​ឧបករណ៍​តេស្ត​រហ័ស​រក​អង់ទីហ្សែន​កូវីដ​ ១៩ ​ត្រូវបាន​អនុញ្ញាត​ឱ្យប្រើប្រាស់​ក្នុង​គ្រឹះស្ថាន ស្ថាប័ន អង្គភាព​រដ្ឋ ឬ​ឯកជន និង​នៅតាម​ផ្ទះ​

ឧបករណ៍តេស្តរហ័ស។ ក្រសួងសុខាភិបាលសម្រេចអនុញ្ញាតឱ្យគ្រឹះស្ថានសុខាភិបាល ស្ថាប័ន និងអង្គភាព...ប្រើប្រាស់ឧបករណ៍នេះ។ ហ៊ាន រង្សី

ភ្នំពេញៈ ក្រសួងសុខាភិបាលសម្រេចអនុញ្ញាតឱ្យគ្រឹះស្ថានសុខាភិបាលឯកជន ស្ថាប័ន និងអង្គភាពរដ្ឋមិនមែនសុខាភិបាល បណ្តាច្រកទ្វារចេញ-ចូលប្រទេស ក្រុមហ៊ុនឯកជន រោងចក្រ សហគ្រាស ទីកន្លែងអាជីវកម្មផ្សេងទៀត និងនៅតាមផ្ទះ ឬសម្រាប់បុគ្គលឯកជន ប្រើប្រាស់ឧបករណ៍តេស្តរហ័សរកអង់ទីហ្សែនកូវីដ ១៩។

ជាមួយគ្នានេះ ក្រសួងសុខាភិបាលក៏បានដាក់ចេញនូវគោលការណ៍ណែនាំប្រតិបត្តិស្តីពីការប្រើប្រាស់ឧបករណ៍តេស្តរហ័សរកអង់ទីហ្សែនកូវីដ ១៩ ដោយផ្អែកតាមស្ថានភាពនៃការឆ្លងរាលដាលនៃជំងឺកូវីដ ១៩ និងវត្តមាននៃករណីនាំចូលមេរោគបំប្លែងខ្លួនថ្មីប្រភេទដែលតា (Delta) នៅប្រទេសកម្ពុជា។

លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានសម្រេចដាក់ឱ្យអនុវត្តនូវគោលការណ៍ណែនាំប្រតិបត្តិការប្រើប្រាស់តេស្តរហ័សរកអង់ទីហ្ស៊ែនកូវីដ-១៩ (COVID-19 Rapid Antigen Test) កាលពីថ្ងៃទី ៧ ខែកក្កដាសម្រាប់គ្រឹះស្ថានសុខាភិបាលឯកជន ស្ថាប័ន និងអង្គភាពរដ្ឋមិនមែនសុខាភិបាល បណ្តា ច្រកទ្វារចេញ-ចូលប្រទេស ក្រុមហ៊ុនឯកជន រោងចក្រ សហគ្រាស រួមទាំងកន្លែងស្នាក់នៅប្រមូលផ្ដុំនៃការដ្ឋានសំណង់ និងទីកន្លែងអាជីវកម្មផ្សេងទៀត។

លោកលើកឡើងថា៖ «គោលការណ៍ប្រតិបត្តិនេះ ត្រូវបានរៀបចំឡើង ដោយផ្អែកតាមស្ថានភាពនៃការឆ្លងរាលដាលនៃជំងឺកូវីដ-១៩ និងដើម្បីរួមចំណែកនៅក្នុងការបង្ការ ទប់ស្កាត់ និងគ្រប់គ្រងការឆ្លងរាលដាលនៃជំងឺកូវីដ ១៩ ឱ្យកាន់តែមានប្រសិទ្ធភាពថែមទៀត។ គោលការណ៍ណែនាំប្រតិបត្តិនេះក៏ត្រូវមានវិសាលភាពអនុវត្តផងដែរចំពោះការធ្វើតេស្តរហ័សរកអង់ទីហ្ស៊ែនកូវីដ ១៩ នៅតាមផ្ទះ ឬជាលក្ខណៈឯកជន»។

