.jpg)
ជនសង្ស័យត្រូវបានចាប់ខ្លួន កាលពីថ្ងៃទី ៧ កក្កដា ពាក់ព័ន្ធមនុស្សឃាតនៅខេត្តកំពង់ឆ្នាំង កាលពីថ្ងៃទី ២៨ មិថុនា និងរូបជនរងគ្រោះ (ស្តាំ)។ រូបថត ប៉ូលិស
កំពង់ឆ្នាំងៈ តុលាការឃុំខ្លួនបុរសសង្ស័យម្នាក់ក្នុងអំពើមនុស្សឃាតក្នុងពន្ធនាគារខេត្តកំពង់ឆ្នាំង កាលពីថ្ងៃទី ១០ កក្កដា ខណៈសាកសពបុរសម្នាក់ ក៏ត្រូវបានរកឃើញនៅថ្ងៃជាមួយគ្នានេះដែរ បន្ទាប់ពីជនសង្ស័យសម្លាប់កាលពីថ្ងៃទី ២៨ មិថុនា នៅខេត្តកំពង់ឆ្នាំង ហើយយកសពទៅទម្លាក់ចោលក្នុងទឹកទន្លេ ក្រុងតាខ្មៅ ខេត្តកណ្តាល។
លោក អៀរ ប៊ុនធឿន ស្នងការរង និងជាអ្នកនាំពាក្យនៃស្នងការដ្ឋាននគរបាលខេត្តកំពង់ឆ្នាំងប្រាប់ ភ្នំពេញ ប៉ុស្តិ៍ នៅថ្ងៃទី ១១ កក្កដាថា លោកបានទទួលដីកាឃុំរបស់តុលាការខេត្តកំពង់ឆ្នាំង ដោយបញ្ជាក់ថា ជនត្រូវចោទឈ្មោះ ឈុន ឌីនឿន ភេទប្រុសអាយុ ៣៥ ឆ្នាំ ជាអ្នករត់តុក្នុងហាងខារាអូខេនៅក្រុង-ខេត្តកំពង់ឆ្នាំង ត្រូវបានតុលាការខេត្តកំពង់ឆ្នាំងឃុំនៅពន្ធនាគារខេត្តហើយកាលពីថ្ងៃសៅរ៍ចុងសប្តាហ៍នេះ ពាក់ព័ន្ធបទល្មើសមនុស្សឃាត។
លោកថ្លែងថា៖ «ជនត្រូវចោទពាក់ព័ន្ធនឹងបទមនុស្សឃាត។ ជនម្នាក់នេះ យើងចាប់ខ្លួននៅថ្ងៃទី ៧ កក្កដា ហើយ ៣ ថ្ងៃក្រោយ ត្រូវតុលាការឃុំ។ គាត់មិនបានសារភាពទេ ប៉ុន្តែយើងស្រាវជ្រាវរកឃើញថា គាត់ជាអ្នកសម្លាប់ជនរងគ្រោះ»។
លោកបញ្ជាក់ថា៖ «ជនត្រូវចោទប្រាប់សមត្ចកិច្ចថា ជនរងគ្រោះគាំងបេះដូង ហើយគាត់មិនដឹងយកទៅណា ក៏យកសពច្រកការ៉ុងយកទៅបោះចោលទៅ»។
បើតាមលោក ប៊ុនធឿន កាលពីថ្ងៃទី ២៨ មិថុនា មានសាច់ញាតិរបស់ជនរងគ្រោះមកដាក់ពាក្យបណ្តឹងនៅស្នងការដ្ឋាននគរបាលខេត្តកំពង់ឆ្នាំង។ ក្នុងពាក្យបណ្តឹងនោះរៀបរាប់ថា ឈ្មោះ ចាន់ គៀន អាយុ ៥៨ ឆ្នាំ ជាប្រធានក្រុមតន្ត្រីសម័យ មានលំនៅភូមិឧទុម្ពរ ឃុំស្វាយជ្រុំ ស្រុក រលាប្អៀរ បានបាត់ខ្លួន កាលពីយប់ ថ្ងៃទី ២៧ ខែ មិថុនា ឆ្នាំ ២០២១។ ជនរងគ្រោះបានជិះរថយន្តផ្ទាល់ខ្លួន ម៉ាកតាកូម៉ា ពណ៌ខ្មៅ ពាក់ស្លាក លេខកំពង់ឆ្នាំង 2A-2626 មកទីរួមខេត្តកំពង់ឆ្នាំង ដើម្បីជួបជនសង្ស័យ នៅផ្ទះសំណាក់ ហើយក៏បាត់ខ្លួនរហូត។
