រដ្ឋបាលខេត្តកំពង់ឆ្នាំងអំពាវនាវឲ្យអ្នកពាក់ព័ន្ធ ជាពិសេសប្រជាពលរដ្ឋដែលមានក្បាលដីស្ថិតក្នុងនៅភូមិក្រាំងតាមុំ ឃុំតាំងក្រសាំង ស្រុកទឹកផុស មកទទួលព័ត៌មាននានាពីការចុះបញ្ចីលក្ខណៈជាប្រព័ន្ធ បន្ទាប់ពីគណៈកម្មការរដ្ឋបាលនឹងធ្វើការផ្សព្វផ្សាយសេចក្តីប្រកាសកំណត់តំបន់វិនិច្ឆ័យនៅក្នុងតំបន់នេះ។
តាមសេចក្តីជូនជាព័ត៌មានរបស់រដ្ឋាភិបាលខេត្តកំពង់ឆ្នាំងចុះថ្ងៃទី ៩ កក្កដា បានឲ្យដឹងថា ការផ្សព្វផ្សាយសេចក្តីប្រកាសកំណត់តំបន់វិនិច្ឆ័យភូមិក្រាំងតាមុំ ឃុំតាំងក្រសាំង ស្រុកទឹកផុស ខេត្តកំពង់ឆ្នាំង នឹងធ្វើឡើងនៅថ្ងៃទី ១២ កក្កដា នៅបរិវេណសាលាបុណ្យក្រាំងតាមុំ។
លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានអះអាងក្នុងលិខិតនេះថា សាធារណជន ព្រមទាំងគ្រប់មន្ទីរ អង្គភាព និងស្ថាប័ន ឬភ្នាក់ងារហិរញ្ញវត្ថុ ដែលមានការពាក់ព័ន្ធនឹងក្បាលដីទាំងអស់ នៅក្នុងតំបន់នេះ នឹងមកចូលរួមស្តាប់ការផ្សព្វផ្សាយសេចក្តីប្រកាសកំណត់តំបន់ធ្វើការវិនិច្ឆ័យ ការបំភ្លឺអំពីបញ្ហាច្បាប់ និងការឆ្លើយរាល់សំណួរទាក់ទងនឹងការវិនិច្ឆ័យតាមពេលវេលា និងទីកន្លែងឱ្យបានគ្រប់ៗគ្នា។
លោកបញ្ជាក់ថា៖ «រដ្ឋបាលខេត្តកំពង់ឆ្នាំង សង្ឃឹមយ៉ាងមុតមាំងថា សាធារណជន និងអង្គភាពពាក់ព័ន្ធនឹងក្បាលដីក្នុងតំបន់វិនិច្ឆ័យខាងលើនឹងឆ្លៀតឱកាស ដើម្បីចូលរួមបំពេញកាតព្វកិច្ចរបស់ខ្លួនពាក់ព័ន្ធនឹងការចុះបញ្ជីដីធ្លីមានលក្ខណៈជាប្រព័ន្ធយ៉ាងផុសផុលជាមិនខាន»៕