ភ្នំពេញៈ ក្រសួងសុខាភិបាលនឹងធ្វើសន្និសីទសារព័ត៌មានជាមួយរដ្ឋបាលរាជធានីភ្នំពេញ ដើម្បីផ្សព្វផ្សាយពីនីតិវិធី និងយន្តការដាក់ព្យាបាលតាមផ្ទះចំពោះអ្នកជំងឺកូវីដ ១៩ កម្រិតស្រាល និងគ្មានរោគសញ្ញាសម្រាប់ភូមិសាស្ត្ររាជធានីភ្នំពេញនៅព្រឹកថ្ងៃទី ១២ ខែកក្កដា ឆ្នាំ ២០២១ នេះ។
យោងតាមសេចក្តីប្រកាសរបស់ក្រសួងសុខាភិបាលនៅល្ងាចថ្ងៃទី ១០ ខែកក្កដានេះបានឲ្យដឹងថា ក្រសួងសុខាភិបាលសហការជាមួយរដ្ឋបាលរាជធានីភ្នំពេញនឹងធ្វើសន្និសីទសារព័ត៌មាននៅថ្ងៃទី ១២ ខែកក្កដា វេលាម៉ោង ៩ ព្រឹកនៅសាលារាជធានីភ្នំពេញ (បន្ទប់ប្រជុំជាន់ទី ២ អគារខ ) ក្នុងគោលបំណងផ្សព្វផ្សាយនីតិវិធី និងយន្តការព្យាបាលតាមផ្ទះ ចំពោះអ្នកជំងឺកូវីដ ១៩ កម្រិតស្រាល និងគ្មានរោគសញ្ញា សម្រាប់ភូមិសាស្ត្ររាជធានីភ្នំពេញ។
ក្រសួងបញ្ជាក់ជូនថា សន្និសីទសារព័ត៌មាននេះនឹងមានការចូលរួមពីលោកវេជ្ជបណ្ឌិត ង៉ូវ កាង រដ្ឋលេខាធិការក្រសួងសុខាភិបាល លោកសាស្ត្រាចារ្យ ហេង សុទ្ធី អនុរដ្ឋលេខាធិការក្រសួងសុខាភិបាលលោក កើត ឆែ អភិបាលរងរាជធានីភ្នំពេញ និងលោក ងី មានហេង ប្រធានមន្ទីរសុខាភិបាលនៃរដ្ឋបាលរាជធានីភ្នំពេញ៕