.jpg)
ជនសង្ស័យ និងវត្ថុតាងឈើដែលទើបកាប់ផ្តួលអារច្រៀកថ្មីៗ។ រូបថត កងរាជអាវុធហត្ថ
ព្រះវិហារៈ ខណ្ឌរដ្ឋបាលព្រៃឈើ ខេត្តព្រះវិហារ បានបញ្ជូនបុរស ២ នាក់ ទៅសាលាដំបូងខេត្តព្រះវិហារ នៅរសៀលថ្ងៃទី ៨ កក្កដា បន្ទាប់ពីសមត្ថកិច្ចអាវុធហត្ថ ចាប់ខ្លួនបាន ១ ថ្ងៃ ករណីកាប់រំលំដើមឈើនៅក្នុងតំបន់ព្រៃសហគមន៍ក្រសាំង ក្នុងស្រុកឆែប។
លោក នួន សុខុម នាយរដ្ឋបាលព្រៃឈើ ខេត្តព្រះវិហារ ប្រាប់នៅរសៀលថ្ងៃទី ៨ កក្កដាថា ជនសង្ស័យ ឈ្មោះ នុ សឺម អាយុ ២៥ ឆ្នាំ រស់នៅភូមិ ឆែប លិច ឃុំ ឆែប ១ ស្រុក ឆែប មិនម្នាក់ទៀត ឈ្មោះ ស្រី ស៊ា អាយុ ២៥ ឆ្នាំ ទីលំនៅ ភូមិ ឆែប កើត ឃុំ ឆែប ១ ដែលករណីនេះ ត្រូវតែបញ្ជូនទៅសាលាដំបូងខេត្តព្រះវិហារ នៅរសៀលថ្ងៃទី ៨ កក្កដា។
លោកថ្លែងថា៖ «ជនសង្ស័យទាំង២នាក់នេះ ប្រើរណាយន្តកាប់បំផ្លាញធនធានព្រៃឈើ។ ពួកគេត្រូវតែចាត់ការតាមនីតិវិធីច្បាប់»។
លោករំឭកប្រាប់ថា កាលពីថ្ងៃទី ៧ កក្កដា សមត្ថកិច្ច អាវុធហត្ថ ស្រុកឆែបបាន ចុះល្បាតព្រៃឈើសហគមន៍ក្រសាំង ខណៈនោះបានប្រទះឃើញ បុរស ២ នាក់កំពុងអារឈើ។
លោកបន្តថា ពេលនោះ កម្លាំងអាវុធហត្ថបានឃាត់ខ្លួនពួកគេ ស្ថិតក្នុងភូមិ ក្រសាំង ឃុំឆែបមួយ ស្រុកឆែប។
វត្ថុតាងរបស់ជនទាំងពីរនាក់នេះ រួមមានរណា យន្ដ ១ គ្រឿង គោយន្ដមួយគ្រឿង និងឈើ អារ ប្រភេទ លេខ ១ ( ផ្ចឹក ) ចំនួន ១៣ សន្លឹក៕
