ភ្នំពេញៈ ការប្រយុទ្ធប្រឆាំងជំងឺកូវីដ ១៩ បានធ្វើឱ្យបុគ្គលិកសុខាភិបាល និងក្រុមគ្រូពេទ្យជំនាញ ក្លាយជាកងទ័ពជួរមុខដ៏សកម្មក្នុងកិច្ចការពារ និងព្យាបាលពលរដ្ឋពីការយាយីនៃជំងឺឆ្លងដ៏កាចសាហាវនេះ។ បច្ចុប្បន្នបុគ្គលិកសុខាភិបាល និងក្រុមគ្រូពេទ្យជំនាញនៅទូទាំងប្រទេសមានប្រមាណជាង ២ ម៉ឺននាក់។ ប៉ុន្តែចំនួននេះគឺមិនទាន់គ្រប់គ្រាន់នោះទេ ក្នុងការងារប្រយុទ្ធប្រឆាំងជំងឺកូវីដ-១៩ ដែលកំពុងបន្តរីករាលដាលយ៉ាងខ្លាំងនៅទូទាំងប្រទេស។
ដើម្បីឆ្លើយតបសភាពការណ៍ និងតម្រូវការចាំបាច់ក្នុងកិច្ចការងារនេះ ប្រមុខរាជរដ្ឋាភិបាលកាលពីកន្លងទៅថ្មីៗនេះបានសម្រេចផ្ដល់ឱកាសដល់ក្រុមគ្រូពេទ្យស្ម័គ្រចិត្តប្រមាណជាង ៣ ០០០ នាក់ដែលចូលរួមធ្វើសកម្មភាពយ៉ាងសកម្ម នៅក្នុងសមរភូមិប្រយុទ្ធប្រឆាំងជំងឺកូវីដ ១៩ ទទួលបានក្របខ័ណ្ឌការងារជាមន្ត្រីរាជការក្នុងវិស័យសុខាភិបាល។
ក្នុងកាលៈទេសៈដែលវិស័យសុខាភិបាលកំពុងមានតម្រូវការធនធានមនុស្សបន្ថែមនេះ សិស្សានុសិស្សរាប់ពាន់នាក់ ដែលបានបញ្ចប់ការសិក្សាថ្នាក់ទី ១២ កាលពីឆ្នាំ ២០២០ បាននាំគ្នាដាក់ពាក្យប្រឡងចូលរៀនទៅតាមមុខជំនាញឯកទេសផ្សេងៗក្នុងវិស័យនេះនៅទូទាំងប្រទេសហើយជាលទ្ធផលសិស្សចំនួន ៣ ៥៤០ នាក់ បានប្រឡងជាប់។ នេះបើតាមទិន្នន័យពីគណៈកម្មាធិការប្រឡងថ្នាក់ជាតិកាលពីដើមខែកក្កដានេះ។
លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល ប្រាប់ភ្នំពេញប៉ុស្តិ៍នៅថ្ងៃទី ៧ ខែ កក្កដា ឆ្នាំ ២០២១ ថា ចំនួននេះបើធៀបជាមួយនឹងតម្រូវការជាក់ស្ដែងនាពេលបច្ចុប្បន្នគឺអាចដោះស្រាយបាន។
លោកស្រីបញ្ជាក់ថា៖ «ចំនួនជារឿងមួយហើយតែអ្វីដែលរិតតែសំខាន់ជាងនេះទៅទៀតនោះ គឺគុណភាព និងសមត្ថភាពរបស់ពួកគាត់ពេលបញ្ចប់ការសិក្សា។ ពួកគាត់ចាំបាច់ត្រូវបម្រើសេវាឱ្យបានល្អប្រសើរ និងប្រកបដោយការគោរពដោយអនុវត្តឱ្យបានត្រឹមត្រូវនូវក្រមសីលធម៌វិជ្ជាជីវ:របស់គ្រូពេទ្យ»។
