.jpg)
ក្រសួងប្រៃសណីយ៍ និងទូរគមនាគមន៍ចុះអនុស្សរណៈនៃការយោគយល់ (MoU) ជាមួយក្រសួងមហាផ្ទៃ និងសន្តិសុខនៃសាធារណរដ្ឋកូរ៉េ ។
ភ្នំពេញៈ ក្រសួងប្រៃសណីយ៍ និងទូរគមនាគមន៍ចុះអនុស្សរណៈនៃការយោគយល់ (MoU) ជាមួយក្រសួងមហាផ្ទៃ និងសន្តិសុខនៃសាធារណរដ្ឋកូរ៉េ ស្តីពីការបង្កើតមជ្ឈមណ្ឌលកិច្ចសហប្រតិបត្តិការរដ្ឋាភិបាលឌីជីថល ដើម្បីដំណើរការមជ្ឈមណ្ឌលរដ្ឋាភិបាលឌីជីថលក្នុងគោលបំណងចែករំលែកបទពិសោធន៍ និងការផ្ទេរនូវបច្ចេកវិទ្យា ក្រោមជំនួយឥតសំណងនៃសាធារណរដ្ឋកូរ៉េពីឆ្នាំ ២០២១ ដល់ឆ្នាំ ២០២៣។
ក្រសួងប្រៃសណីយ៍ និងទូរគមនាគមន៍បានចុះអនុស្សរណៈនៃការយោគយល់ស្តីពីការបង្កើតមជ្ឈមណ្ឌលកិច្ចសហប្រតិបត្តិការរដ្ឋាភិបាលឌីជីថលជាមួយក្រសួងមហាផ្ទៃ និងសន្តិសុខនៃសាធារណរដ្ឋកូរ៉េ កាលពីរសៀលថ្ងៃទី ៨ ខែកក្កដា ឆ្នាំ ២០២១ តាមរយៈប្រព័ន្ធវីដេអូ។ នេះបើតាមហ្វេសប៊ុកក្រសួងប្រៃសណីយ៍នៅរសៀលថ្ងៃទី ១០ កក្កដានេះ។
តាមរយៈបណ្តាញសង្គមហ្វេសប៊ុក ក្រសួងប្រៃសណីយ៍បានឲ្យដឹងថា ការចុះអនុស្សរណៈនេះធ្វើឡើង ក្រោមអធិបតីភាពឯកឧត្តមរដ្ឋមន្ត្រី ជា វ៉ាន់ដេត និងឯកឧត្តម Jeon Hae-cheol រដ្ឋមន្ត្រីក្រសួងមហាផ្ទៃ និងសន្តិសុខកូរ៉េ ដោយមានការចូលរួមពីសំណាក់ឯកឧត្តម ឡុង ឌីម៉ង់ ឯកអគ្គរាជទូតព្រះរាជាណាចក្រកម្ពុជាប្រចាំសាធារណរដ្ឋកូរ៉េ ឯកឧត្តម Park Heung-Kyeong ឯកអគ្គរដ្ឋទូតនៃសាធារណរដ្ឋកូរ៉េប្រចាំព្រះរាជាណាចក្រកម្ពុជា និងមន្ត្រីរាជការនៃក្រសួងទាំងពីរផងដែរ។
ហ្វេសប៊ុកក្រសួងប្រៃសណីយ៍សរសេរថា «អនុស្សរណៈនៃការយោគយល់នេះ ធ្វើឡើងដើម្បីដំណើរការមជ្ឈមណ្ឌលរដ្ឋាភិបាលឌីជីថលក្នុងគោលបំណងចែករំលែកបទពិសោធន៍ និងការផ្ទេរនូវបច្ចេកវិទ្យា ក្រោមជំនួយឥតសំណងនៃសាធារណរដ្ឋកូរ៉េពីឆ្នាំ ២០២១ ដល់ឆ្នាំ ២០២៣»។
ភាគីទាំងពីរបានបញ្ជាក់ពីជំនឿយ៉ាងមុតមាំថាមជ្ឈមណ្ឌលនេះនឹងបម្រើជាថ្នាលសម្រាប់រាជរដ្ឋាភិបាលកម្ពុជាកំណត់ទិសដៅកាន់តែច្បាស់សម្រាប់បដិវត្តកម្មឌីជីថល និងសម្រេចនូវគោលដៅក្នុងការផ្តល់សេវាសាធារណៈប្រកបដោយប្រសិទ្ធភាព៕
