The Phnom Penh Post Search

Search form




Logo of Phnom Penh Post newspaper Phnom Penh Post - រដ្ឋបាលខេត្ត​កំពង់ឆ្នាំង​សម្រេច​បិទ​ជា​បណ្តោះអាសន្ន​ផ្សារលើ​ក្រុង​កំពង់ឆ្នាំង​ ដើម្បី​ការឆ្លង​រាលដាល​ជំងឺ​កូវីដ

រដ្ឋបាលខេត្ត​កំពង់ឆ្នាំង​សម្រេច​បិទ​ជា​បណ្តោះអាសន្ន​ផ្សារលើ​ក្រុង​កំពង់ឆ្នាំង​ ដើម្បី​ការឆ្លង​រាលដាល​ជំងឺ​កូវីដ

Content image - Phnom Penh Post
រដ្ឋបាលខេត្ត​កំពង់ឆ្នាំង​សម្រេច​បិទ​ជា​បណ្តោះអាសន្ន​ផ្សារលើ​ក្រុង​កំពង់ឆ្នាំង ក្នុង​ភូមិសាស្ត្រ​ត្រពាំងបី សង្កាត់​ផ្សារឆ្នាំង ក្រុង​កំពង់ឆ្នាំង ចាប់ពី​ថ្ងៃទី ១០ ខែកក្កដា។

រដ្ឋបាលខេត្ត​កំពង់ឆ្នាំង​សម្រេច​បិទ​ជា​បណ្តោះអាសន្ន​ផ្សារលើ​ក្រុង​កំពង់ឆ្នាំង​ ដើម្បី​ការឆ្លង​រាលដាល​ជំងឺ​កូវីដ

កំពង់ឆ្នាំងៈ រដ្ឋបាលខេត្ត​កំពង់ឆ្នាំង​សម្រេច​បិទ​ជា​បណ្តោះអាសន្ន​ផ្សារលើ​ក្រុង​កំពង់ឆ្នាំង ក្នុង​ភូមិសាស្ត្រ​ត្រពាំងបី សង្កាត់​ផ្សារឆ្នាំង ក្រុង​កំពង់ឆ្នាំង ចាប់ពី​ថ្ងៃទី ១០ ខែកក្កដា ខណៈ​ខេត្ត​បាត់ដំបង​បិទខ្ទប់​ទីតាំង​វរសេនា​តូច​នគរបាល​ការពារ​ព្រំដែន​គោក លេខ ៨១៩ ប្រចាំ​ស្រុក​កំរៀង​ជា​បណ្តោះអាសន្ន បន្ទាប់ពី​បាន​រកឃើញ​ថា មេបញ្ជាការ និង​មេបញ្ជាការរង​ម្នាក់​កើត​កូវីដ១៩។

លិខិត​របស់​រដ្ឋបាល​ខេត្ត​កំពង់ឆ្នាំង​ចេញផ្សាយ​ថ្ងៃនេះ បាន​សម្រេច​ឲ្យ​មាន​ការបិទជា​បណ្តោះអាសន្ន​ផ្សារលើ​ក្រុង​កំពង់ឆ្នាំង​ក្នុង​ភូមិសាស្ត្រ​ត្រពាំងបី សង្កាត់​ផ្សារឆ្នាំង ក្រុង​កំពង់ឆ្នាំង ចាប់ពី​ថ្ងៃទី ១០ ខែកក្កដា រហូតដល់​មាន​ការជូន​ដំណឹង​ថ្មី។ ការបិទ​ទីតាំង​នេះ ដើម្បី​ទប់ស្កាត់​ការរាលដាល​ជំងឺ​កូវីដ ១៩ ក្នុង​ព្រឹត្តិការណ៍​សហគមន៍ ២០ កុម្ភៈ បន្ទាប់ពី​បាន​រកឃើញ​អ្នក​វិជ្ជមាន​កូវីដ ១៩ ធ្លាប់បាន​ចេញចូល​ទីតាំង​ខាងលើ។