ទន្ទឹមនឹងនេះ លោកស្រីក៏បានផ្តាំផ្ញើដល់សិស្សានុសិស្ស ដែលបានប្រឡងជាប់ទាំងអស់ឱ្យប្រឹងប្រែងយកចិត្តទុកដាក់ក្នុងការសិក្សាស្រាវជ្រាវរៀនសូត្រនូវបច្ចេកវិទ្យាថ្មីៗ សមស្របទៅនឹងបរិបទនៃការធ្វើទំនើបកម្មផ្នែកបច្ចេកវិទ្យាពេទ្យ ដើម្បីពង្រឹងនូវចំណេះដឹង និងសមត្ថភាពពិតប្រាកដរបស់ខ្លួន។
ដើម្បីក្លាយជាគ្រូពេទ្យដ៏ល្អសម្រាប់អ្នកជំងឺ លោកស្រី វណ្ណឌីន ក៏បានក្រើនរំឭកដល់សិស្ស និស្សិតដែលកំពុងសិក្សាក្នុងវិស័យសុខាភិបាល ក៏ដូចជាក្រុមគ្រូពេទ្យស្ម័គ្រចិត្ត និងក្រុមគ្រូពេទ្យជំនាញ ដែលកំពុងបម្រើការងារនៅតាមមន្ទីរពេទ្យ និងមណ្ឌលសុខភាពទាំងអស់ទូទាំងប្រទេសត្រូវចងចាំថា ពេទ្យ គឺជាវិជ្ជាមួយដែលជួយសង្គ្រោះអាយុជីវិតមនុស្ស ដែលតម្រូវឱ្យមានការអត់ធ្មត់ ព្យាយាមជួយសង្គ្រោះឱ្យអស់ពីសមត្ថភាព ប្រកបដោយភាពស្មោះត្រង់ជាទីបំផុត និងមិនត្រូវប្រកាន់វណ្ណ: ពូជសាសន៍ ពណ៌សម្បុរ ឬបក្សនយោបាយអ្វីទាំងអស់ហើយ ជាពិសេសមិនត្រូវយកលុយជាធំសម្រាប់ការជួយសង្គ្រោះជីវិតនោះឡើយ។
លោកស្រី វណ្ណឌីន បានបញ្ជាក់ថា៖ «ត្រូវជួយជីវិតមនុស្សជាមុនសិនរឿងតម្លៃថ្លៃថ្នូរ ចាំគិតគូរតាមក្រោយ ហើយរឹតតែត្រូវយកចិត្តទុកដាក់ថែមទៀត ប្រសិនបើជួបប្រទះនឹងអ្នកជំងឺជាជនក្រីក្រ»។
ជុំវិញករណីនេះ កញ្ញា ឈឹម សុខរក្សា ដែលទើបប្រឡងជាប់ និងចូលរៀនថ្នាក់មូលដ្ឋាន ខាងផ្នែកឱសថសាស្ត្រ នៅសាកលវិទ្យាល័យពុទ្ធិសាស្ត្រ កាលពីថ្ងៃទី ៥ ខែកក្កដា ប្រាប់ ភ្នំពេញ ប៉ុស្តិ៍ថា នៅពេលនេះកញ្ញាបាននិងកំពុងបំពេញក្ដីស្រម៉ៃរបស់ខ្លួន ដែលចង់ក្លាយជាគ្រូពេទ្យជំនាញម្នាក់ ដើម្បីជួយសង្គ្រោះដល់ប្រជាពលរដ្ឋ។ ក្នុងចំណោមបងប្អូនប្រុស-ស្រី ៤ នាក់ កញ្ញា សុខរក្សា គឺជាកូនទី ២ នៅក្នុងគ្រួសារនៃអាជីវករមួយក្នុងរាជធានីភ្នំពេញបាននិយាយប្រកបដោយទំនុកចិត្តថា៖ «ខ្ញុំនឹងមិនបារម្ភខ្លាចអ្វីទាំងអស់ ប្រសិនបើខ្ញុំត្រូវបានផ្ដល់ឱកាសឱ្យចូលរួមបំពេញបេសកកម្មការងារប្រយុទ្ធប្រឆាំងជំងឺកូវីដ ១៩ ជាមួយក្រុមគ្រូពេទ្យស្ម័គ្រចិត្តដែលជារៀមច្បង នៅពេលដែលនាងខ្ញុំបានទទួលវគ្គបណ្ដុះបណ្ដាលលើមុខជំនាញរបស់នាងខ្ញុំ បាន ១ ឆ្នាំ ឬ ២ ឆ្នាំហើយនោះ»។
