.jpg)
ជនសង្ស័យ និងគ្រឿងញៀនដែលបង្ក្រាបបានកន្លងមក។ រូបថត ប៉ូលិស
ភ្នំពេញៈ សមត្ថកិច្ចបង្ក្រាបបទល្មើសគ្រឿងញៀនបានចំនួន ៣៧៧ ករណីក្នុងខែមិថុនា និងឃាត់ខ្លួនជនពាក់ព័ន្ធ ៨០៧ នាក់ បើធៀបនឹងខែឧសភា បង្ក្រាបបាន ៤២៣ ករណី មានការថយចុះ ៤៦ ករណី។ ក្នុងនោះមានករណីជួញដូរ រក្សាទុក ២៨១ ករណី ការប្រើប្រាស់ ៨៧ ករណី ការសំយោគកែច្នៃ ២ ករណី និងការដាំដុះ ៧ ករណី។
ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ លោក ស ខេង លើកឡើងថា សកម្មភាពចរាចរណ៍ ជួញដូរ និងប្រើប្រាស់គ្រឿងញៀន នៅតែបន្តកើតមានឡើងក្នុងភូមិសាស្ត្ររាជធានី-ខេត្ត។ ក្នុងខែមិថុនា កម្លាំងសមត្ថកិច្ចបង្ក្រាបបានបទល្មើសគ្រឿងញៀនសរុប ៣៧៧ ករណី។
បើធៀបនឹងខែឧសភា ដែលបង្ក្រាបបាន ៤២៣ ករណី មានការថយចុះ ៤៦ ករណី ស្មើនឹង ១០៨ ភាគរយ។ ក្នុងនោះការជួញដូររក្សាទុក ២៨១ ករណី ការប្រើប្រាស់ ៨៧ ករណី ការសំយោគ កែច្នៃ ២ ករណី និងការដាំដុះ ៧ ករណី។
តាមរយៈហ្វេសប៊ុកនៅល្ងាចថ្ងៃទី ៧ ខែកក្កដា លោក ស ខេង ឱ្យដឹងថា ការបង្ក្រាបគ្រឿងញៀនក្នុងខែមិថុនា សមត្ថកិច្ចនគរបាលបង្ក្រាបបានចំនួន ៣៥៤ ករណី ឃាត់ខ្លួនជនសង្ស័យចំនួន ៧៦១ នាក់ (ស្រី ៥៣ នាក់)។ រីឯកងរាជអាវុធហត្ថបង្ក្រាបបាន ២៣ ករណី ឃាត់ខ្លួនជនសង្ស័យចំនួន ៤៦ នាក់ (ស្រី ៣ នាក់)។
លើបណ្តាញសង្គមហ្វេសប៊ុកលោក ស ខេង សរសេរថា ឃាត់ខ្លួនជនសង្ស័យសរុបមាន ៨០៧ នាក់ [សរុបទាំងការឃាត់ខ្លួនរបស់នគរបាល និងអាវុធហត្ថ] ស្រី ៥៦ នាក់។ ធៀបខែឧសភា ឆ្នាំ ២០២១ មាន ៩១៤ នាក់ ថយចុះ ១០៧ នាក់ ក្នុងនោះជនសង្ស័យក្នុងករណីជួញដូរ រក្សាទុក ៥៨៤ នាក់ (ស្រី ៣៩ នាក់)។ ជនសង្ស័យក្នុងករណីប្រើប្រាស់គ្រឿងញៀន ២១៤ នាក់ (ស្រី ១៧ នាក់) និងជនសង្ស័យក្នុងករណីសំយោគកែច្នៃ ៩ នាក់។
លោក ស ខេង បញ្ជាក់ថា ក្រៅពីលទ្ធផលកិច្ចប្រតិបត្តិការបង្ក្រាបបទល្មើសគ្រឿងញៀនជាក់ស្តែងនេះ អាជ្ញាធរមានសមត្ថកិច្ចគ្រប់ផ្នែក និងគ្រប់ជាន់ថ្នាក់ក៏បានខិតខំធ្វើសកម្មភាពក្នុងផ្នែកផ្សេងៗទៀត ដូចជាការងារអប់រំ ផ្សព្វផ្សាយ បង្ការ ទប់ស្កាត់ និងបដិសេធគ្រឿងញៀនតាមសហគមន៍ តាមបណ្តាញសារព័ត៌មាន និងបណ្តាញសង្គម ដែលមានអ្នកចូលរួមអាន និងស្តាប់រាប់លាននាក់។