ក្នុង​អំឡុងពេល​បិទ​ជា​បណ្តោះអាសន្ន រដ្ឋបាលខេត្ត​កំពង់ឆ្នាំង​បាន​ដាក់ចេញ​វិធានការ​មួយ​ចំនួន​ដូចជា ហ៊ុមព័ទ្ធ​ទីតាំង​ផ្សារលើ​ទាំងមូល ផ្អាក​សកម្មភាព​លក់ដូរ និង​ការចេញចូល​ទីតាំង​នេះ និង​តម្រូវ​ឲ្យ​អាជីវករ​ផ្សារលើ​ទាំងអស់​ធ្វើ​ចត្តាឡីស័ក​តាម​លំនៅឋាន និង​ទីសំណាក់​រៀងៗ​ខ្លួន​ឲ្យ​បាន​ហ្មត់ចត់ តាម​ការណែនាំ​របស់​ក្រសួង​សុខាភិបាល។ បន្ថែម​លើ​នោះ មន្ត្រី​មាន​សមត្ថកិច្ច​ត្រូវ​ស្រាវជ្រាវ​រក​អ្នកពាក់ព័ន្ធ​ផ្ទាល់​ ឬ​ប្រយោល​ ដើម្បី​ធ្វើ​ចត្តាឡីស័ក និង​យក​សំណាក។

ក្នុង​លិខិត​សរសេរថា «ចំពោះ​បងប្អូន​ប្រជាពលរដ្ឋ​ដែល​ធ្លាប់​ចេញចូល និង​អ្នក​មាន​ការពាក់ព័ន្ធ​ផ្ទាល់ ឬ​ប្រយោល​ក្នុង​ទីតាំង​ខាងលើ​ត្រូវ​តាមដាន​សុខភាព​របស់ខ្លួន​ជាប់​ជាប្រចាំ និង​សូម​ប្រញាប់​ទំនាក់ទំនង​មក​ក្រុមការងារ​មន្ទីរពេទ្យ​ខេត្តកំពង់ឆ្នាំង ឬ មណ្ឌល​សុខភាព​ដែល​នៅ​ជិត​បំផុត ដើម្បី​យក​សំណាក​ធ្វើតេស្ត​ជាបន្ទាន់ ចាប់ពី​ថ្ងៃទី ១០ ខែកក្កដា ឆ្នាំ ២០២១ នេះ​តទៅ រៀងរាល់​ម៉ោង​ធ្វើការ និង​ត្រូវធ្វើ​ចត្តាឡីស័ក ស្រប​តាម​ការណែនាំ»។

ដោយឡែក​ខេត្ត​បាត់ដំបង​នៅ​រសៀល​នេះ​លោក សុខ គឹមខុន អភិបាលស្រុក​កំរៀង​ប្រាប់ថា ទីតាំង​វរសេនាតូច​នគរបាល​ការពារ​ព្រំដែន​គោក លេខ ៨១៩ ប្រចាំ​ស្រុក​កំរៀង ត្រូវ​បាន​បិទខ្ទប់​ជា​បណ្តោះអាសន្ន បន្ទាប់ពី​បាន​រកឃើញ​ថា មេបញ្ជាការ និង​មេបញ្ជាការរង​ម្នាក់​ផ្ទុក​ជំងឺ​កូវីដ១៩។ លោក​ថា​និង​មន្ត្រី​វរសេនាតូច​នគរបាល​ការពារ​ព្រំដែន​គោក លេខ ៨១៩ ជាង ២០ រូប ដែល​ជាប់​ពាក់ព័ន្ធ​ត្រូវធ្វើ​ចត្តាឡីស័ក​នៅក្នុង​បន្ទាយ ចំណែក​មេបញ្ជាការ និង​មេបញ្ជាការ​ម្នាក់​កំពុង​ដាក់ឱ្យ​សម្រាក​ព្យាបាល​នៅក្នុង​មណ្ឌល​សុខភាព​ត្រាង។

លោក​ថ្លែងថា៖ «កងកម្លាំង​មានតែ ២ នាក់​ទេ​ដែល​រកឃើញ​មាន​កូវីដ ១៩ អ្នក​ទាំង ២ ត្រូវ​បាន​យកទៅ​ព្យាបាល​នៅ​ដាច់ដោយឡែក ចំណែក​កងកម្លាំង​ជាង ២០ នាក់​ធ្វើ​ចត្តាឡីស័ក​នៅក្នុង​បន្ទាយ»។

លោក​អភិបាលស្រុក​កំរៀង​បញ្ជាក់​ថា ការបិទ​ទីតាំង​វរសេនាតូច​នគរបាល​ការពារ​ព្រំដែន​គោក លេខ ៨១៩ ដែលមាន​ទីតាំង​ស្ថិតនៅ​ភូមិ​លំផាត់ ឃុំ​អូដារ ស្រុក​កំរៀង ខេត្ត​បាត់ដំបង ធ្វើឡើង​ចាប់តាំងពី​ល្ងាច​ថ្ងៃទី ៨ ខែកក្កដា នេះ​តទៅ​រហូត​រយ:ពេល ១៤ ថ្ងៃ៕

អត្ថបទគួរចាប់អារម្មណ៍