងនិងជំងឺកូវីដ ១៩ ក្លែងក្លាយ និងគ្មានគុណភាព ដោយអនុវត្តតាមគោលការណ៍ណែនាំស្តីពីគោលការណ៍ និងការចុះបង្ក្រាបរបស់លេខាធិការដ្ឋាន និងក្រុមប្រតិបត្តិការទាំងអស់នៃគណៈកម្មាធិការ ប្រយុទ្ធប្រឆាំងផលិតផលក្លែងក្លាយ។
លោកបានណែនាំថា៖ «ក្នុងករណីការចុះប្រតិបត្តិការ ត្រូវរក្សាគម្លាតសុវត្ថិភាព ពាក់ម៉ាស់ បាញ់អាល់កុល និងស្ដាប់តាមការណែនាំរបស់ក្រសួងសុខាភិបាល។ ត្រូវបន្តអនុវត្តតាមវិធានការ ៣ កុំ ៣ ការពារ និង ២ ចូលរួមរបស់រាជរដ្ឋាភិបាលឱ្យបានខ្ជាប់ខ្ជួន»។
លោក មៀច សុផាន់ណា ជឿជាក់ថា ក្រុមប្រតិបត្តិការទាំងអស់ចូលរួមអនុវត្តនូវខ្លឹមសារសេចក្តីណែនាំនេះឱ្យមានប្រសិទ្ធភាពខ្ពស់ និងប្រកបដោយស្មារតីទទួលខុសត្រូវខ្ពស់ ដើម្បីរង់ចាំរាល់ការអនុវត្តសកម្មភាពចុះបំពេញប្រតិបត្តិការតាមបណ្តារាជធានីខេត្ត និងការកោះហៅស៊ើបសួរដែលនឹងមានសកម្មភាពសាជាថ្មី តាមការណែនាំដោយផ្ទាល់ក្នុងពេលខាងមុខ។
លោក ហុង វណ្ណៈ អ្នកស្រាវជ្រាវសេដ្ឋកិច្ចយល់ថា ការប្រកាសផ្អាករបស់គណៈកម្មាធិការនេះអាចស្ថិតក្នុងហេតុផលមួយដែលបានអះអាង ហើយអាចស្ថិតក្នុងការពិចារណាមួយរបស់ថ្នាក់ដឹកនាំ ជាមួយនឹងសកម្មភាពបន្ត ស្របពេលដែលក្រសួងពាណិជ្ជកម្មក៏មានអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង (កបប) ដែលកំពុងអនុវត្តសកម្មភាពនេះនាពេលបច្ចុប្បន្នផងដែរ។
បន្ថែមពីនេះ លោកគិតថា ក្នុងរយៈពេលផ្អាកសកម្មភាពនេះ គឺមិនប៉ះពាល់អ្វីធំដុំទេទាក់ទងនឹងជនបង្កឱកាស និងប្រព្រឹត្តសកម្មភាពផ្សេងៗទាក់ទងការប្រព្រឹត្តបទល្មើសផលិតផលក្លែងក្លាយនេះ ខណៈក្រសួងសេដ្ឋកិច្ចក៏មានក្រុមការងារមួយ ដែលបានអនុវត្តសកម្មភាពនេះដូចគ្នា។
លោកបន្តថា៖ «សព្វថ្ងៃនេះ កបប ក៏ធ្វើសកម្មភាពបែបនេះដូចគ្នា ទៅនឹង គ.ប.ផ.ក នេះដែរ គ្រាន់តែដែនសមត្ថកិច្ចរបស់ កបប គឺមានវិសាលភាពធំជាងក្រុមការងាររបស់ក្រសួងមហាផ្ទៃ។ ប៉ុន្តែស្ថាប័នទាំង ២ នេះគឺគួរតែមានការសហការគ្នា។ ការអនុវត្តមួយចំនួនរបស់ស្ថាប័ននេះគឺមិនអាចខ្វះគ្នាបានទេ ព្រោះ កបប គឺជាមន្ត្រីបច្ចេកទេសត្រូវការការសហការពីកម្លាំងសមត្ថកិច្ច»៕
