.jpg)
អតិថិជនម្នាក់កំពុងស្វែងរកការបញ្ជាទិញទំនិញតាមអនឡាញ កាលពីថ្ងៃទី ១០ កក្កដា។ រូបថត ហុង មិនា
ភ្នំពេញៈ នាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃបានរកឃើញ និងបង្រាបករណីឆបោកតាមបណ្តាញសង្គម មានចំនួន ១០ ករណី និងករណីមួយចំនួនត្រូវបានបញ្ជូនទៅតុលាការ ដើម្បីអនុវត្តទោសតាមច្បាប់ ក្នុងអំឡុងពេលនៃការផ្ទុះឡើងនូវជំងឺកូវីដ ១៩ នៅប្រទេសកម្ពុជា រយៈពេលជាង ១ មកឆ្នាំនេះ។
លោក ជា ពៅ ប្រធាននាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ ប្រាប់ ភ្នំពេញ ប៉ុស្តិ៍ នៅថ្ងៃទី ១១ កក្កដានេះថា ទោះជាយ៉ាងណា ចំនួននៃករណីឆបោកនេះ មិនមានច្រើននោះទេ។ ខាងនាយកដ្ឋានក៏បានធ្វើការផ្សព្វផ្សាយ អប់រំដល់ពលរដ្ឋឱ្យមានការប្រុងប្រយ័ត្នខ្ពស់ផងដែរ ពាក់ព័ន្ធនឹងការឆបោក តាមបណ្តាញសង្គមនេះ។
លោកបន្តថា ក្នុងអំឡុងពេលនៃការរីករាលដាលនៃជំងឺកូវីដ ១៩ ប្រជាពលរដ្ឋភាគច្រើន សម្រាកនៅផ្ទះ និងបានប្រើប្រាស់បណ្តាញសង្គមច្រើន។ ពេលខ្លះពលរដេ្ឋ បានបញ្ជាទិញទំនិញតាមអនឡាញ ខណៈការដឹកជញ្ជូនមានភាពយឺតយ៉ាវ ក៏គាត់គិតថា គេបោកប្រាស់ដែរ។ ប៉ុន្តែមិនដូច្នោះនោះទេ ព្រោះពេលនោះ កម្ពុជាមានការរឹតត្បិតក្នុងការធ្វើដំណើរ ដែលបណ្តាលឱ្យអ្នកដឹកជញ្ជូនទំនិញផ្សេងៗមានភាពយឺតយ៉ាវ។
បើតាមលោក ជា ពៅ ពលរដ្ឋមួយចំនួន បានបញ្ជាទិញទំនិញតាមអនឡាញ ដោយមិនមានភាពច្បាស់លាស់ ដោយខ្លួនឯងបានវេរលុយចូលទៅអ្នកផ្សេងក៏ត្រូវបានចាត់ទុកថា គេបោកប្រាស់គាត់។ ប៉ុន្តែនៅពេលដែលមន្ត្រីនៃនាយកដ្ឋានស្រាវជ្រាវ ប្រាប់គាត់ពីមូលហេតុពួកគាត់ក៏អស់ចិត្ត និងពេលខ្លះទៀតក៏ទទួលបានលុយមកវិញដែរ៕