ការអនុវត្តគោលការណ៍ប្រតិបត្តិស្តង់ដា (SOP) សម្រាប់គ្រប់គ្រងអ្នកដំណើរដែលត្រឡប់ពីក្រៅប្រទេស ចូលមកក្នុងប្រទេសកម្ពុជានៅតាមច្រកទ្វារចេញ-ចូលប្រទេស ដើម្បីទប់ស្កាត់ការឆ្លងរាលដាលនៃជំងឺកូវីដ ១៩ នៅកម្ពុជា រួមជាមួយគោលការណ៍ណែនាំប្រតិបត្តិសម្រាប់ការប្រើប្រាស់តេស្តរហ័សរកអង់ទីហ្ស៊ែនកូវីដ ១៩ នេះ។

គោលការណ៍នេះ ក៏រួមចំណែកយ៉ាងសំខាន់ក្នុងការទប់ស្កាត់ការចម្លងនៃមេរោគកូវីដ-១៩។ ជាពិសេសមេរោគបំប្លែងខ្លួនថ្មីប្រភេទ Delta និងមេរោគបំប្លែងខ្លួនថ្មីផ្សេងទៀតពីក្រៅប្រទេសចូលមកក្នុងសហគមន៍នៃប្រទេសកម្ពុជា។

លោក ម៉ម ប៊ុនហេង បន្ថែមថា៖ «ខ្ញុំសង្ឃឹមយ៉ាងមុតមាំថា មន្ត្រី បុគ្គលិក និងបុគ្គលពាក់ព័ន្ធទាំងអស់នឹងប្រើប្រាស់តេស្តរហ័សរកអង់ទីហ្ស៊ែនកូវីដ ១៩ ឱ្យបានត្រឹមត្រូវតាមគោលការណ៍ណែនាំប្រតិបត្តិនេះ ហើយក្រុមការងារបច្ចេកទេសនឹងធ្វើបច្ចុប្បន្នភាពឯកសារនេះជាបន្តទៀតតាមការចាំបាច់ ដើម្បីឆ្លើយតបទៅនឹងសភាពការណ៍វិវឌ្ឍន៍នៃជំងឺកូវីដ ១៩ ក្នុងព្រះរាជាណាចក្រកម្ពុជា»។

យោងតាមឯកសារគោលការណ៍ណែនាំប្រតិបត្តិដែលមានចំនួន ២០ ទំព័រនេះ ឱ្យដឹងថា ឧបករណ៍តេស្តរហ័សរកអង់ទីហ្ស៊ែនកូវីដ ១៩ ដែលកំពុងដាក់ឱ្យប្រើប្រាស់នៅលើពិភពលោក រួមទាំងឧបករណ៍តេស្តរហ័សរកអង់ទីហ្ស៊ែនកូវីដ ១៩ ដែលប្រើប្រាស់នៅកម្ពុជា សុទ្ធតែមានចំណុចខ្សោយមួយ គឺមានករណី "False Negative”។ មានន័យថា មានអ្នកផ្ទុកមេរោគកូវីដ ១៩ មួយចំនួនតូចដែលឧបករណ៍តេស្តរហ័សនេះ រកមិនឃើញ ហើយចេញលទ្ធផលអវិជ្ជមានទៅវិញ។

ឯកសារដដែលបន្តថា ទោះបីជាយ៉ាងណាក៏ដោយ ឧបករណ៍តេស្តរហ័សទាំងនោះ គឺជាឧបករណ៍យុទ្ធសាស្ត្រដែលអាចជួយកាត់ផ្តាច់ខ្សែបណ្តាញចម្លងនៃជំងឺកូវីដ ១៩ ព្រមទាំងមានអត្ថប្រយោជន៍ច្រើន ដើម្បីរួមចំណែកដល់ការគ្រប់គ្រងការឆ្លងរាលដាលនៃជំងឺកូវីដ ១៩។