បន្ទាប់ពីសមត្ថកិច្ចរបស់លោកទទួលបណ្តឹងមកក៏បានស្នើសុំសម្របសម្រួលតាមផ្លូវច្បាប់ពីព្រះរាជអាជ្ញាសាលាដំបូងខេត្តកំពង់ឆ្នាំង ដើម្បីបើកការស្រាវជ្រាវ។ លោកបន្តថា ក្រោយពីសមត្ថកិច្ចចុះស្រាវជ្រាវដល់ផ្ទះសំណាក់មួយកន្លែងស្ថិតក្នុងភូមិស្រែព្រីង សង្កាត់-ក្រុងកំពង់ឆ្នាំង និងប្រមូលព័ត៌មានពាក់ព័ន្ធជនរងគ្រោះមក ក៏ទទួលបានតម្រុយថា ជនសង្ស័យបានមករាជធានីភ្នំពេញ។ ពេលនោះសមត្ថកិច្ចលោកបានបន្តមករាជធានីភ្នំពេញហើយស្រាវជ្រាវចាប់ជនសង្ស័យបាននៅថ្ងៃទី ៧ កក្កដា បន្ទាប់ពីជនសង្ស័យយករថយន្តរបស់ជនរងគ្រោះលក់ក្នុងតម្លៃ ៥ ៧០០ ដុល្លារអាមេរិក។
លោកបន្ថែមថា ក្រោយចាប់ខ្លួន គឺជនសង្ស័យថា គាត់មិនបានសម្លាប់ជនរងគ្រោះទេ តែជនរងគ្រោះគាំងបេះដូងស្លាប់ ប៉ុន្តែគាត់មិនបានរាយការណ៍ប្រាប់សមត្ថកិច្ចឬម្ចាស់ផ្ទះសំណាក់ឱ្យដឹងទេ។ បន្ទាប់មកគាត់បានយករថយន្តរបស់ជនរងគ្រោះដឹកសាកសពដល់ស្រុកឧត្តុង្គ ខេត្តកំពង់ស្ពឺ ហើយក៏ច្រកក្នុងការ៉ុងយកទៅស្ពានព្រែកសំរោង ក្រុងតាខ្មៅទម្លាក់ចោលក្នុងទឹកទន្លេ។
បន្ទាប់មកជនសង្ស័យបានត្រឡប់ចូលរាជធានីភ្នំពេញវិញ រហូតសមត្ថកិច្ចចាប់ខ្លួននៅថ្ងៃទី ៧ កក្កដាតែម្ត។ ដោយឡែកលោក យី វណ្ណដា អធិការនគរបាលក្រុងតាខ្មៅបានប្រាប់នៅថ្ងៃទី ១១ កក្កដាថា សាកសពរបស់ជនរងគ្រោះឈ្មោះ ចាន់ គៀន ត្រូវបានប្រជាពលរដ្ឋប្រទះឃើញអណ្តែតទឹកក្នុងការ៉ុងកាលពីរសៀលថ្ងៃទី ១០ កក្កដា។
លោកបញ្ជាក់ថា៖ «សាកសពជនរងគ្រោះអណ្តែតដល់ភូមិសាស្រ្តឃុំសិត្បូ ក្រុងតាខ្មៅ។ ចំពោះសាកសពយើងបានប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីហើយ»៕
