ភ្នំពេញៈ ក្នុងទិវាអបអរសាទរ បុណ្យរុក្ខទិវា ៩ កក្កដា លោកនាយករដ្ឋមន្ត្រី ហ៊ុន សែន អំពាវនាវដល់ប្រជាពលរដ្ឋឱ្យថែរក្សាការពារព្រៃឈើ ដើម្បីជាប្រយោជន៍ដល់ការរស់នៅ និងជីវិតសត្វព្រៃ និងប្រព័ន្ធជីវៈចម្រុះ។
លោក ហ៊ុន សែន បានសរសេរនៅលើហ្វេសប៊ុករបស់លោកថា៖ «សូមបងប្អូនប្រជាពលរដ្ឋខ្មែរទូទាំងប្រទេស ចូលរួមស្រឡាញ់ថែរក្សាការពារព្រៃឈើ និងចូលរួមដាំដុះកូនឈើ ថែរក្សាការពារបរិស្ថានធម្មជាតិ ឱ្យបានគង់វង្សនៅគ្រប់ទីកន្លែង ដើម្បីជាប្រយោជន៍ដល់ការរស់នៅរបស់ខ្លួនយើងផង សហគមន៍យើងផង និងជីវិតសត្វព្រៃគ្រប់ប្រភេទផងព្រមទាំងប្រព័ន្ធជីវៈចម្រុះជាច្រើនផងដែលជាសម្បត្តិរបស់មនុស្សជាតិនៅគ្រប់ជំនាន់»។
លោកនាយករដ្ឋមន្ត្រីបានសរសេរទៀតថា បុណ្យរុក្ខទិវាត្រូវបានបង្កើតឡើង នៅក្នុងឆ្នាំ ១៩៥២ ក្រោមព្រះរាជកិច្ចព្រះករុណា ព្រះបាទសម្តេចព្រះនរោត្តម សីហនុ ដើម្បីបំផុសចលនាដាំដើមឈើឡើងវិញ និងឱ្យប្រជាពលរដ្ឋចូលរួមថែរក្សាសម្បត្ដិព្រៃឈើ ជាពិសេសដើម្បីបណ្តុះគំនិតថែរក្សាការពារ និងគំនិតស្រលាញ់ព្រៃឈើ និងបរិស្ថានធម្មជាតិរបស់ប្រទេស៕