សៀមរាបៈ មន្ត្រីបរិស្ថានខេត្តសៀមរាប ដាំកូនឈើចម្រុះឡើងវិញនៅតាមបណ្តាតំបន់ការពារធម្មជាតិលើផ្ទៃដីប្រមាណ ៩០ហិកតា ដើម្បីធានានិរន្តរភាពព្រៃឈើនៅក្នុងខេត្ត និងអំពាវនាវប្រជាពលរដ្ឋ និងស្ថាប័នពាក់ព័ន្ធចូលរួមការពារ និងអភិរក្សព្រៃឈើដែលដាំឡើងវិញកុំឲ្យបាត់បង់។
តាមការផ្សាយរបស់ក្រសួងព័ត៌មាន ដែលបានដកស្រង់សម្តី លោក ស៊ុន គង់ ប្រធានមន្ទីរបរិស្ថានខេត្តសៀមរាបបានឲ្យដឹងថា នៅចុងឆ្នាំ២០២០ដល់ដើមឆ្នាំ ២០២១នេះ មន្ត្រីបរិស្ថានដាំកូនឈើបានច្រើននៅលើខ្នងភ្នំគូលែន ស្រុកស្វាយលើ ស្រុកវ៉ារិននៅតំបន់អភិរក្សជីវៈចម្រុះចង្រ្កានរយ សរុបរួម ខ្ទង់៩០ ហិកតា។
លោកថ្លែងថា៖ «យើងដាំចម្រុះ មានដើមយាង គគីរ អ៊ីចឹងទៅ សម្រាប់មន្ទីរបរិស្ថាននៅតែមានគម្រោងដាំ ហើយយើងកំពុងរៀបចំថ្នាលបន្ថែម សម្រាប់ការងារបណ្តុះកូន ដើម្បីងាយស្រួលដឹកជញ្ជូនទៅតាមតំបន់ការពារធម្មជាតិ ដើម្បីឱ្យព្រៃឈើ សត្វព្រៃ ឬជីវចម្រុះ គង់វង្សនិងរីកចម្រើន បន្ទាប់ពីការបាត់បង់ទៅ»។
លោកប្រធានមន្ទីរបន្តថា ទោះបីជាឆ្នាំ ២០២១នេះ មិនមានសកម្មភាពប្រមូលផ្តុំ មនុស្សច្រើន ព្រោះតែវិបត្តិនៃជំងឺឆ្លងកូវីដ ១៩ ក៏ដោយ មន្ទីរបរិស្ថានខេត្តនៅតែរៀបចំកម្មវិធីដាំកូនឈើឡើងវិញ ជាប្រភេទពូជឈើប្រណីតៗរួមមាន ដើមគគីរ យាង(ឈើទាល) គ្រញូង និងកូនឈើចម្រុះជាច្រើនទៀត ដើម្បីបង្កើនគម្របព្រៃឈើ និងទេសភាពបៃតង នៅតាមតំបន់ការពារធម្មជាតិជាច្រើន ជាពិសេស នៅឧទ្យានជាតិភ្នំគូលែន និងសហគមន៍អេកូទេសចរណ៍ចង្រ្កានរយជាដើម។
បើតាមលោក ស៊ុន គង់ ដើម្បីថែរក្សាព្រៃឈើ ឱ្យនៅគង់វង្សបន្តទៀត ចាំបាច់ត្រូវមានការចូលរួមពីគ្រប់ភាគីពាក់ព័ន្ធ ជាពិសេសប្រជាពលរដ្ឋ ដែលជាអ្នកអាស្រ័យផលនឹងព្រៃឈើតែម្តង ដោយពួកគាត់ត្រូវហ៊ានចូលរួមរាយការណ៍នៅពេលកើតមានបទល្មើសព្រៃឈើ និងការដាំដុះស្តារឡើងវិញនូវគម្របព្រៃឈើ ដែលខូចខាតឬបាត់បង់កន្លងមក។
លោកថ្លែងថា៖ «កន្លងមកនេះ អង្គភាពពាក់ព័ន្ធជាច្រើននៅក្នុងខេត្តសៀមរាប រួមមាន មន្ទីរបរិស្ថាន ខណ្ឌរដ្ឋបាលព្រៃឈើ និងអាជ្ញាធរអប្សារា បានដាំកូនឈើជាច្រើន នៅតំបន់សឹករេចរឹល និងតំបន់ ប្រាង្គប្រាសាទ ដើម្បីបង្កើនសោភ័ណភាព និងភាពបៃតង ព្រោះព្រៃឈើមានផលប្រយោជន៍ជាច្រើនដូចជា ផ្តល់ជាម្លប់ ទាក់ទាញទឹកភ្លៀង ផ្តល់សំណើមដល់ភពផែនដី កាត់បន្ថយការបំពុល បរិស្ថាន ផ្តល់នូវការប្រើប្រាស់ប្រចាំថ្ងៃ ហើយអ្វីដែលពិសេសជាងនេះទៀត គឺប្រាង្គប្រាសាទទាំងអស់នៅក្នុងខេត្តសៀមរាប ក៏ត្រូវបានការពារនិងថែរក្សាដោយសារដើមឈើដែរ»៕