.jpg)
ពលរដ្ឋនៅខេត្តកំពង់ឆ្នាំងកំពុងធ្វើតេស្តរកជំងឺកូវីដ។ រូបថត រដ្ឋបាលខេត្ត
រដ្ឋបាលខេត្តកំពង់ឆ្នាំង សម្រេចបិទរោងចក្រ ត្រី ប៉ូស អ៉ីនធើណេសិនណល (ខេមបូឌា) ខូអិលធីឌី ដែលស្ថិតក្នុងភូមិសាស្ត្រភូមិច្រករមៀត ឃុំឈូកស ស្រុកកំពង់ត្រឡាចជាបណ្តោះអាសន្ន ចាប់ពីថ្ងៃទី១០ ខែកក្កដា ឆ្នាំ២០២១ រហូតដល់ថ្ងៃជូនដំណឹងសាជាថ្មី។
ការសម្រេចបិទជាបណ្តោះអាសន្ននូវរោងចក្រមួយនេះ ដោយរដ្ឋបាលខេត្ត បានអះអាងថា ដើម្បីទប់ស្កាត់ការរាលដាលជំងឺកូវីដក្នុងព្រឹត្តិការណ៍ សហគមន៍ ២០កុម្ភៈ ដែលកំពុងផ្ទុះក្នុងរោងចក្រមួយនេះ។
ក្នុងអំឡុងពេលបិទជាបណ្តោះអាសន្ននេះ រដ្ឋបាលខេត្ត បានដាក់ចេញវិធានការមួយចំនួន ដោយតម្រូវឲ្យអាជ្ញាធរហ៊ុមព័ទ្ធទីតាំងខាងលើទាំងមូលជាបណ្តោះអាសន្ន និងផ្អាកសកម្មភាពអាជីវកម្ម ផលិតកម្ម និងការចេញ-ចូលទីតាំងខាងលើជាបណ្តោះអាសន្ន។
បន្ថែមពីនេះ រដ្ឋបាលខេត្ត ក៏តម្រូវឱ្យកម្មករ កម្មការិនីរោងចក្រខាងលើទាំងអស់ ធ្វើចត្តាឡីស័កនៅតាមអគារធ្វើចត្តាឡីស័ករបស់រោងចក្រផ្ទាល់ ឬនៅតាមលំនៅឋាន និងទីសំណាក់រៀងៗខ្លួន ឱ្យបានហ្មត់ចត់តាមការណែនាំរបស់ក្រសួង សុខាភិបាល។
លោក ស៊ុន សុវណ្ណារិទ្ធិ បានសង្កត់ធ្ងន់ក្នុងលិខិតយ៉ាងដូច្នេះថា អាជ្ញាធរទាំងអស់ក្នុងមូលដ្ឋាន ត្រូវស្រាវជ្រាវរកអ្នកពាក់ព័ន្ធផ្ទាល់ ឬប្រយោល ដើម្បីធ្វើចត្តាឡីស័ក និងយកសំណាក។
លោកបានបញ្ជាក់ថា៖ «ចំពោះបុគ្គលិក កម្មករ និងអ្នកមានការពាក់ព័ន្ធផ្ទាល់ ឬប្រយោលក្នុងទីតាំងខាងលើ ត្រូវតាមដានសុខភាព របស់ខ្លួនជាប់ជាប្រចាំ និងសូមប្រញាប់ទំនាក់ទំនងមកក្រុមការងារមន្ទីរពេទ្យបង្អែកកំពង់ត្រឡាច ឬមណ្ឌលសុខភាព ដែលនៅជិតបំផុត ដើម្បីយកសំណាកធ្វើតេស្តជាបន្ទាន់ ចាប់ពីថ្ងៃទី១០ ខែកក្កដា ឆ្នាំ ២០២១ នេះតទៅ រៀងរាល់ម៉ោងធ្វើការ និងត្រូវធ្វើចត្តាឡីស័កស្របតាមការណែនាំ»៕
