.jpg)
លោកនេត្រ ភក្ត្រា (ស្តាំ) ចុះពិនិត្យកន្លែងធ្វើក្តាមឈូស នៅខេត្តកំពត កាលពីថ្ងៃទី៨ខែកក្កដាឆ្នាំ២០២១។ រូបថត ក្រសួងបរិស្ថាន
ភ្នំពេញៈ ក្រសួងបរិស្ថាន សម្រេចយកឈើដែលរឹបអូសបានពីការទប់ស្កាត់ និងបង្ក្រាបបទល្មើសធនធានធម្មជាតិ ដើម្បីផលិតក្តាមឈូស ផ្តល់ជូនអាជ្ញាធរពាក់ព័ន្ធប្រើប្រាស់ សម្រាប់តម្កល់សពអ្នកជំងឺកូវីដ ១៩ ដែលបានស្លាប់។
លោក នេត្រ ភក្ត្រា អ្នកនាំពាក្យក្រសួងបរិស្ថានបានឲ្យដឹងថា រហូតមកដល់ថ្ងៃទី ១០ ខែ កក្កដា ឆ្នាំ ២០២១ អ្នកជំងឺកូវីដ ១៩ ចំនួន ៨៨១ នាក់ហើយ បានស្លាប់ ចាប់តាំងពីព្រឹត្តិការណ៍សហគមន៍ថ្ងៃទី ២០ ខែ កុម្ភៈ ឆ្នាំ ២០២១ បានផ្ទុះឡើងនៅកម្ពុជា។ ឥឡូវនេះអត្រានៃការស្លាប់ប្រចាំថ្ងៃចន្លោះពី ២០ ទៅ ៣០ នាក់។
លោកបន្តថា មិនមែនបន្លាច មិនមែនប្រមាថ ហើយក៏មិនមែនជាក្តីសុបិន្តដែរ តែវាជាការពិត ដោយអនុវត្តតាមអនុសាសន៍ របស់លោកនាយករដ្ឋមន្ត្រីនៃ ហ៊ុន សែន មានប្រសាសន៍ថា «ទោះបីជាប្រទេសយើងក្រ តែមិនត្រូវឱ្យពលរដ្ឋខ្មែរយើងស្លាប់ដោយអណោចអធមឡើយ»។
លោកបន្តថា ក្រសួងបរិស្ថានបានយកឈើដែលរឹបអូសបាន ពីការទប់ស្កាត់និងបង្ក្រាបបទល្មើសធនធានធម្មជាតិ ដើម្បីផលិតក្តាមឈូសផ្តល់ជូនអាជ្ញាធរពាក់ព័ន្ធប្រើប្រាស់ សម្រាប់តម្កល់សពអ្នកជំងឺកូវីដ ១៩ ដែលបានស្លាប់។
លោកបានបញ្ជាក់ថា៖ «ខ្ញុំបានចុះពិនិត្យការផលិតក្តាមឈូស ដោយក្រុមមន្ត្រីមន្ទីរបរិស្ថាខេត្តកំពត កាលពីថ្ងៃទី ៨ ខែ កក្កដា ឆ្នាំ ២០២១ និងរូបភាពក្តាមឈូសដែលបានផលិតនៅតាមបណ្តាមន្ទីរបរិស្ថានខេត្តផ្សេងទៀត ដែលមានឈើចាប់បានពីបទល្មើសធនធានធម្មជាតិ និងបានការអនុញ្ញាតឱ្យប្រើប្រាស់»។
កាលពីថ្ងៃទី ១ កក្កដា លោកនាយករដ្ឋមន្ត្រី បានបញ្ជាឱ្យក្រសួងសេដ្ឋកិច្ចប្រមូលទិញក្តាមឈូសដែលមានដាក់លក់ទាំងអស់នៅលើទីផ្សារឱ្យបាន ៨០% ដើម្បីស្ដុកទុកនៅតាមមន្ទីរពេទ្យក្នុងរាជធានីភ្នំពេញ និងតាមបណ្ដាខេត្ត សម្រាប់ដាក់អ្នកស្លាប់ដោយសារជំងឺកូវីដ ១៩។
ជាមួយនឹងការប្រកាសនេះ កម្ពុជាក៏បានបញ្ជាទិញមឈូសពីប្រទេសជិតខាង និងនៅតាមទីផ្សារនានា ដើម្បីទុកសម្រាប់ដំកល់សពអ្នកស្លាប់ដោយសារជំងឺនេះផងដែរ៕
វីដេអូ៖