លោក ម៉ក់ ជីតូ អគ្គស្នងការរងនគរបាលជាតិទទួលផែនគ្រឿងញៀនថ្លែងពីម្សិលមិញថា ថ្ងៃទី ៦ កក្កដា ខេត្តត្បូងឃ្មុំបានប្រមូលផ្ទៀងផ្ទាត់គ្រឿងញៀនដើម្បីត្រៀមបំផ្លាញចោល ខណៈខេត្តផ្សេងទៀតក៏កំពុងធ្វើការប្រមូលដូចគ្នា។
លោកថ្លែងថា៖ «ការប្រមូលហ្នឹង គឺយើងមើលសាលក្រមស្ថាពរនៃការសម្រេចប៉ុន្មាន អីប៉ុន្មាន ហើយបានយើងរៀបចំពិធីដើម្បីបំផ្លាញចោល។ ការបំផ្លាញហ្នឹង គឺយើងរៀបចំនៅខេត្តណា ដែលមានស្នាដៃបង្ក្រាបច្រើន គឺយើងប្រមូលទៅដាក់នៅខេត្តហ្នឹង»។
តាមការផ្សាយរបស់ក្រសួងព័ត៌មានដែលស្រង់សម្តី អភិបាលរងខេត្តត្បូងឃ្មុំ លោក គន់ សុភា ពីម្សិលមិញ គ្រឿងញៀនដែលកងកម្លាំងបង្ក្រាបបាន ហើយនាំយកមកត្រួតពិនិត្យ ប្រគល់ជូនគណៈកម្មការបង្ក្រាបគ្រឿងញៀននៃសាលាដំបូងខេត្តត្បូងឃ្មុំ សរុបមាន ៣៤៧ សំណុំរឿង និងមានទម្ងន់ ប្រមាណជិត ១,៥ គីឡូក្រាម។ ក្នុងនោះថ្នាំញៀនមេតំហ្វេតាមីនប្រភេទ ICE ទម្ងន់ ១,៤៣៨ ក្រាម និង ២០ កញ្ចប់ និងថ្នាំញៀនមេតំហ្វេតាមីន ប្រភេទ WY ទម្ងន់ ០,៦៥ ក្រាម ចំនួន ៦ គ្រាប់។
លោក ម៉ក់ ជីតូ ថ្លែងថា ចំនួនគ្រឿងញៀនដែលត្រូវបំផ្លាញចោលទាំងអស់នៅមិនទាន់ដឹងច្បាស់នៅឡើយ។ ប៉ុន្តែសម្រាប់រាជធានីភ្នំពេញមានចំនួន ៨ តោនដែលនឹងត្រូវបំផ្លាញចោលក្នុងនោះ ៤ តោនដុតបំផ្លាញចោល ចំណែក ៤ តោនទៀតត្រូវធ្វើការបន្សាប។
ប៉ុន្តែលោក ជីតូ មិនបានបញ្ជាក់ថ្ងៃណាឱ្យប្រាកដ ដែលនឹងត្រូវធ្វើការបំផ្លាញនោះទេ។ លោកថ្លែងថា៖ «យើងត្រូវធ្វើតាំងពីថ្ងៃទី ២៦ ប៉ុន្តែធ្វើមិនទាន់ តែយើងនៅតែធ្វើ ព្រោះឥឡូវគណៈកម្មការគេកំពុងដើរប្រមូល។ កាលណាប្រមូលហើយ ទើបរៀបចំពិធីបំផ្លាញ ដែលនឹងធ្វើឡើងនៅតាមសាលាឧទ្ធរណ៍តំបន់ ដែលមានភ្នំពេញ [ខេត្តព្រះសីហនុ] បាត់ដំបង និងត្បូងឃ្មុំ។ បើទីណាមានស្នាដៃបង្ក្រាបច្រើនជាងគេ យើងធ្វើនៅទីនោះ»។
លោកប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាថ្លែងថា ទោះបីជាអាជ្ញាធរបង្ហាញថា ករណីគ្រឿងញៀនមានការថយចុះក្តី ប៉ុន្តែពិនិត្យជារួមស្ថានភាពគ្រឿងញៀននៅតែជាបញ្ហាហានិភ័យចម្បងមួយសម្រាប់សង្គមជាតិ។
លោកថា៖ «អាជ្ញាធរពាក់ព័ន្ធ ក៏ដូចជាក្រសួងមហាផ្ទៃ គួរតែបង្កើតប្រព័ន្ធពិនិត្យ និងវាយតម្លៃប្រសិទ្ធភាពនៃការប្រយុទ្ធប្រឆាំងគ្រឿងញៀនដើម្បីរកឱ្យឃើញចំណុចត្រូវកែលម្អ ដែលអាចឈានដល់ការធ្វើកំណែទម្រង់ដំណើរការ និងយុទ្ធវិធីក្នុងការប្រយុទ្ធប្រឆាំងគ្រឿងញៀន ទើបអាចដោះស្រាយបញ្ហានេះបាន»៕