ស្រដៀងគ្នានេះដែរ កញ្ញា លាប ចន្ទ្រា អាយុ ២០ ឆ្នាំ ដែលទើបប្រឡងជាប់ និងចូលរៀននៅឆ្នាំសិក្សាមូលដ្ឋានលើមុខជំនាញផ្នែកវេជ្ជបណ្ឌិតទូទៅនៅសាកលវិទ្យាល័យវិទ្យាសាស្ត្រសុខាភិបាលបាននិយាយថា កញ្ញាបានត្រៀមខ្លួនរួចរាល់ហើយមុនពេលកញ្ញាបានដាក់ពាក្យប្រឡង ចូលរៀននៅក្នុងវិស័យសុខាភិបាលនេះ។
កញ្ញាថ្លែងថា៖ «ខ្ញុំបានដឹងខ្លះៗរួចមកហើយនូវតួនាទី និងភារកិច្ចរបស់គ្រូពេទ្យ នោះគឺការជួយសង្គ្រោះ និងព្យាបាលអ្នកជំងឺពីអាការរោគផ្សេងៗឱ្យជាសះស្បើយ។ ទោះបីជាក្នុងស្ថានភាពណាក៏ដោយ គ្រូពេទ្យគឺមិនអាចបោះបង់អ្នកជំងឺចោលឡើយ»។
កញ្ញា ចន្ទ្រា បានបន្តថា បច្ចុប្បន្ននៅក្នុងប្រទេសកម្ពុជាមានមនុស្សជិត ៦ ម៉ឺននាក់បានឆ្លងជំងឺកូវីដ ១៩ និង ៨២៥ នាក់បានស្លាប់ បើគិតត្រឹមថ្ងៃទី ៨ ខែ កក្កដា ឆ្នាំ ២០២១។
កញ្ញា ចន្ទ្រា បានបញ្ជាក់ថា៖ «បើទោះជា ការងាររបស់គ្រូពេទ្យ នាពេលបច្ចុប្បន្ន និងទៅអនាគត ជួបប្រឈមការឆ្លងជំងឺរាតត្បាតកូវីដ ១៩ បែបណាក៏ដោយ ក៏ខ្ញុំនៅតែចង់ធ្វើជាគ្រូពេទ្យដ៏ល្អម្នាក់នៅក្នុងកែវភ្នែក និងទឹកចិត្តរបស់អ្នកជំងឺ និងក្រុមគ្រួសាររបស់ពួកគេ»។
ដោយមានបំណងចង់រៀនបណ្ដើរ និង ធ្វើការងារក្នុងវិស័យសុខាភិបាលនោះ កញ្ញា ចន្ទ្រា បានបន្តថា ការសិក្សាផ្នែកវេជ្ជបណ្ឌិតទូទៅនេះ គឺត្រូវចំណាយពេលពី ៧ ឆ្នាំទៅ ៩ ឆ្នាំទើបចប់។
កញ្ញាបានថ្លែងថា៖ «ប្រសិនបើមានឱកាសអាចរកការងារធ្វើនៅក្នុងវិស័យសុខាភិបាលបានពីពេលនេះគឺល្អបំផុតសម្រាប់ខ្ញុំ ព្រោះក្រៅពីអាចជួយពង្រឹងសមត្ថភាពការរៀនសូត្រ តាមរយៈការអនុវត្តការងារជួយសង្គ្រោះអ្នកជំងឺជាក់ស្ដែងផ្ទាល់ គឺខ្ញុំអាចទទួលបានប្រាក់ចំណូលសម្រាប់ការទិញសម្ភារសិក្សាស្រាវជ្រាវលើមុខជំនាញរបស់ខ្ញុំថែមទៀត»។