ក្រសួងសុខាភិបាលលើកឡើងថា៖ «ឧបករណ៍តេស្តរហ័សនេះ មានភាពងាយស្រួលក្នុងការប្រើប្រាស់ដោយមិនតម្រូវឱ្យឆ្លងកាត់មន្ទីរពិសោធន៍។ មានតម្លៃសមរម្យដែលអាចប្រើប្រាស់បានទូលំទូលាយ និងមានសមត្ថភាពខ្ពស់ក្នុងការរកឃើញបានឆាប់រហ័សនូវមេរោគកូវីដ ១៩។ ជាពិសេស នៅពេលដែលអ្នកផ្ទុកមេរោគនេះកំពុងចេញរោគសញ្ញា ឬនៅពេលដែលចំនួនមេរោគកូវីដ ១៩ ដែលផ្ទុកក្នុងខ្លួនកើនឡើងខ្ពស់។ ដូច្នេះការប្រើប្រាស់លើ [តេស្ត] រហ័ស ដែលត្រឹមត្រូវនឹងជួយពន្លឿនការរកមេរោគកូវីដ ១៩ បាននៅក្នុងស្ថានភាពចាំបាច់»។

ចំពោះលក្ខខណ្ឌនៃការប្រើប្រាស់តេស្តរហ័សនេះដែរ ក្រសួងសុខាភិបាល បញ្ជាក់ថា ក្រសួងគឺជាស្ថាប័នមានសមត្ថកិច្ចក្នុងការសម្រេចទទួលស្គាល់ឧបករណ៍តេស្តរហ័សនេះ។ ធានាមិនឱ្យមានការនាំចូលផ្តាច់មុខនូវឧបករណ៍តេស្តរហ័សនេះទេ ព្រមទាំងធានាផ្គត់ផ្គង់ឧបករណ៍តេស្តរហ័សឱ្យបានគ្រប់គ្រាន់ទៅតាមបណ្តារាជធានី-ខេត្ត ជាពិសេសច្រកទ្វារចេញ-ចូលប្រទេសនៅតាមបណ្តាខេត្តជាប់ព្រំដែន។

ក្រសួងថា៖ «មានតែឧបករណ៍តេស្តរហ័ស ដែលត្រូវបានទទួលស្គាល់ដោយក្រសួងសុខាភិបាលប៉ុណ្ណោះ ដែលត្រូវបានអនុញ្ញាតឱ្យប្រើប្រាស់ក្នុងប្រទេសកម្ពុជា ហើយដែលលទ្ធផលចេញពីការប្រើឧបករណ៍តេស្តរហ័សនេះត្រូវបានទទួលស្គាល់ដោយអាជ្ញាធរសុខាភិបាល»។

គិតត្រឹមថ្ងៃទី ៧ ខែកក្កដា ក្រសួងសុខាភិបាលបានទទួលស្គាល់ និងអនុញ្ញាតឱ្យប្រើប្រាស់តេស្តរហ័សរកអង់ទីហ្ស៊ែនកូវីដ ១៩ ចំនួន ៤ ប្រភេទ រួមមាន ABBOTT PANBIO COVID-19 Ag RAPID TEST DEVICE, ROCHE SARS-CoV-2 Rapid Antigen Test 25T, STANDARD Q COVID-19 Ag Test និង INDICAID COVID-19 Rapid Antigen Test។

បន្ថែមលើប្រភេទឧបករណ៍តេស្តរហ័សទាំង ៤ នេះក្រសួងសុខាភិបាល នឹងសិក្សាលើឧបករណ៍តេស្តរហ័សផ្សេងទៀត ដើម្បីផ្តល់ការទទួលស្គាល់ និងការអនុញ្ញាតឱ្យការប្រើប្រាស់នៅប្រទេសកម្ពុជា ដោយផ្អែកលើគោលការណ៍ប្រសិទ្ធភាពខ្ពស់ សុវត្ថិភាព និងភាពងាយស្រួលក្នុងការប្រើប្រាស់ ភាពឆាប់រហ័សនៃការរកឃើញលទ្ធផល និងថ្លៃទាបសមរម្យ។

