ស្ថានអគ្គកុងស៊ុលកម្ពុជាប្រចាំទីក្រុងហូជីមិញអំពាវនាវឲ្យប្រជាពលរដ្ឋខ្មែរគ្រប់រូប បង្កើនការប្រុងប្រយ័ត្នខ្ពស់បំផុតអំពីហានិភ័យនៃការឆ្លងវីរុសកូវីដ ១៩ បំប្លែងថ្មី Delta និង Delta Plus បន្ទាប់ពីប្រទេសនេះបានបិទទីក្រុងដ៏ធំរបស់ខ្លួន និងហាមមនុស្សចេញពីផ្ទះ។
សេចក្តីជូនដំណឹងរបស់ស្ថានអគ្គកុងស៊ុលកម្ពុជាប្រចាំទីក្រុងហូជីមិញ ចេញផ្សាយជាបន្តបន្ទាប់ កាលពីពេលថ្មីៗនេះក៏បានអំពាវនាវកុំឱ្យពលរដ្ឋខ្មែរ ដែលកំពុងមានវត្តមានក្នុងទីក្រុងហូជីមិញ និងខេត្តផ្សេងៗរបស់ប្រទេសនេះ ធ្វើការផ្លាស់ទីពីកន្លែងមួយទៅទីកន្លែងមួយទៀត បើពុំចាំបាច់ និងពន្យារពេលការធ្វើដំណើរវិលត្រឡប់មកប្រទេសកម្ពុជាវិញ។
យោងតាមគេហទំព័រសារព័ត៌មាន https:/huoitre. ចុះផ្សាយកាលពីថ្ងៃទី ០៧ ខែកក្កដា ឆ្នាំ ២០២១ បានឱ្យដឹងថា អាជ្ញាធរទីក្រុងហូជីមិញបានសម្រេចដាក់ឱ្យអនុវត្តជាថ្មីនូវសារាចរណែនាំលេខ ១៦ ស្តីពីការហាមជួបជុំគ្នាលើសពី ០២ នាក់ នៅទីសាធារណៈនៅទូទាំងទីក្រុងហូជីមិញ ដែលនឹងអនុវត្តចាប់ពីម៉ោង ០០៖០០ នាទី ថ្ងៃទី ០៩ ខែកក្កដា ឆ្នាំ ២០២១ សម្រាប់រយៈពេល ១៥ ថ្ងៃ។
ក្នុងពេលផ្អាកជាបណ្តោះអាសន្ននេះរាល់មធ្យោបាយបម្រើសេវាសាធារណៈ និងទីកន្លែងកម្សាន្តគ្រប់ប្រភេទនឹងត្រូវរឹតបន្តឹងការត្រួតពិនិត្យចំពោះប្រជាជនដែលចូលមកទីក្រុងហូជីមិញ ក្នុងនោះប្រជាជនក៏ត្រូវនៅក្នុងផ្ទះ ឬអាចចេញពីគេហដ្ឋានក្នុងករណីដែលចាំបាច់បំផុតដូចជា ការទិញម្ហូបអាហារ ថ្នាំពេទ្យ ឬ បំពេញបេសកកម្មតែប៉ុណ្ណោះ។
សេចក្តីជូនដំណឹងរបស់ស្ថានទូតកម្ពុជាបានបញ្ជាក់ថា៖ «ការផ្លាស់ទីពីកន្លែងមួយទៅទីកន្លែងមួយទៀត ឬការធ្វើដំណើរវិលត្រឡប់ មកប្រទេសកម្ពុជាវិញ ក្នុងអំឡុងពេលនេះអាចបង្កហានិភ័យនៃការឆ្លងជំងឺក្នុងពេលធ្វើដំណើរ និងអាចនាំយកជំងឺកូវីដ ១៩ ចូលមកចម្លងក្នុងប្រទេសថែមទៀត»។
ក្រៅពីនេះ ស្ថានអង្គកុងស៊ុលក៏បានស្នើដល់បងប្អូនទាំងអស់នៅក្នុងប្រទេសនេះឱ្យមេត្តាបង្កើនការប្រុងប្រយ័ត្នខ្ពស់បំផុត ដោយពាក់ម៉ាស់ លាងដៃនឹងសាប៊ូ ឬទឹកលាងដៃប្រឆាំងមេរោគឱ្យបានញឹកញាប់ រក្សាគម្លាតសុវត្ថិភាព (២ ម៉ែត្រ) កុំចេញក្រៅក្នុងករណីមិនចាំបាច់ និងត្រូវអនុវត្តវិធានការសុខាភិបាល និងសារាចរណែនាំខាងលើឱ្យបានខ្ជាប់ខ្ជួន និងត្រៀមខ្លួនផ្ដល់កិច្ចសហការជាមួយអាជ្ញាធរ៕