យោងតាមលទ្ធផលប្រឡងថ្នាក់ជាតិ ជ្រើសរើសចូលរៀនថ្នាក់ឆ្នាំសិក្សាមូលដ្ឋាន សម្រាប់កម្រិតបរិញ្ញាបត្រ និងថ្នាក់ឆ្នាំទី ១ សម្រាប់កម្រិតបរិញ្ញាបត្ររងនៅតាមគ្រឹះស្ថានបណ្ដុះបណ្ដាលវិស័យសុខាភិបាលសម្រាប់ឆ្នាំសិក្សា ២០២០-២០២១ របស់គណៈកម្មាធិការប្រឡងថ្នាក់ជាតិចុះថ្ងៃទី ៣០ ខែ មិថុនា ឆ្នាំ ២០២១ សិស្សានុសិស្ស ដែលបានប្រឡងជាប់ (សម័យប្រឡង ថ្ងៃទី ២៨-២៩ ខែមិថុនា ឆ្នាំ ២០២១) ចូលសិក្សាក្នុងវិស័យសុខាភិបាលនៅទូទាំងប្រទេស មានចំនួន ៣ ៥៤០ នាក់ ក្នុងនោះផ្នែកវេជ្ជបណ្ឌិតទូទៅមានចំនួន ៩១៦ នាក់ផ្នែកឱសថមានចំនួន ៩២១ នាក់ ផ្នែកគិលានុបដ្ឋាកមានចំនួន ១ ៥៤៤ នាក់ផ្នែកបច្ចេកទេសវិទ្យាសាស្ត្រមានចំនួន ៤១ នាក់ ផ្នែកព្យាបាលដោយចលនាមានចំនួន ១៨ នាក់ និងផ្នែកឆ្មបមានចំនួន ១០០ នាក់។
ទោះជាបែបណាក៏ដោយ គណៈកម្មាធិការប្រឡងថ្នាក់ជាតិបានព្រមានថា នឹងលុបឈ្មោះចេញពីបញ្ជីឈ្មោះនិស្សិត ដែលបានប្រឡងជាប់ចូលរៀននៅតាមគ្រឹះស្ថានបណ្ដុះបណ្ដាលវិស័យសុខាភិបាលចំពោះបេក្ខជន បេក្ខនារី ទាំងឡាយណា ដែលមិនបានមកបង្ហាញខ្លួន និងដាក់ពាក្យសុំចូលរៀននៅតាមគ្រឹះស្ថានបណ្ដុះបណ្ដាលវិស័យសុខាភិបាល ដែលខ្លួនបានប្រឡងជាប់ ដោយភ្ជាប់មកជាមួយនូវវិញ្ញាបនបត្របណ្ដោះអាសន្ន មធ្យមសិក្សាទុតិយភូមិតាមកាលកំណត់ត្រឹមល្ងាចថ្ងៃទី ១៤ ខែកក្កដា ឆ្នាំ ២០២១ ខាងមុខនេះទេនោះ។
កាលពីថ្ងៃទី ២ ខែកក្កដា លោកនាយករដ្ឋមន្ត្រី ហ៊ុន សែន ក៏បានព្រមានលុបឈ្មោះក្រុមគ្រូពេទ្យស្ម័គ្រចិត្តចេញពីក្របខ័ណ្ឌមន្ត្រីរាជការក្នុងវិស័យសុខាភិបាលផងដែរ ប្រសិនបើរកឃើញថា បុគ្គលណាមួយមិនបានបំពេញតាមលក្ខខណ្ឌ ដែលលោកបានតម្រូវគឺការចូលរួមក្នុងការប្រយុទ្ធប្រឆាំងជំងឺកូវីដ ១៩។
លោកបញ្ជាក់ថា៖ «អត់មានមកថា ខ្ញុំស្ម័គ្រចិត្តចូលរួមប្រយុទ្ធប្រឆាំងកូវីដ ១៩ ទីបំផុតបានក្របខ័ណ្ឌហើយ ទៅឯណាឆ្កុយ។ (នឹងត្រូវ) លុបចេញពីក្របខ័ណ្ឌ ហើយយើងរកអ្នកដែលស្ម័គ្រចិត្តចូលរួម»៕
វីដេអូ៖