ភ្នំពេញៈ មនុស្សចំនួន ២៦ នាក់ បានទទួលមរណភាព ដោយសារជំងឺកូវីដ១៩ ខណៈអ្នកឆ្លងវីរុសកូវីដ១៩ បន្ថែមទៀត ៩៣៣ នាក់ និងអ្នកជាសះស្បើយចំនួន ៧៤៣ នាក់។
យោងតាមសេចក្តីប្រកាសរបស់ក្រសួងសុខាភិបាលនៅព្រឹកថ្ងៃទី១០ ខែកក្កដានេះ បានឱ្យដឹងថា មនុស្សចំនួន ៩៣៣នាក់ បានរកឃើញឆ្លងវីរុសកូវីដ១៩ ដែលក្នុងនោះ ២០០ នាក់ជាអ្នកដំណើរមកពីបរទេស និង មានអ្នកជាសះស្បើយចំនួន ៧៤៣ នាក់។
គិតត្រឹមព្រឹក ថ្ងៃទី១០ ខែកក្កដា ឆ្នាំ ២០២១នេះ កម្ពុជាមានអ្នកជំងឺកូវីដ១៩ សរុបរហូតដល់ ៥៩៩៧៨នាក់ អ្នកជាសះស្បើយ សរុបចំនួន ៥១៦៦០ នាក់ និងអ្នកស្លាប់បានកើនឡើងដល់ ៨៨១ នាក់។
លោកស្រី យក់ សម្បត្តិ រដ្ឋលេខាធិការក្រសួងសុខាភិបាល បានលើកឡើងក្នុងពិធីទទួលវ៉ាក់សាំងដែលកម្ពុជា បានបញ្ជាទិញពីប្រទេសចិន ចំនួន ៤ លានដូស នៅព្រលានយន្តហោះអន្តរជាតិភ្នំពេញ ព្រឹកថ្ងៃសៅរ៍នេះថា បើទោះជាចំនួនអ្នកស្លាប់ ដោយសារតែជំងឺកូវីដ ១៩ មានចំនួនច្រើន តែបើប្រៀបធៀបនឹងប្រទេសជិតខាង គឺកម្ពុជា អាចគ្រប់គ្រងបាន។
លោកស្រីបានបន្តថា ក្រុមគ្រូពេទ្យកម្ពុជា បានព្យាយាមជួយសង្រ្គោះអ្នកជំងឺកូវីដ ១៩ យ៉ាងខ្លាំងក្លា ប៉ុន្តែដោយសារតែអ្នកជំងឺដែលមិនអាចជួយសង្រ្គោះបាន ព្រោះតែពួកគេ មានជំងឺប្រចាំកាយធ្ងន់ធ្ងរស្រាប់ ដែលជាហេតុនាំឲ្យការជួយសង្រ្គោះ មិនទទួលបានជោគជ័យ៕