គួរបញ្ជាក់ដែរថា ឧបករណ៍តេស្តរហ័ស ត្រូវបានអនុញ្ញាតឱ្យប្រើប្រាស់ នៅពេលមានការសង្ស័យពីការចម្លងមេរោគកូវីដ-១៩ និងនៅពេលមានការផ្ទុះឆ្លងរាលដាលនៃជំងឺកូវីដ ១៩ ដើម្បីជាវិធានការស្រាវជ្រាវ និងរុករកអ្នកមានវិជ្ជមាន ដទៃទៀត តាមរយៈការពាក់ព័ន្ធដោយផ្ទាល់ ឬពាក់ព័ន្ធដោយប្រយោល។

ក្រសួងសុខាភិបាលបញ្ជាក់ថា សម្រាប់សាមីខ្លួនដែលបានធ្វើតេស្តរកមេរោគកូវីដ ១៩ ដោយខ្លួនឯង ហើយបានរកឃើញវិជ្ជមានមេរោគនេះត្រូវជូនដំណឹង ទៅមន្ត្រីសុខាភិបាល ឬអាជ្ញាធរមានសមត្ថកិច្ចពាក់ព័ន្ធ ដែលនៅជិតបំផុត ឬទាក់ទងទូរស័ព្ទ (Hotline) លេខ ១២២២ សម្រាប់ភូមិសាស្ត្ររាជធានី-ភ្នំពេញ ដើម្បីអនុវត្តនីតិវិធីបន្តទាក់ទងនឹងការព្យាបាល។ ការធ្វើបែបនេះ ដើម្បីទទួលបាននូវសេវាព្យាបាលនៅមន្ទីរពេទ្យព្យាបាលជំងឺកូវីដ ១៩ ឬមណ្ឌលព្យាបាលជំងឺកូវីដ ១៩ ឬ អនុវត្តគោលការណ៍នៃការព្យាបាលនៅតាមផ្ទះ។

ចំពោះបុគ្គលដែលរកឃើញថាអវិជ្ជមានមេរោគកូវីដ គឺតម្រូវឱ្យធ្វើចត្តាឡីស័ក និងត្រូវអនុវត្តតាមគោលការណ៍ណែនាំ និងវិធានផ្នែកសុខាភិបាលជាធរមាន។

បច្ចុប្បន្ន ការលក់ឧបករណ៍តេស្តរហ័សនេះត្រូវបានក្រសួងប្រៃសណីយ៍ និងទូរគមនាគមន៍ទទួលសំណើទិញពីក្រសួងស្ថាប័នដែលមានបុគ្គលិកច្រើន។ មកដល់ពេលនេះក៏មានក្រសួង ស្ថាប័នជាច្រើនបានបញ្ជាទិញ ហើយក្រសួងក៏បានបញ្ជាទិញឧបករណ៍តេស្តរហ័សនេះប្រមាណជា ៨០ ម៉ឺនតេស្តបន្ថែមទៀត សម្រាប់ផ្គត់ផ្គង់នូវតម្រូវការនេះ។

លោកនាយករដ្ឋមន្ត្រី ហ៊ុន សែន កាលពីថ្ងៃទី ១ ខែកក្កដា បានប្រកាសឱ្យក្រសួង ស្ថាប័នដែលមានមនុស្សច្រើនធ្វើការអាចប្រើប្រាស់ឧបករណ៍តេស្តរហ័សនេះសម្រាប់ធ្វើតេស្តក្នុងករណីមានការសង្ស័យឆ្លងវីរុសកូវីដ ១៩ ដើម្បីធ្វើការទប់ស្កាត់ការឆ្លងរាលដាលច្រើន និងអាចទប់ស្កាត់បានទាន់ពេលវេលាផងដែរ៕

វីដេអូ៖

ព័ត៌មានជាតិ

ព័ត៌មានថ្មីៗ

វីដេអូ