សៀមរាបៈ ក្រុមប្រតិបត្តិការរបស់មជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) ប្រចាំខេត្តសៀមរាប កាលពីថ្ងៃ ១០ កក្កដា បានចុះយកគ្រាប់បែកដៃប្រភេទ No36 ចំនួន ៣២៥ គ្រាប់ ផលិតនៅអង់គ្លេស ដើម្បីរៀបចំកម្ទេចចោល ខណៈមួយចំនួនទៀតមិនទាន់អាចយកចេញបាន បន្ទាប់ពីក្រុមហ៊ុនជីកដីកប់ខ្សែកាបបំពង់ដាក់បង្កប់ទុយោបានប្រទះឃើញនៅជាប់របងវិទ្យាល័យ ១០ មករា ក្នុងក្រុងសៀមរាប។
លោក ហេង រតនា អគ្គនាយកស៊ីម៉ាក់ប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែ កក្កដា ឆ្នាំ ២០២១ ថា គ្រាប់បែកដៃទាំង ៣២៥ គ្រាប់នោះនៅមានប្រសិទ្ធភាពនៃសារធាតុផ្ទុះរបស់វា (យកទៅដុតវាគ្រោះថ្នាក់) ប៉ុន្តែបើកាច់បោកមិនផ្ទុះទេ ព្រោះគន្លឹះរបស់វាខូចអស់ហើយ។ គ្រាប់ទាំងនេះបានបន្សល់ពីសម័យសង្គ្រាមស៊ីវិលក្នុងទសវត្សរ៍ឆ្នាំ ៧០ មិនមែនក្នុងសម័យសង្គ្រាមចុងក្រោយនេះទេ ព្រោះជាប្រភេទគ្រាប់បែកដៃផលិតនៅក្នុងប្រទេសអង់គ្លេស ។
លោកបានថ្លែងថា៖ «អ្នកធ្វើរបងមុន វាអត់ដឹង។ គ្រាប់នេះ កប់នៅក្នុងរបងហ្នឹងតែម្តង ប្រហែលវាហេងវា ឬក៏យ៉ាងម៉េច បានជាមិនត្រូវវា វាចំកន្លែងគ្រឺះ និងចំកន្លែងចាក់ធ្នឹម។ នេះហៅថាសំណាងមួយដែរ ធ្វើរបងសាលាផង ធ្វើលូទឹកផង ធ្វើផ្លូវផង មិនប៉ះ មិនផ្ទុះ តែប៉ះត្រឹមជីកដីដាក់ខ្សែកាប»។
បើតាមលោក ហេង រតនា គ្រាប់បែកដៃទាំង ៣២៥ គ្រាប់ ជាប្រភេទគ្រាប់បែកដៃ No36 UK ផលិតនៅប្រទេសអង់គ្លេស ចាប់ផ្តើមផលិតនិងប្រាស់ប្រាស់តាំងពីឆ្នាំ ១៩១៥ មកម៉្លេះ ត្រូវបានក្រុមហ៊ុនជីកដីកប់ខ្សែកាបកាលពីថ្ងៃទី ១០ ខែ កក្កដា ឆ្នាំ ២០២១ ដាក់បង្កប់ទុយោក៏ជីកប៉ះរណ្តៅគ្រាប់បែកដៃនេះស្ថិតនៅសង្កាត់ស្វាយដង្គំក្រុងសៀមរាប ខេត្តសៀមរាបជាប់របងវិទ្យាល័យ ១០ មករា។
លោក លី សំរិទ្ធ អភិបាលរង និងជាអ្នកនាំពាក្យរដ្ឋបាលខេត្តសៀមរាបបានឱ្យដឹងបន្ថែមនៅថ្ងៃទី ១១ កក្កដាថា គ្រាប់ទាំងនេះ ត្រូវបានក្រុមហ៊ុនជីកដីកប់ខ្សែកាបដាក់បង្កប់ទុយោក្នុងគម្រោងផ្លូវទាំង ៣៨ ខ្សែក្នុងក្រុងសៀមរាប ជីកប៉ះនៅជាប់របងខាងជើងវិទ្យាល័យ ១០ មករា។
លោកបានបន្តថា នេះ គឺភាពចៃដន្យល្អមួយដែលគ្រឿងចក្រកាយដីសាងសង់គម្រោងផ្លូវ ៣៨ ខ្សែនេះមិនប៉ះ ហើយត្រូវបានកងកម្លាំងស៊ីម៉ាក់យកចេញបាន ៣២៥ គ្រាប់ រួមជាមួយនឹងតំបន់នេះ ត្រូវបានហ៊ុមព័ទ្ធ និងដាក់ស្លាកសញ្ញាប្រាប់ពីគ្រោះថ្នាក់។
លោក លី សំរិទ្ធ ថ្លែងថា៖ « នៅថ្ងៃស្អែក (ទី ១២ ខែ កក្កដា) ក្រុមស៊ីម៉ាក់ និងមកយក និងរាវរកបន្ថែម ព្រោះនៅថ្ងៃនេះ (ទី ១១ ខែកក្កដា ) គឺជាថ្ងៃសម្រាករបស់គេ ។ អាជ្ញាធរបានប្រគល់ទៅឱ្យស៊ីម៉ាក់ជាអ្នកចាត់ចែង កម្ទេចតាមបច្ចេកទេសត្រឹមត្រូវ»៕