ពោធិ៍សាត់ៈ សមត្ថកិច្ចនគរបាលខេត្តពោធិ៍សាត់កំពុងបន្តនីតិវិធីសួរនាំស្ត្រីម្នាក់ដែលចាក់ប្តីខ្លួនឯងស្លាប់ ដើម្បីកសាងសំណុំរឿងបញ្ជូនទៅតុលាការ បន្ទាប់ពីសមត្ថកិច្ចនគរបាលស្រុកវាលវែងបានបញ្ជូនទៅដល់ស្នងការដ្ឋាននគរបាលខេត្ត នៅរសៀលថ្ងៃទី ១១ ខែកក្កដានេះ។
លោក ម៉ូ លីដា ស្នងការរងនគរបាលខេត្តពោធិ៍សាត់ទទួលបន្ទុកផែនការងារព្រហ្មទណ្ឌប្រាប់ ភ្នំពេញ ប៉ុស្តិ៍ នៅរសៀលថ្ងៃទី ១១ ខែកក្កដានេះថា ជនសង្ស័យ ត្រូវបានកម្លាំងនគរបាលស្រុកវាលវែងបញ្ជូនមកដល់ស្នងការដ្ឋាននគរបាលខេត្តនៅរសៀលថ្ងៃទី ១១ ខែកក្កដានេះ។ សមត្ថកិច្ចនគរបាលការិយាល័យព្រហ្មទណ្ឌកំពុងបន្តនីតិវិធីសួរនាំ និងកសាងសំណុំរឿង ដើម្បីបញ្ជូនទៅតុលាការនៅថ្ងៃទី ១២ ខែកក្កដា។
បើតាមលោក ម៉ូលីដា ករណីប្រពន្ធចាក់ប្តីខ្លួនឯងស្លាប់ ដោយសារជម្លោះក្នុងគ្រួសារនេះ បណ្តាលឲ្យម្តាយជាប់ទោស រីឯប្តីស្លាប់ និងបណ្តាលឲ្យកូនក្មេង ២ នាក់រស់នៅគ្មានភាពកក់ក្តៅ ដោយម្នាក់អាយុ ៥ ឆ្នាំ និងម្នាក់ទៀតអាយុ ៣ ឆ្នាំ។ យ៉ាងណា លោកមិនបានបញ្ជាក់ច្បាស់ថា កូនរបស់ជនរងគ្រោះត្រូវបានសាច់ញាតិខាងណាទទួលយកទៅចិញ្ចឹមនោះទេ។
លោកថ្លែងថា៖ «តាមការស៊ីបអង្កេតស្រាវជ្រាវជាក់ស្តែង ជនសង្ស័យពិតជាបានសម្លាប់ប្តីរបស់ខ្លួនដោយសាតែបញ្ហាជម្លោះក្នុងគ្រួសារពិតប្រាកដមែន។ ប្តីរបស់ជនសង្ស័យស្រវឹងស្រា ហើយបានវាយទៅលើជនសង្ស័យ [ប្រពន្ធ] មុន ទើបបណ្តាលឲ្យជនសង្ស័យទាញបានកាំបិតបត់ខ្លីមកចាក់ទៅលើជនរងគ្រោះតែម្តង»។
អធិការនគរបាលស្រុកវាលវែង លោក ធាង ឡេង ថ្លែងថា ជនសង្ស័យបានចាក់ប្តីរបស់ខ្លួនស្លាប់ នៅយប់ថ្ងៃទី ៩ ខែកក្កដា នៅចំណុចអូរ ១៧ ក្នុងភូមិដីក្រហម ឃុំអន្លង់រាប ស្រុកវាលវែង។ លោកបញ្ជាក់ថា ជនសង្ស័យជាប្រពន្ធឈ្មោះ តាំង គា អាយុ ២៦ ឆ្នាំ ចំណែកជនរងគ្រោះឈ្មោះ សឿន ស៊ា អាយុ ៣៤ ឆ្នាំ ត្រូវប្រពន្ធរបស់ខ្លួនចាក់ត្រូវ ១ កាំបិត ចំឆ្អឹងជំនីរខាងឆ្វេងបណ្ដាលឲ្យស្លាប់នៅនឹងកន្លែងកើតហេតុ ហើយបន្ទាប់មកជនសង្ស័យត្រូវបានសមត្ថកិច្ចឃាត់ខ្លួននៅថ្ងៃទី ១០ កក្កដា។
បើតាមលោក ធាង ឡេង ជនរងគ្រោះត្រូវបានប្រគល់ឲ្យសាច់ញាតិយកទៅធ្វើបុណ្យតាមប្រពៃណី ចំណែកជនសង្ស័យត្រូវបានកម្លាំងសមត្ថកិច្ចនគរបាលបញ្ជូនទៅកាន់ស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធី។
លោកបញ្ជាក់ថា ២ នាក់ប្តីប្រពន្ធ តែងតែឈ្លោះគ្នាស្ទើររាល់ថ្ងៃ រហូតដលថ្ងៃកើតហេតុ ប្រពន្ធទ្រាំមិនបាន ទើបបណ្តាលឲ្យមានករណីចាក់សម្លាប់បែបនេះតែម្តង។
លោកថ្លែងថា៖ «ប្តីគាត់ហ្នឹងបើតាមសួរប្រពន្ធ គឺគាត់រករឿងប្រពន្ធមុន រករឿងហ្នឹងគឺមិនមែនរករឿងពាក្យសម្តីទេ គាត់ថា វាយគាត់ទៀត អ៊ីចឹងគាត់ទ្រាំមិនបានក៏ទាញកាំបិតមកចាក់ទៅលើជនរងគ្រោះតែម្តងទៅ»៕